പെണ്‍കിളികളുടെ ശ്രദ്ധ നേടാനായി പുരുഷ ഹമ്മിംഗ് ബേര്‍ഡുകള്‍ എന്തൊക്കെ പാടാണ് പെടുന്നതെന്നറിയാമോ? പെണ്‍പക്ഷികള്‍ ഇരിക്കുന്നയിടത്തേക്ക് ചാടിപ്പറക്കല്‍ നടത്തുകയാണ് അവയിലൊരു കാര്യം. പെണ്‍പക്ഷികള്‍ക്ക് വേഗതയാണ് ഇഷ്ടമത്രേ. കൂടിയ വേഗത്തില്‍ ചാടിപറക്കുന്ന ആണ്‍പക്ഷികളേയാണ് പെണ്‍കിളികള്‍ക്ക് ഇഷ്ടമെന്ന് മനസ്സിലാക്കിയ പാവം ആണ്‍ കിളികള്‍ 'അവളുമാരുടെ' മനസ്സില്‍ കയറിപ്പറ്റാനായി പ്രത്യേക തന്ത്രമാണ് ആവിഷ്‌ക്കരിച്ചു നടപ്പാക്കുന്നത്. നല്ല വേഗത്തിലാണ് താന്‍ ചാടിപ്പറന്നിറങ്ങുന്നതെന്ന തോന്നല്‍ ഉളവാക്കുകയാണ് തന്ത്രം.

ഇക്കഴിഞ്ഞ വെള്ളിയാഴ്ച കറന്റ് ബയോളജിയില്‍ കാലിഫോര്‍ണിയ റിവര്‍സൈഡ് യൂണിവേഴ്‌സിറ്റിയിലെ ഗവേഷകര്‍ പ്രസിദ്ധീകരിച്ചിട്ടുള്ള റിപ്പോര്‍ട്ടിലാണ് ഈ കാര്യം പ്രതിപാദിച്ചിട്ടുള്ളത്.

പെണ്‍പക്ഷികളുടെ നേരെ മുന്നിലേക്ക് ഈ എടുത്തു ചാട്ടം അവര്‍ നടത്തുകയില്ല. അതിന്റെ ഏതെങ്കിലും വശത്തേക്കാണ് ആണ്‍കിളികള്‍ ചാടിപ്പറന്നിറങ്ങാറുള്ളതെന്നാണ് ഗവേഷകര്‍ കണ്ടെത്തിയത്. ഇവ ഇപ്രകാരം ചാടിയിറങ്ങുമ്പോള്‍ പുറപ്പെടുന്ന ഡോപഌ ഇഫക്ട് ഉള്ള ഒരു ശബ്ദമുണ്ട്. ചാട്ടം ഒരു വശത്തേക്കാകുമ്പോള്‍ പെണ്‍കിളികള്‍ ആ ശബ്ദം കേള്‍ക്കുന്നത് കുറഞ്ഞ ശബ്ദത്തിലാണത്രേ. ഡോപഌ ഇഫക്ട് എന്നു പറയുന്നത്, ഒരു ആംബുലന്‍സില്‍ നിന്ന് കേള്‍പ്പിക്കുന്നതു പോലെ, ശബ്ദം ഉയര്‍ന്നു താഴുന്ന രീതിയാണ്. പറന്നിറങ്ങുന്നതിന്റെ അവരുടെ വേഗത കൃത്യമായി മനസ്സിലാക്കാനുള്ള അവസരം പെണ്‍കിളികള്‍ക്ക് നിഷേധിക്കുന്ന സൂത്രമാണിതെന്നാണ് ഗവേഷകരുടെ അഭിപ്രായം.

തങ്ങളുടെ വാല്‍ച്ചിറകുകളെ ശരീരത്തില്‍ നിന്നും 90ഡിഗ്രി അകലേയ്ക്ക് തിരിച്ചു പിടിച്ചു കൊണ്ട് ചാടിയിറങ്ങുമ്പോഴാണ് ആണ്‍ പക്ഷികളുടെ ചാട്ടത്തിന്റെ ശബ്ദം പെണ്‍പക്ഷികള്‍ക്ക് കേള്‍ക്കാന്‍ ഇടയാകുന്നത്. ആ സമയത്ത് ചിറകിലെ തൂവലുകള്‍ തമ്മില്‍ ഉരസി ഒരു പ്രത്യേക സംഗീത താളം ഉയര്‍ത്തുകയും ചെയ്യുമത്രേ. 90ഡിഗ്രിയില്‍ പെണ്‍ പക്ഷിയുടെ ദിശയിലേക്ക് ചരിച്ചു പിടിക്കുന്നത് വാല്‍ ചിറകിലെ പകുതി തൂവലുകള്‍ മാത്രമാണ്. എന്തുകൊണ്ടാണ് ചിറക് പൂര്‍ണ്ണമായും 90 ഡിഗ്രിയിലേക്ക് തിരിക്കാതിരിക്കുന്നതെന്ന് മനസ്സിലാക്കാന്‍ കഴിഞ്ഞിട്ടില്ലെന്നാണ് ശാസ്ത്രകാരന്മാര്‍ പറയുന്നത്. ചിലപ്പോള്‍ അതിന്റെ ശരീരഘടനയിലെ പരിമിതികള്‍ ആയിരിക്കാം അതിനു കാരണമെന്നാണ് ഗവേഷകര്‍ കരുതുന്നത്.

ഇപ്രകാരം തങ്ങള്‍ക്ക് എത്ര വേഗതയുണ്ടെന്ന് പെണ്‍ പക്ഷികള്‍ കൃത്യമായി മനസ്സിലാക്കാതിരുന്നാല്‍ വേഗം കുറഞ്ഞവരെ ഒഴിവാക്കാന്‍ അവയ്ക്ക് ബുദ്ധിമുട്ട് വരുമെന്നും അങ്ങനെ കൂടുതല്‍ ആണ്‍പക്ഷികള്‍ക്ക് ഇണയെ കിട്ടാനുള്ള സാധ്യത ഉണ്ടാകുമെന്നാണ് ഇവ വിചാരിക്കുന്നതത്രേ.

ഈ നിര്‍ണ്ണയത്തിലെത്തിച്ചേരുന്നതിനായി ഗവേഷകസംഘം ഒരു അകൗസ്്റ്റിക് കാമറ ഉപയോഗിച്ച് ആണ്‍പക്ഷികളുടെ ചാട്ടങ്ങള്‍ നിരീക്ഷിച്ചിരുന്നു. പെണ്‍കിളികളെ ആകര്‍ഷിക്കാന്‍ ആണ്‍കിളികള്‍ കായികാഭ്യാസ പ്രകടനങ്ങള്‍ നടത്തുന്നതായി നേരത്തെയുള്ള പഠനങ്ങളില്‍ കണ്ടെത്തിയതിനെ തുടര്‍ന്നാണ് ഇതിന്റെ ഉദ്ദേശ്യമെന്താണെന്ന് കണ്ടെത്താന്‍ ശ്രമിച്ചത്.