ബൗണ്ടറിയെണ്ണുന്ന പരിപാടി: വിവാദ നിയമം ഇനി മുതല് ഐസിസി ടൂര്ണമെന്റുകളില് ഉപയോഗിക്കില്ലെന്ന് ഐ സി സി
ഇക്കഴിഞ്ഞ ഏകദിന ലോകകപ്പില് ഏറ്റവും കൂടുതല് വിമര്ശനങ്ങള് ക്ഷണിച്ചുവരുത്തിയ വിവാദ നിയമം ഒടുവില് രാജ്യാന്തര ക്രിക്കറ്റ് കൗണ്സില് (ഐസിസി) പിന്വലിച്ചു. മത്സരത്തിലും പിന്നീട് സൂപ്പര് ഓവറിലും വിജയികളെ കണ്ടെത്താനാകാതെ വന്നാല്, ഏറ്റവും കൂടുതല് ബൗണ്ടറികള് നേടിയ ടീമിനെ വിജയിയായി പ്രഖ്യാപിക്കുന്ന നിയമമാണ് ഐസിസി പിന്വലിച്ചത്. ഇനിയിപ്പോള് ഒരു ടീം വിജയിക്കുന്നതുവരെ സൂപ്പര് ഓവര് തുടരാനാണ് തീരുമാനം.
ലോകകപ്പ് ഫൈനലില് ആതിഥേയരായ ഇംഗ്ലണ്ടിനെതിരെ ന്യൂസീലന്ഡിന്റെ തോല്വിയിലേക്കു നയിച്ചത് ഈ വിവാദ നിയമമായിരുന്നു. ബൗണ്ടറികളുടെ എണ്ണമെടുത്ത് ലോകകപ്പ് ജേതാക്കളെ നിശ്ചയിച്ച രീതിക്കെതിരെ മുന് താരങ്ങളും ആരാധകരുമെല്ലാം കൂട്ടത്തോടെ രംഗത്തുവന്നിരുന്നു. ബൗണ്ടറി നിയമം പിന്വലിച്ചതിനു പിന്നാലെ രൂക്ഷ പരിഹാസവുമായി ആ നിയമത്തിന്റെ 'ഇരകളായ' ന്യൂസീലന്ഡ് താരങ്ങള് രംഗത്തെത്തി. ലോകകപ്പ് ടീമില് അംഗമായിരുന്ന ജിമ്മി നീഷം, മുന് താരം ക്രെയ്ഗ് മക്മില്ലന് തുടങ്ങിയവരാണ് വിമര്ശനവുമായി എത്തിയത്.
'അടുത്ത അജന്ഡ: ടൈറ്റാനിക്കില് ഐസ് മലകള് കണ്ടെത്താനുള്ള ദൗത്യം നിര്വഹിക്കുന്നവര്ക്ക് കൂടുതല് മികച്ച ബൈനോക്കുലറുകള്' - ന്യൂസീലന്ഡിന്റെ ലോകകപ്പ് ടീമില് അംഗമായിരുന്ന ജിമ്മി നീഷം കുറിച്ചത് ഇങ്ങനെയാണ്. നിയമം പിന്വലിച്ച വാര്ത്ത പങ്കുവച്ചാണ് ട്വിറ്ററിലൂടെ നീഷത്തിന്റെ രൂക്ഷ പരിഹാസം. ന്യൂസീലന്ഡ് മുന് താരം ക്രെയ്ഗ് മക്മില്ലനും വിമര്ശനവുമായെത്തി. 'അല്പം വൈകിപ്പോയി, ഐസിസി' എന്നായിരുന്നു മക്മില്ലന്റെ പ്രതികരണം.
ഇക്കഴിഞ്ഞ ജൂലൈ 14-ന് വിഖ്യാതമായ ലോര്ഡ്സ് സ്റ്റേഡിയത്തില് നടന്ന ലോകകപ്പ് കലാശപ്പോരാട്ടത്തിലാണ് വിവാദ നിയമത്തിലൂടെ ജേതാക്കളെ നിശ്ചയിച്ചത്. മത്സരത്തില് ആദ്യം ബാറ്റു ചെയ്ത ന്യൂസീലന്ഡ് 242 റണ്സാണെടുത്തത്. മറുപടി ബാറ്റിങ്ങില് ആതിഥേയരായ ഇംഗ്ലണ്ട് തകര്ന്നെങ്കിലും ബെന് സ്റ്റോക്സിന്റെ ഇന്നിങ്സിന്റെ കരുത്തില് അവരും 242 റണ്സെടുത്തു.
ഇതോടെ, വിജയികളെ കണ്ടെത്താന് സൂപ്പര് ഓവര് ഉപയോഗിക്കുകയായിരുന്നു. നിയമമനുസരിച്ച് സൂപ്പര് ഓവറില് ആദ്യം ബാറ്റു ചെയ്ത ഇംഗ്ലണ്ട് നേടിയത് 15 റണ്സ്. ന്യൂസീലന്ഡിന്റെ മറുപടിയും 15 റണ്സില് ഒതുങ്ങിയതോടെയാണ് വിജയികളെ കണ്ടെത്താന് ബൗണ്ടറിയെണ്ണിയത്. ഇതനുസരിച്ച് മത്സരത്തിലാകെ 22 ബൗണ്ടറി (ഫോറും സിക്സും ഉള്പ്പെടെ) നേടിയ ഇംഗ്ലണ്ട് വിജയികളായി. ന്യൂസീലന്ഡ് മത്സരത്തിലാകെ നേടിയത് 17 ബൗണ്ടറികള് മാത്രം. ഇതോടെ, ക്രിക്കറ്റ് ചരിത്രത്തിലാദ്യമായി ഇംഗ്ലണ്ടിന് ലോകകപ്പും കിട്ടി.
എന്നാല്, കടുത്ത വിമര്ശനം ക്ഷണിച്ചുവരുത്തിയ വിവാദ നിയമത്തിന് വിജയികളായ ഇംഗ്ലണ്ടില്നിന്നു പോലും പിന്തുണ ലഭിച്ചില്ല. മുന് താരങ്ങളും ക്രിക്കറ്റ് കമന്റേറ്റര്മാരും ഉള്പ്പെടെയുള്ളവര് വിമര്ശനവുമായെത്തി. ഇതോടെയാണ് നിയമം പുനഃപരിശോധിക്കാന് ഐസിസി തീരുമാനിച്ചത്. ഇതനുസരിച്ച് വിവാദ നിയമം ഇനി മുതല് ഐസിസി ടൂര്ണമെന്റുകളില് ഉപയോഗിക്കേണ്ടതില്ലെന്ന് തീരുമാനിക്കുകയായിരുന്നു.
https://www.facebook.com/Malayalivartha