ബ്രോക്കര്‍ രാജീവിനു ജീവന്‍ നഷ്ടപ്പെടുത്തിയെന്ന് കരുതിയ പാലക്കാട് മുതലമടയിലെ പതിനേഴര ഏക്കര്‍ മാവിന്‍തോട്ടത്തിലെ മാനേജരെ പോലീസ് ചോദ്യം ചെയ്യുന്നു. ഇതോടെ അഡ്വ. സിപി ഉദയഭാനുവിനെതിരെയുള്ള ശക്തമായ തെളിവുകള്‍ പുറത്ത് വരുമെന്നാണ് കരുതുന്നത്. അതേസമയം എല്ലാ അടവുകളും പിഴച്ച ഉദയഭാനു ഹൈക്കോടതിയിലേക്ക് പോകുകയാണ്. 

വിധവയായ പ്രൊഫസര്‍ മേരി വിധേയത്തിലിന്റെ ഈ തോട്ടം ഏക്കറിന് ഇരുപത്തി ഒന്നു ലക്ഷം രൂപയ്ക്കാണ് സിപി ഉദയഭാനുവും ഇടപാടുകാരന്‍ രാജീവും കൂടി അന്‍പത് ലക്ഷം രൂപ അഡ്വാന്‍സ് നല്‍കി എഗ്രിമെന്റ് വച്ചത്. മുഖ്യമായും ബ്ലാക് മണിയാണ് കച്ചവടത്തില്‍ പറഞ്ഞുറപ്പിച്ചത്. മക്കളില്ലാത്ത ടീച്ചറിന് സഹായിയായി നില്ക്കുന്ന കാര്യസ്ഥന് 22 സെന്റ് സ്ഥലവും പത്തുലക്ഷം രൂപയും ടീച്ചര്‍ വാഗ്ദാനം ചെയ്തു. കാര്യസ്ഥനും രാജീവും ചില തലേക്കെട്ടുകള്‍ കൂടി കച്ചവടത്തില്‍ ഉറപ്പിച്ചു.

മിക്ക ദിവസങ്ങളിലും മുതലമടയിലെത്തുന്ന രാജീവ് വില കൂടിയ കാറുകളിലെത്തി മദ്യമൊക്കെ നല്‍കി കാര്യസ്ഥനെ പൂര്‍ണ്ണമായും കയ്യിലെടുത്തു. ടീച്ചറിനും പൂര്‍ണ്ണ വിശ്വാസം. ഇതിനിടയില്‍ കരാറില്‍ കാണിക്കാത്ത പണം പൂര്‍ണ്ണമായും ഉദയഭാനു രാജീവിനെ ഏല്‍പ്പിച്ചതായാണ് കേട്ടു കേള്‍വി. ഇക്കാര്യം പറഞ്ഞ് പലതവണ ഉദയഭാനു ടീച്ചറിനടുത്തെത്തി. അവര്‍ കൈമലര്‍ത്തി. അന്‍പതു ലക്ഷം രൂപയുടെ ഉത്തരവാദിത്വമുണ്ടെന്നും ബാക്കി തുകയെ കുറിച്ചറിയില്ലെന്നുമായി ടീച്ചര്‍.

ഉദയഭാനു പെട്ടു. ഒരു വിധ രേഖയുമില്ല. ഡീമോനിറ്റൈസേഷനില്‍ താനും പെട്ടെന്ന് രാജീവ് തുക തിരിച്ചു തരണമെന്നായി ഉദയഭാനു. പക വളര്‍ന്നു. ഉറ്റ സുഹൃത്ത് ചക്കര ജോണിയെയും കൂട്ടി വക്കീല്‍ ഭീഷണിയുയര്‍ത്തി. ചക്കര ജോണി വഴി നടത്തിയ ക്വട്ടേഷന്‍ പാളി. രാജീവിനെ കൊണ്ട് ഒപ്പിട്ടു വാങ്ങാനുള്ള കരാര്‍ പോലും തയ്യാറാക്കിയത് ഉദയഭാനു വക്കീലാണെന്നും കണ്ടെത്തി. ഇതെല്ലാം ഉദയഭാനുവിനെ കുടുക്കുന്ന ശക്തമായ തെളുവുകളാണ്. 

പോലീസ് തോട്ടം കാര്യസ്ഥനെ ചോദ്യം ചെയ്യാനായി ഇന്നു വിളിപ്പിച്ചിട്ടുണ്ട്. അതിനിടയില്‍ സ്വാധീനത്തിനായി ചിലര്‍ ശ്രമിച്ചു. അക്ഷരാര്‍ത്ഥത്തില്‍ ടീച്ചറും പെട്ടു. ഉദയഭാനുവിന്റെ മിക്ക ഭൂമിയിടപാടുകളിലെയും ബ്രോക്കറോ പങ്കാളിയോ ഒക്കെ ആയിരുന്ന രാജീവ് ചക്കര ജോണിയുടെയും വിശ്വസ്ഥനായിരുന്നു. പൂജ്യത്തില്‍ നിന്നു കോടികള്‍ നേടിയെടുത്ത രാജീവിന്റെ വളര്‍ച്ചയില്‍ ഇരുവര്‍ക്കും വലിയ പകയായിരുന്നു.

അതേസമയം രാജീവിന്റെ വീട്ടില്‍ അഡ്വ.സി.പി.ഉദയഭാനു പല തവണ വന്നതിന് തെളിവ് ലഭിച്ചു. രാജീവിന്റെ വീട്ടിലെ സിസിടിവി ദൃശ്യങ്ങള്‍ പൊലീസിന് ലഭിച്ചു. ദൃശ്യങ്ങള്‍ ഫോറന്‍സിക് പരിശോധനയ്ക്ക് അയയ്ക്കും. ഗൂഢാലോചന കേന്ദ്രീകരിച്ചാണ് കേസന്വേഷണം പുരോഗമിക്കുന്നത്.