എഞ്ചിനില് പൊട്ടിത്തെറി ഉണ്ടായ സൗത്ത് വെസ്റ്റ് എയര്ലൈന്സ് വിമാനത്തെ സുരക്ഷിതമായി ലാന്ഡ് ചെയ്യിച്ച വനിതാ പൈലറ്റിന് അഭിനന്ദനപ്രവാഹം
ന്യൂയോര്ക്കിലെ ലാ ഗാര്ഡിയ എയര്പോര്ട്ടില് നിന്നും ഡാലസിലേക്കു പോകയായിരുന്ന ബോയിംഗ് 737-700 വിമാനത്തിന്റെ ഇടതു വശത്തെ എഞ്ചിന് 32,500 അടി ഉയരത്തില് വച്ച് പൊട്ടിത്തെറിച്ചു. ടാമി ജോ ഷുട്സ് എന്ന വനിത ആയിരുന്നു വിമാനം നിയന്ത്രിച്ചിരുന്നത്. അതീവ ഗുരുതരമായ ആ സാഹചര്യത്തിലും മനസാന്നിദ്ധ്യം കൈവിടാതെ അവര് എയര്ട്രാഫിക് കണ്ട്രോളില് വിവരം അറിയിച്ചു.
നമ്മുടെ വിമാനത്തിന്റെ ഒരു ഭാഗം നഷ്ടപ്പെട്ടിരിക്കുന്നു എന്ന്! വിമാനത്തിന് തീ പിടിച്ചിട്ടുണ്ടോ എന്ന ചോദ്യത്തിന് ഇല്ല, തീ പിടിച്ചിട്ടില്ല, ഒരുഭാഗം പൊട്ടിത്തെറിയില് തെറിച്ചു പോയി എന്നറിയിച്ചു. അവിടെ അപ്പോള് ഉണ്ടായ ദ്വാരത്തിലൂടെ യാത്രക്കാരിലൊരാള് പുറത്തേക്ക് തെറിച്ചു പോകാനിടയായെന്നും മറ്റു യാത്രക്കാര് ചേര്ന്ന് അവരെ പിടിച്ച് വലിച്ച് അകത്തേക്കിടുകയായിരുന്നുവെന്നും പറഞ്ഞു.
ഫിലാഡല്ഫിയ ഇന്റര്നാഷണല് എയര്പോര്ട്ടില് രാവിലെ 11.30-ന് എമര്ജന്സി ലാന്ഡിംഗ് അനുവദിക്കണമെന്ന് ആവശ്യപ്പെടുമ്പോള് തന്നെ യാത്രക്കാര്ക്ക് പരിക്കേറ്റിട്ടുണ്ടെന്നും അവര്ക്കു വേണ്ട അടിയന്തിര മെഡിക്കല് സഹായം ലഭ്യമാക്കണമെന്നും ഷുള്ട്സ് അറിയിച്ചു. യുഎസ് നേവിയിലെ ആദ്യകാല വനിതാ പൈലറ്റുമാരില് ഒരാളാണ് ടാമി ജോ ഷുള്ട്സ്. എഫ് -18 യുദ്ധവിമാനങ്ങള് പറപ്പിച്ചിട്ടുള്ള ആദ്യ വനിതയാണ് ഷുള്ട്സ്. അമേരിക്കന് നേവി, വനിതകളെ യുദ്ധത്തില് പങ്കെടുപ്പിക്കില്ലെന്നുള്ളതു കൊണ്ട് പിന്നീട് ഇവര് ഇന്സ്ട്രക്ടറായി മാറുകയായിരുന്നു. ഒടുവില് 1993-ലാണ് നേവിയില് നിന്നും രാജി വച്ച് സൗത്ത് വെസ്റ്റ് എയര്ലൈന്സില് ചേര്ന്നത്. രണ്ടു കുട്ടികളുടെ അമ്മയായ ഷുള്ട്സിന്റെ ഭര്ത്താവ് ഡീനും പൈലറ്റാണ്, ന്യൂമെക്സിക്കോക്കാരിയായ ഷുള്ട്സ് ഭര്ത്താവിനോടും കുട്ടികളുമോടൊപ്പം ഇപ്പോള് ടെക്സസിലാണ് താമസിക്കുന്നത്.
വലിയ ഒരു പൊട്ടിത്തെറിയുടെ ശബ്ദം കേട്ടതിനുശേഷം വിമാനം പെട്ടെന്ന് താഴുന്നതായി അനുഭവപ്പെട്ടെന്നാണ് പ്ലെയിനിന്റെ പുറകുവശത്തുള്ള സീറ്റിലായിരുന്ന ടിമോത്തി ബോര്മന് പിന്നീട് പറഞ്ഞത്. പലരും നിലവിളിക്കാനും കരയാനും തുടങ്ങിയിരുന്നു. ഫ്ലൈറ്റ് അറ്റന്ഡന്റില് ചിലര് പോലും പ്ലെയിനില് ദ്വാരമുണ്ടായിടത്തെത്തി കരഞ്ഞു തുടങ്ങിയിരുന്നു.
അതിനിടയില് ഓക്സിജന് മാസ്ക് ധരിക്കുന്നതിനിടയില് മാര്ട്ടി മാര്ട്ടിനെസ് എന്ന യാത്രക്കാരന് ഫെയ്സ്ബുക്ക് ലൈവിലെത്തി. പ്ലെയിനിന് എന്തോ തകരാര് ഉണ്ടായിട്ടുണ്ട്. നാമെല്ലാം നിലംപതിക്കാന് പോവുകയാണ് എന്നാണ് തോന്നുന്നത് എന്നറിയിച്ചു. പ്ലെയിന് താഴേക്കു വന്നു കൊണ്ടിരിക്കുന്നതിനിടയില് എല്ലാവരോടും അവസാനമായി ഗുഡ്ബൈ പറയാനായി വൈ ഫൈ കണക്ഷന് ലഭിക്കാനായി 8 ഡോളറും മാര്ട്ടി മാര്ട്ടിനെസ് കൊടുത്തുവത്രേ!
ടെക്സസില് നിന്നുള്ള യാത്രക്കാരനായ ആല്ഫ്രഡ് ടും ലിന്സണ് പറയുന്നത്, പൈലറ്റ് ഷുള്ട്സിന്റേത് ഉരുക്കിന്റെ ശക്തിയുള്ള മനധൈര്യമാണ്. ഞാനവര്ക്ക് ക്രിസ്തുമസ് കാര്ഡ് അയയ്ക്കും. എന്നെ സുരക്ഷിതമായി നിലത്തെത്തിച്ചതിന് നന്ദി അറിയിക്കും. അവര് ചെയ്തത് അതിശയകരമായ കാര്യമാണ് എന്നാണ്. ഷുള്ട്സ് യഥാര്ത്ഥ അമേരിക്കന് ഹീറോയാണ്. അവരുടെ അറിവിനും മാര്ഗ്ഗ നിര്ദ്ദേശങ്ങള്ക്കും ധൈര്യത്തിനുമൊക്കെ ഒരു വലിയ നന്ദി അറിയിക്കുന്നു . അവരേയും ക്രൂവിനേയും ദൈവം അനുഗ്രഹിക്കട്ടെ എന്നാണ് ഡയാന മക്ബേര്ഡ് എന്ന യാത്രിക പിന്നീട് എഴുതിയത്.
പ്ലെയിന് ലാന്ഡ് ചെയ്തതിനുശേഷം ഓരോ യാത്രക്കാരന്റേയും അരികിലെത്തി ഷുള്ട്സ് ആശ്വസിപ്പിച്ചുവെന്നും അവര് പറഞ്ഞു. അപകടത്തില് 12 പേര്ക്ക് പരിക്കേറ്റിരുന്നു. ജനാലയിലൂടെ പുറത്തേക്ക് വലിച്ചെടുക്കപ്പെട്ട റിയോര്ഡര് എന്ന വനിതയെ ആശുപത്രിയില് എത്തിച്ച് ചികിത്സ നല്കിയെങ്കിലും പിന്നീട് മരണപ്പെട്ടതായി എയര്ലൈന് അധികൃതര് അറിയിച്ചു.
https://www.facebook.com/Malayalivartha