പ്രാതല് ഒഴിവാക്കിയാല് ഹൃദയം പിണങ്ങും!
തുടര്ച്ചയായി പ്രഭാതഭക്ഷണം ഒഴിവാക്കുന്നത് ഹൃദയാരോഗ്യത്തെ ദോഷകരമായി ബാധിക്കുമെന്ന് സ്പെയിനില് നിന്നുള്ള പഠനഫലം വെളിപ്പെടുത്തുന്നു.
ആരോഗ്യദായകമായ പ്രാതല് കഴിക്കുന്നവരെ അപേക്ഷിച്ച് പ്രാതല് ഉപേക്ഷിച്ച് വെറും ജ്യൂസോ കാപ്പിയോ കഴിക്കുന്ന മധ്യവയസ്സുകാര്ക്ക് അതീറോ സ്ക്ലീറോസിസ് പിടിപെടാന് കൂടുതല് സാധ്യതയാണുള്ളതെന്ന് പഠനം പറയുന്നു. (ഹൃദയത്തില് നിന്ന് പുറത്തേക്ക് രക്തം വഹിച്ചു കൊണ്ടു പോകുന്ന രക്തധമനികളുടെ വ്യാപ്തി കുറയുകയും കട്ടിയാവുകയും ചെയ്യുന്ന അവസ്ഥയാണ് അതീറോസ്ക്ലീറോസിസ്).
പ്രഭാതഭക്ഷണം ഒഴിവാക്കുന്നത്, അനാരോഗ്യകരമായ മറ്റു ആഹാര ശീലങ്ങളും ജീവിത ശൈലിയും പരിശീലിക്കുവാന് ഇടയാക്കുമെന്ന് പ്രസ്തുത പഠനത്തില് സഹകരിച്ച ഫ്രീഡ്മന് സ്കൂള് ഓഫ് നുട്രീഷന് സയന്സ് ആന്റ് പോളിസിയിലെ ഹോസെ പെനള്വോ പറഞ്ഞു. പുകവലി, അമിത മദ്യപാനം തുടങ്ങിയ ശീലങ്ങള് പരീക്ഷിക്കാനിത് ഇടയാക്കുമെന്നും ഇത് അതീറോസ്ക്ലീറോസിസ് ഉണ്ടാവാനുള്ള സാധ്യത കൂട്ടുമെന്നും പെനള്വോ വ്യക്തമാക്കി.
വ്യായാമമില്ലായ്മ, പുകവലി, ഉയര്ന്ന കൊളസ്ട്രോള് എന്നിങ്ങനെ ഹൃദയാരോഗ്യത്തെ ദോഷമായി ബാധിക്കുന്ന മറ്റു ഘടകങ്ങളെ ഒഴിവാക്കി നടത്തിയ ഗവേഷണങ്ങളിലും പ്രാതല് ഒഴിവാക്കുന്നവരുടെ നിലയാണ് കൂടുതല് അപകടകരം എന്നു തന്നെയാണ് കണ്ടത്. ജേര്ണല് ഓഫ് ദ അമേരിക്കന് കോളേജ് ഓഫ് കാര്ഡിയോളജി ഓണ്ലൈനില് പ്രസിദ്ധപ്പെടുത്തിയതാണ് ഈ വിവരങ്ങള്.
നന്നായി പ്രഭാത ഭക്ഷണം കഴിച്ചാല് രക്തത്തിലെ പഞ്ചസാരയുടെ അളവ് ദിവസം മുഴുവന് നിയന്ത്രണത്തില് നിര്ത്താനാവുമെന്നും വിശപ്പിനെ പിടിച്ചു നിര്ത്താനാവുമെന്നും തന്മൂലം അമിത ഭക്ഷണം മൂലമുണ്ടാകുന്ന ദോഷങ്ങളെ അകറ്റി നിര്ത്താനാവുമെന്നും പെനള്വോ അഭിപ്രായപ്പെട്ടു.
പ്രാതലിനേയും ഹൃദയാരോഗ്യത്തേയും ബന്ധപ്പെടുത്തി കൊണ്ടുള്ള ആദ്യ ഗവേഷണമല്ല ഇതെങ്കിലും മൂന്നു രീതിയില് പ്രഭാത ഭക്ഷണം കഴിക്കുന്നവരെ ഇതില് ഉള്പ്പെടുത്തിയതിനാല് ഈ പഠന ഫലങ്ങള് പ്രത്യേക ശ്രദ്ധയാര്ജ്ജിക്കുന്നു. പ്രാതല് തീര്ത്തും ഒഴിവാക്കിയവര്, മിതമായി പ്രാതല് കഴിക്കുന്നവര്, വളരെ നന്നായി പ്രാതല് കഴിക്കുന്നവര് എന്നിങ്ങനെയായിരുന്നു തരം തിരിച്ചത്. അവരുടെ രക്തധമനികളില് അടിഞ്ഞു കൂടിയ പ്ലാക്കിന്റെ അംശത്തെ കുറിച്ചും അവര് പഠനം നടത്തി.
ഹൃദയ സംബന്ധമായ രോഗങ്ങള് ഒന്നും ഇതുവരെ ഉണ്ടായിട്ടില്ലാത്ത 40-നും 54-നും ഇടയില് പ്രായമുള്ള 4000 മുതിര്ന്നവരെ ഉള്ക്കൊള്ളിച്ചു കൊണ്ടായിരുന്നു സ്പെയിനില് ഈ പഠനം സംഘടിപ്പിച്ചത്. ഇവരുടെ ഭക്ഷണ ശീലങ്ങളെ കുറിച്ചുള്ള വിവരങ്ങള് ക്രോഡീകരിച്ചാണ് മൂന്നു തരത്തിലുള്ള പ്രഭാതഭക്ഷണക്കാരെ വേര്തിരിച്ചത്.
പഠനവുമായി സഹകരിച്ചവരില് 3ശതമാനത്തോളം പേര് പ്രാതല് തീര്ത്തും ഉപേക്ഷിക്കുന്ന കൂട്ടത്തിലുള്ളവരായിരുന്നു. ഒരു ദിവസം ആവശ്യമുള്ള കലോറിയുടെ 5 മുതല് 20 ശതമാനം മാത്രം പ്രഭാത ഭക്ഷണത്തില് നിന്നു ലഭിക്കുന്ന രീതിയിലുള്ള പ്രാതല് കഴിക്കുന്നവരായിരുന്നു രണ്ടാമത്തെ കൂട്ടര്. കാപ്പിയോ ജ്യൂസോ പഴങ്ങളോ ബ്രെഡോ പേസ്ട്രിയോ മാത്രം പ്രാതലിന് കഴിയ്ക്കുന്ന ഇത്തരക്കാര് ഗവേഷണവുമായി സഹകരിച്ചവരില് 70 ശതമാനത്തോളമായിരുന്നു.
ഒരാള്ക്ക് ഒരു ദിവസം മുഴുവന് ആവശ്യമുള്ള കലോറിയേക്കാള് 20 ശതമാനം കൂടുതല് പ്രാതലില് നിന്നു ലഭിക്കുന്ന വിധത്തില് അമിതമായി പ്രഭാതഭക്ഷണം കഴിക്കുന്നവരായിരുന്നു മൂന്നാമത്തെ കൂട്ടര്. 27 ശതമാനത്തോളം പേര് ഈ ഗണത്തില്പെടുന്നവരായിരുന്നു. ബ്രെഡ്, ഫലവര്ഗ്ഗങ്ങള്, ഹാംബര്ഗര്, പയറുവര്ഗ്ഗങ്ങള്, ടൊമാറ്റോ, പേസ്ട്രി എന്നിവയിലേതെങ്കിലിനോടൊപ്പം കാപ്പിയോ ജ്യൂസോ ഒക്കെയായിരുന്നു. ഇവരുടെ പ്രഭാതഭക്ഷണം. അമിതമായി പ്രാതല് കഴിച്ചിരുന്നവരേക്കാള് വെറുതെ കാപ്പിയോ ജ്യൂസോ മാത്രം പ്രാതലിനു കഴിച്ചിരുന്നവരുടെ ധമനികളിലായിരുന്നു കൂടുതല് പ്ലാക്ക് അടിഞ്ഞു കൂടിയിരുന്നത് എന്നത് കൗതുകകരമായിരുന്നു.
https://www.facebook.com/Malayalivartha