അറിഞ്ഞില്ലേ ഞങ്ങള് എല്ലാം പറഞ്ഞ് കോംപ്ലിമെന്റ്സ് ആക്കി... ക്യൂ തെറ്റിച്ച് അവസാനം ചീത്തവിളിച്ചെന്ന കേസില് രജ്ഞിനിയും പ്രവാസിയും കേസ് ഒത്തുതീര്പ്പാക്കി
അറിഞ്ഞില്ലേ ഞങ്ങള് എല്ലാം പറഞ്ഞ് കോംപ്ലിമെന്റ്സ് ആക്കി... എന്ന മാന്നാര് മത്തായി സ്പീക്കിങ്ങ് എന്ന സിനിമയില് ഗര്വാസീസ് ആശാന് സുകുമാരിയോട് പറയുന്ന ഡയലോഗാണ് രഞ്ജിനി ഹരിദാസിന്റെ അവസ്ഥ. അങ്ങേയറ്റം ശത്രുക്കളായി കണ്ട ആ പ്രവാസിയുടെ കേസില് നിന്നും കോപ്രമൈസായി.
2013 മെയ് 16നാണ് കേസുകള്ക്കാസ്പദമായ സംഭവം നെടുമ്പാശേരി വിമാനത്താവളത്തിനകത്ത് നടന്നത്. എമിഗ്രെഷന് ക്ലിയറന്സ് കൗണ്ടറിനു മുന്പില് രഞ്ജിനി ക്യൂ തെറ്റിച്ച് കയറിയെന്നും ഇത് ചോദ്യം ചെയതതിനു തന്നേയും ഭാര്യയേയും കയ്യേറ്റം ചെയ്യാന് അവര് ശ്രമിച്ചെന്നുമാണ് ബിനോയ് എന്ന അമേരിക്കന് മലയാളിയും ഭാര്യ കൊച്ചുറാണിയും നല്കിയ പരാതി. എന്നാല് ബിനോയ് തന്നെ അസഭ്യം പറഞ്ഞ് കയ്യേറ്റം ചെയ്തെന്നായിരുന്നു രഞ്ജിനിയുടെ പരാതി. സംഭവത്തില് അപ്പോള് ഡ്യൂട്ടിയിലുണ്ടായിരുന്ന ഉദ്യോഗസ്ഥരും ക്യൂവിലുണ്ടായിരുന്ന പ്രവാസികളുമെല്ലാം സാക്ഷികളായി ഉണ്ടായിരുന്നു.
ഈ കേസാണ് ഇരുവരും ചേര്ന്ന് കോടതിക്കു പുറത്ത് അനുരഞ്ജനത്തിലാക്കിയത്. തന്നെ കയ്യേറ്റം ചെയ്യാന് രഞ്ജിനി മുതിര്ന്നെന്ന പരാതിയില്നിന്ന് അമേരിക്കന് മലയാളിയും കോട്ടയം പൊന്കുന്നം സ്വദേശിയുമായ ബിനോയിയും ക്യൂ തെറ്റിച്ചെന്നു പറഞ്ഞ് ചോദ്യം ചെയ്ത ബിനോയിയെ കേട്ടാലറയ്ക്കുന്ന അസഭ്യം പറഞ്ഞ് അപമാനിച്ചെന്ന പരാതിയില്നിന്ന് രഞ്ജിനിയും ഒരുപോലെ പിറകോട്ടു പോകുകയായിരുന്നു.
കേസില് കോടതി സമന്സ് അയയ്്ക്കുമ്പോഴെല്ലാം ഹാജരാകേണ്ടി വരുന്നതു മൂലമുള്ള സമയനഷ്ടവും ധനനഷ്ടവും കൃത്യമായി ബോധ്യപ്പെട്ടതോടെയാണത്രെ കോംപ്രമൈസ് എന്ന ധാരണയിലേക്ക് ഇരുകൂട്ടരും എത്തിച്ചേര്ന്നത്. അമേരിക്കയില് ജോലിചെയ്യുന്ന ബിനോയിക്കും കുടുംബത്തിനും കേസിന്റെ ആവശ്യത്തിനായി ഇടക്കിടക്ക് നാട്ടില് വന്നുപോകാനുള്ള ബുദ്ധിമുട്ട്. രഞ്ജിനിക്കും തിരക്കുപിടിച്ച പരിപാടികള്ക്കിടെ കൃത്യസമയത്തു കോടതിയില് വരേണ്ടിവരുന്നു. ഈ ബുദ്ധിമുട്ടു മനസിലാക്കിയാണ് അഭിഭാഷകര് മുഖേനയുള്ള ഒത്തുതീര്പ്പിലേക്ക് ഇരുവരും എത്തിച്ചേര്ന്നത്.
കേസും കൗണ്ടര് കേസുമുള്ളതിനാല് രണ്ടുകൂട്ടരും നഷ്ടപരിഹാരം കൊടുക്കുകയോ വാങ്ങുകയോ ചെയ്തിട്ടില്ല. ആലുവ രണ്ടാം ക്ലാസ് മജിസ്ട്രേറ്റ് കോടതിയിലുള്ള കേസില് ഒരു തവണ മാത്രമാണ് രഞ്ജിനിയും ബിനോയിയും ഹാജരായത്. ഇതോടെ തന്നെ രണ്ടുപേര്ക്കും തീരെ ശീലമില്ലാത്ത കോടതിയിടപാട് മടുത്തുപോയി.
സെലിബ്രിറ്റി ആയാലും വ്യവഹാരം നടക്കുമ്പോള് കോടതിയില് ജഡ്ജിക്കു മുന്നില് രഞ്ജിനിയും വെറും കക്ഷി മാത്രമാണ്. കോടതിയിലെ കേസുകളുടെ എണ്ണക്കൂടുതല് കാരണം ഇവര് തമ്മിലുള്ള കേസ് രണ്ടുവര്ഷമായിട്ടും ഏതാണ്ട് വിചാരണയുടെ പ്രാരംഭ ഘട്ടത്തില് തന്നെയാണ്. ഇതാണ് കണിശക്കാരിയായി അറിയപ്പെടുന്ന രഞ്ജിനി ഹരിദാസ് തന്റെ അഭിമാനപ്രശ്നം കൂടിയായ വിമാനത്താവള കേസില് നിന്നു പിന്മാറാന് പ്രേരിപ്പിച്ച ഘടകം. കേസില് നിന്ന് ഒരു കാരണവശാലും പിന്നോട്ടില്ലെന്നായിരുന്നു രഞ്ജിനിയുടെ തുടക്കത്തിലുള്ള നിലപാട്. എന്നാല് ഒടുക്കം വിചാരിച്ചതു പോലെ തന്നെ ഒത്തുതീര്പ്പ് എന്ന സ്ഥിരം കേസുകളുടെ അവസ്ഥയിലേക്ക് ഈ കേസും എത്തിച്ചേരുകയായിരുന്നു. പെറ്റി കേസാണെങ്കിലും രണ്ടു തവണ സമന്സ് അയച്ച് പ്രതി ഹാജരായില്ലെങ്കില് വാറന്റും റിമാന്ഡും ഉള്പ്പെടെ സംഭവിക്കാനുള്ള സാധ്യതയും ഈ കേസുകളില് ഉണ്ടായിരുന്നു. തിരക്കുള്ള സെലിബ്രിറ്റി ആയതിനാല് കോടതിയില് ഹാജരാകുന്നതില് രഞ്ജിനിക്ക് വീഴ്ചയുണ്ടാകാന് സാധ്യതയുള്ളതായി ഭയപ്പെട്ടിരുന്നു.
എന്നാല് ആരാണ് ആദ്യം കേസ് ഒത്തുതീര്പ്പാക്കാം എന്ന ഫോര്മുല മുന്നോട്ടുവച്ചതെന്ന കാര്യത്തില് ഇതുവരെ വ്യക്തത വന്നിട്ടില്ല. എന്തായാലും രഞ്ജിനി ഹരിദാസ് ഈ വിഷയത്തില് ഇതുവരെ ഒരു പരസ്യ പ്രതികരണത്തിന് മുതിര്ന്നിട്ടില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha