വൈദ്യുത ഗണ് ഉപയോഗിച്ച് വൈദ്യുതാഘാതം ഏല്പിച്ച് യുവാവിനെ കൊലപ്പെടുത്തിയതിന് പോലീസ് ഓഫീസര്മാര്ക്ക് എതിരെ അച്ചടക്ക നടപടി ഉണ്ടാവില്ലെന്ന് അധികൃതര്
മാനസിക ആരോഗ്യം ശരിയല്ലാതിരുന്ന ഒരു യുവാവിനെ, അവന്റെ അപ്പാര്ട്മെന്റിലെ ഷവറിനു കീഴില് നഗ്നനായി നില്ക്കുമ്പോള് വിസ്കോണ്സിന് പോലീസ് ഉദ്യോഗസ്ഥര് ടേസര് ഗണ് ഉപയോഗിച്ച് 18 തവണ വൈദ്യുതാഘാതം എല്പിക്കുന്നതിന്റെ വീഡിയോ ദൃശ്യങ്ങള് പുറത്തു വന്നു.
വാതിലില് തട്ടി വിളിച്ചതിനു ശേഷവും യാതൊരു പ്രതികരണവും ലഭിയ്ക്കാതിരുന്നതിനെ തുടര്ന്ന് 22-കാരനായ ആദം ട്രാമ്മേലിന്റെ അപ്പാര്ട്മെന്റിലേയ്ക്ക് 3 മില്വാകീ പോലീസ് ഉദ്യോഗസ്ഥര് ബലം പ്രയോഗിച്ച് കയറുന്നതിന്റെ വീഡിയോ ദൃശ്യങ്ങള് അവരുടെ ബോഡി ക്യാമില് നിന്ന് ലഭിച്ചു. 2017 മേയ് 25-ന് നടന്ന സംഭവങ്ങളുടെ ദൃശ്യങ്ങളാണ് ഇപ്പോള് പുറത്തു വിട്ടിരിയ്ക്കുന്നത്.
ട്രാംവെല്ലിന്റെ അയല്ക്കാരിലൊരാള്, അടിയന്തിര ഘട്ടങ്ങളില് സഹായം അഭ്യര്ഥിച്ചു വിളിയ്ക്കുന്ന നമ്പര് ആയ 9-1 -1 ലേക്ക് വിളിച്ചു പറഞ്ഞതിനെ തുടര്ന്നായിരുന്നു അവിടേയ്ക്ക് പോലീസ് എത്തിയത്. അവരുടെ അപാര്ട്മെന്റ് സമുച്ചയത്തിലെ ഹാള്വേയില് അവിടെയുള്ള ബ്രാന്ഡണ് എന്നൊരാള് പൂര്ണ നഗ്നനായി നില്ക്കുന്നുവെന്നും എന്തോ മാനസിക പ്രശ്നമുള്ളതു പോലെ തോന്നുന്നുവെന്നും അവന് അവനെ തന്നെ അപകടപ്പെടുത്താന് സാധ്യത ഉള്ളതിനാല് പെട്ടെന്ന് വരണമെന്നുമാണ് അയല്വാസി പോലീസിനോട് പറഞ്ഞത്.
കതകു തള്ളിത്തുറന്ന് കയറിയ പോലീസുദ്യോഗസ്ഥര് കണ്ടത്, ബാത്റൂമിലെ ഷവറിനു താഴെ പൂര്ണ നഗ്നനായി നില്ക്കുന്ന ട്രാംവെല്ലിനെയാണ്. കൈയ്യില് എന്താണുള്ളത് എന്ന് കൈ കാണിയ്ക്കൂ, പുറത്തേയ്ക്കിറങ്ങി വരൂ എന്നൊക്കെ പോലീസ് അവനോടു ആവശ്യപ്പെടുന്നുണ്ടെങ്കിലും ഒരു ഭാവഭേദവുമില്ലാതെ പോലീസിനെ നോക്കി നില്ക്കുന്ന ട്രാംവെല്ലിനെയാണ് ദൃശ്യങ്ങളില് കാണുന്നത്. തുടര്ന്നാണ് മൈക്കേല് റോഹിന്ഡര് , അന്തോണി മുനോസ് എന്നീ ഓഫീസര്മാര് വൈദ്യുത ഗണ് ഉപയോഗിച്ച് ടേസ് ചെയ്യാന് പോകയാണ് എന്നറിയിക്കുന്നത്. പുറത്തേയ്ക്കിറങ്ങി വരൂ, അല്ലെങ്കില് വൈദ്യതാഘാതമേല്പ്പിക്കും എന്ന് അവര് വീണ്ടും മുന്നറിയിപ്പ് നല്കുന്നു. ട്രാംവെല്ലിനെ ബ്രാന്ഡന് എന്നാണ് പോലീസുദ്യോഗസ്ഥര് വിളിയ്ക്കുന്നത്. കാരണം ഫോണ് ചെയ്ത അയല്വാസി പറഞ്ഞ പേര് അങ്ങനെയായിരുന്നു.
പോലീസുദ്യോഗസ്ഥരുടെ നിര്ദേശങ്ങളോടൊന്നും പ്രതികരിയ്ക്കാത്ത ട്രാംവെല്ലിനു നേര്ക്ക് ഒരു ഓഫിസര് വൈദ്യുതഗണ് ഉപയോഗിയ്ക്കുന്നു. ആദ്യ വൈദ്യുതാഘാതമേറ്റ ഉടന് തന്നെ അവന് ബാത്ടബിലേയ്ക്ക് മലര്ന്നു കിടന്ന് അതിവേദനയോടെ നിലവിളിയ്ക്കാന് തുടങ്ങി.
എന്നാല് അവര്ക്കു നേരെ ബലപ്രയോഗം നടത്താന് അവന് തുനിഞ്ഞതിനാല് വീണ്ടും വീണ്ടും അവനെതിരെ അവര് വൈദ്യുത ഗണ് ഉപയോഗിയ്ക്കുന്നതായി ദൃശ്യങ്ങളില് നിന്നും വ്യക്തമാകുന്നുണ്ട്.അടുത്തുള്ള മറ്റൊരു പോലീസ് സ്റ്റേഷനില് നിന്നും കൂടുതല് പോലീസുകാരും പാരാമെഡിക് സ്റ്റാഫും എത്തിയപ്പോഴേയ്ക്കും ട്രാംവെല് ബോധരഹിതനായി കഴിഞ്ഞിരുന്നു.അവനെ അടുത്തുള്ള ആശുപത്രിയില് എത്തിച്ചപ്പോഴേയ്ക്കും ആദ്യ വൈദ്യുതാഘാതം കിട്ടിയതിനു ശേഷം 30 മിനിറ്റ് കഴിഞ്ഞിരുന്നു.അവിടെ വച്ച് ഡോക്ടര്മാര് പരിശോധിച്ചിട്ട് അവന് മരിച്ചതായി അറിയി്ക്കുകയായിരുന്നു.അപ്പോഴേക്കും 18 തവണ അവനു നേര്ക്ക് ടേസര് ഗണ് പ്രയോഗിച്ചിരുന്നു.
പ്രസ്തുത സംഭവത്തില് ഉള്പ്പെട്ട ഉദ്യോഗസ്ഥര്ക്കെര്ക്കെതിരെ നിയമനടപടികള് ഉണ്ടാവില്ലെന്ന് മില്വാകീ കൗണ്ടി ഡിസ്ട്രിക്ട് അറ്റോര്ണി ജോണ് ക്രിഷോം അറിയിച്ചു. ഉദ്യോഗസ്ഥര് ഒരു നിയമലംഘനവും നടത്തിയിട്ടില്ലെന്നും ട്രാംവെല്ലിന്റെ പോസ്റ്റ്മോര്ട്ടം റിപ്പോട്ടില് മരണകാരണം എക്സൈറ്റഡ് ഡെലീറിയം എന്നാണ് രേഖപ്പെടുത്തിയിരിയ്ക്കുന്നതെന്നും അതിന് ഉദ്യോഗസ്ഥരുടെ ചെയ്തികളുമായി ഒരു ബന്ധവും ഇല്ലെന്നും അദ്ദേഹം പറഞ്ഞു.
എന്നാല് ട്രാംവെല്ലിന്റെ കുടുംബം ഈ കണ്ടെത്തലിനോട് അമര്ഷത്തോടെയാണ് പ്രതികരിച്ചത്. ട്രാംവെല്ലിന് 'ഓപ്പോസിഷനല് ഡിഫിയന്റ് ഡിസോര്ഡര് ' എന്ന മാനസിക പ്രശ്നവും ഷൈസോഫ്രീനിയയും, ബൈ പോളാര് രോഗവും ഉണ്ടായിരുന്നതായാണ് കുടുംബം വിചാരിയ്ക്കുന്നത്. എന്നാല് അവന് എന്ത് മരുന്നുകളാണ് ഉപയോഗിച്ചിരുന്നതെന്നോ അവന് യഥാര്ത്ഥത്തില് രോഗിയായിരുന്നുവോ എന്നോ ഉറപ്പിച്ചു പറയാന് കുടുംബാംഗങ്ങള്ക്കു പോലും കഴിയുന്നില്ല.
രണ്ടു വര്ഷത്തിന് മുന്പൊരു ദിവസം പൊതുസ്ഥലത്തു നഗ്നനായി ഓടിയതിന് പോലീസ് അവനു നേര്ക്ക് ടേസര് ഗണ് ഉപയോഗിച്ചിരുന്നുവെന്നാണ് കുടുംബം പറയുന്നത്. ഇത്തവണ അവനെ ആശുപത്രിയില് എത്തിച്ച ഉടനെ അവനെ കണ്ട ഒരു ഡോക്ടര് പറഞ്ഞത്, വീട് വൃത്തിയാക്കാന് ഉപയോഗി്ക്കുന്ന എന്തോ മരുന്ന് അവന് ശ്വസിച്ചിട്ടുണ്ടെന്ന് തോന്നുന്നു എന്നായിരുന്നുവത്രെ.
https://www.facebook.com/Malayalivartha