സൂപ്പര്‍ കിങ്‌സിന് സീസണിലെ തങ്ങളുടെ മൂന്നാം മത്സരത്തില്‍ ഡല്‍ഹി ക്യാപിറ്റല്‍സിനെതിരെ 44 റണ്‍സിന്റെ തോല്‍വി. ചെന്നൈയുടെ തുടര്‍ച്ചയായ രണ്ടാം തോല്‍വിയാണിത്. കഴിഞ്ഞ മത്സരത്തില്‍ രാജസ്ഥാന്‍ റോയല്‍സിനെതിരെയും തോല്‍വി ഏറ്റുവാങ്ങിയിരുന്നു. ഡല്‍ഹി തങ്ങളുടെ ആദ്യ മത്സരത്തില്‍ സൂപ്പര്‍ ഓവറിലൂടെ പഞ്ചാബിനെതിരെ വിജയിച്ചിരുന്നു.

വെള്ളിയാഴ്ച, 176 റണ്‍സ് പിന്തുടര്‍ന്ന ചെന്നൈയുടെ ഇന്നിങ്‌സ് 131 റണ്‍സില്‍ അവസാനിക്കുകയായിരുന്നു. സ്‌കോര്‍: ഡല്‍ഹി 20 ഓവറില്‍ 3 വിക്കറ്റ് നഷ്ടത്തില്‍ 176, ചെന്നൈ 7 വിക്കറ്റ് നഷ്ടത്തില്‍ 131.

ടോസ് ലഭിച്ച ചെന്നൈ ഡല്‍ഹിയെ ബാറ്റിങ്ങിന് അയക്കുകയായിരുന്നു. ഓപ്പണിങ് ബാറ്റ്‌സ്മാന്‍ പൃഥ്വി ഷായുടെ അര്‍ധസെഞ്ചുറിയുടെ കരുത്തില്‍ ചെന്നൈ സൂപ്പര്‍ കിങ്‌സിനെതിരെ നിശ്ചിത 20 ഓവറില്‍ ഡല്‍ഹി 3 വിക്കറ്റ് നഷ്ടത്തില്‍ 175 റണ്‍സെടുത്തു. മികച്ച തുടക്കമാണ് ഡല്‍ഹിക്ക് ലഭിച്ചത്. ഒന്നാം വിക്കറ്റില്‍ പൃഥ്വി ഷായും (43 പന്തില്‍ 64) ശിഖര്‍ ധവാനും (27 പന്തില്‍ 35) ചേര്‍ന്ന് 94 റണ്‍സാണ് കൂട്ടിച്ചേര്‍ത്തത്.

പീയുഷ് ചൗളയാണ് 11 -ാം ഓവറിന്റെ നാലാം പന്തില്‍ ശിഖര്‍ ധവാനെ വിക്കറ്റിനു മുന്നില്‍ കുടുക്കി കൂട്ടുകെട്ട് പൊളിച്ചത്. തന്റെ അടുത്ത ഓവറില്‍ പൃഥ്വി ഷായെയും ചൗള പുറത്താക്കി. ചൗളയുടെ ഫ്‌ലാറ്റര്‍ ഡെലിവറി, ഇറങ്ങി കളിക്കാന്‍ ശ്രമിച്ച ഷായെ വിക്കറ്റ് കീപ്പര്‍ ധോണി ഉജ്വല സ്റ്റംപിങ്ങിലൂടെ പുറത്താക്കുകയായിരുന്നു. അപ്പോള്‍ ഡല്‍ഹിയുടെ സ്‌കോര്‍ 103/2. പിന്നീട് ഋഷഭ് പന്ത് ( 25 പന്തില്‍ പുറത്താകെ 37), നായകന്‍ ശ്രേയസ് അയ്യര്‍ ( 22 പന്തില്‍ 26) എന്നിവര്‍ ഡല്‍ഹി ഇന്നിങ്‌സിനെ തോളിലേറ്റി. മൂന്നാം വിക്കറ്റില്‍ ഇരുവരും ചേര്‍ന്ന് 58 റണ്‍സ് കൂട്ടിചേര്‍ത്തു. 19-ാം ഓവറില്‍ സാം കറന്‍ അയ്യരെ ധോണിയുടെ കൈകകളില്‍ എത്തിച്ചു. മാര്‍ക്കസ് സ്റ്റോയ്‌നിസ് മൂന്നു പന്തില്‍ അഞ്ച് റണ്‍സ് നേടി പുറത്താകാതെ നിന്നു.

ചെന്നൈ നിരയില്‍ ഓപ്പണര്‍മാരായ മുരളി വിജയ് (15 റണ്‍സില്‍ 10), ഷെയ്ന്‍ വാട്‌സന്‍ (16 പന്തില്‍ 14) എന്നിവര്‍ ഒന്നാം വിക്കറ്റില്‍ 23 റണ്‍സ് മാത്രമാണ് കൂട്ടിച്ചേര്‍ത്തത്. അഞ്ചാം ഓവറില്‍ അക്‌സര്‍ പട്ടേല്‍ വാട്‌സനെ ഹെറ്റ്മയറിന്റെ കൈകളില്‍ എത്തിച്ചു. ഫാഫ് ഡുപ്ലെസി (35 പന്തില്‍ 43) മാത്രമാണ് പൊരുതിയത്. ആറാം ഓവറില്‍ മുരളി വിജയിയെ ആന്റിച്ച് നോര്‍ജെ പുറത്താക്കുകയായിരുന്നു.

ഋതുരാജ് ഗെയ്ക്ക്വാദിന് തന്റെ രണ്ടാമത്തെ അവസരവും മുതലാക്കാനായില്ല. 10-ാം ഓവറില്‍ കീപ്പര്‍ ഋഷഭ് പന്തിന്റെ ത്രോയില്‍ അക്‌സര്‍ പട്ടേല്‍ അരങ്ങേറ്റ മല്‍സരത്തില്‍ നിറം മങ്ങിയ ഗെയ്ക്ക്വാദിനെ റണ്ണൗട്ട് ആക്കുകയായിരുന്നു. പിന്നീട് എത്തിയ, കേദാര്‍ യാദവ് (21 പന്തില്‍ 26), എം.എസ്.ധോണി ( 12 പന്തില്‍ 15), രവീന്ദ്ര ജഡേജ (9 പന്തില്‍ 12) എന്നിവര്‍ക്ക് കാര്യമായി ഒന്നും ചെയ്യാനായില്ല. രണ്ടു പന്തില്‍ ഒരു റണ്‍സെടുത്ത് സാം കറന്‍ പുറത്താകാതെ നിന്നു.