പ്രധാനമന്ത്രിയുടെ സെല്‍ഫി വിഡിയോ വന്ന് 24 മണിക്കൂറിനകം നരേന്ദ്ര മോദിയുടെ ഇന്‍സ്റ്റഗ്രാമില്‍ പത്ത് ലക്ഷം ഫോളോവേഴ്‌സ് കൂടി. വ്യാഴാഴ്ച രാത്രി 11.52നാണ് നീറ്റ് ചോദ്യപ്പേപ്പര്‍ ചോര്‍ച്ചയുമായി ബന്ധപ്പെട്ടു സമരം ചെയ്യുന്ന വിദ്യാര്‍ഥികളെ അഭിസംബോധന ചെയ്തുകൊണ്ടുള്ള വിഡിയോ പുറത്തുവന്നത്. നിലവില്‍ ഇന്‍സ്റ്റഗ്രാമില്‍ പ്രധാനമന്ത്രി നരേന്ദ്രമോദിക്ക് 102 ദശലക്ഷം ഫോളോവേഴ്‌സ് ഉണ്ട്.

വ്യാഴാഴ്ചയിലെ വിഡിയോ വിജയമായതോടെയാണ് അതിനു നന്ദി പറയാന്‍ അടുത്ത ദിവസവും രാത്രി പ്രധാനമന്ത്രി സമൂഹമാധ്യമങ്ങളില്‍ എത്തിയത്. രാത്രിയില്‍ പതിനൊന്ന് മണിക്ക് ശേഷമാണ് രണ്ടാമത്തെ ദിവസവും പ്രധാനമന്ത്രി ലഘുവിഡിയോയുമായി എത്തിയത്.

'നന്ദി സുഹൃത്തുക്കളേ. ഇന്നലെ രാത്രിയാണ് നിങ്ങളെ കാണാന്‍ എനിക്ക് അവസരം ലഭിച്ചത്. വീഡിയോയോട് നിങ്ങള്‍ പ്രതികരിച്ച രീതി, നല്ല നിര്‍ദേശങ്ങള്‍ അയച്ച എല്ലാവര്‍ക്കും നന്ദി,' പ്രധാനമന്ത്രി ഇന്‍സ്റ്റഗ്രാമില്‍ പറഞ്ഞു. ഒപ്പം വിഡിയോയുടെ അവസാന ഭാഗത്ത് 'എന്നോടുള്ള നിങ്ങളുടെ സ്‌നേഹം നിലനില്‍ക്കും, ഞങ്ങളുടെ ബന്ധം കൂടുതല്‍ ശക്തമാകും... നന്ദി സുഹൃത്തുക്കളേ,' എന്നും പ്രധാനമന്ത്രി കൂട്ടിച്ചേര്‍ത്തു.

'നാളത്തെ മന്ത്രിസഭയില്‍ ചോദ്യപ്പേപ്പര്‍ ചോര്‍ച്ചയ്‌ക്കെതിരെ കൂടുതല്‍ കര്‍ശന നടപടികള്‍ ഉണ്ടാകും' എന്ന തലക്കെട്ടിലാണ് മോദിയുടെ ആദ്യ വിഡിയോ പോസ്റ്റ് ചെയ്തത്. 'പേപ്പര്‍ ചോര്‍ച്ച സംഭവത്തിന് ശേഷം കഴിഞ്ഞ രണ്ടര മാസത്തിനുള്ളില്‍ നിരവധി ഫലപ്രദമായ നടപടികള്‍ സ്വീകരിച്ചിട്ടുണ്ട്. കുറ്റവാളികളെ പിടികൂടി ജയിലിലടച്ചിട്ടുണ്ട്. വിദ്യാര്‍ഥികളുടെ ഒരു വര്‍ഷം പാഴാകുന്നില്ലെന്ന് ഉറപ്പാക്കുക എന്നതായിരുന്നു ഞങ്ങളുടെ ഏറ്റവും പ്രധാനപ്പെട്ട ഉത്തരവാദിത്തം. 22 ലക്ഷം വിദ്യാര്‍ഥികള്‍ക്ക് ഏറ്റവും കുറഞ്ഞ സമയത്തിനുള്ളില്‍ പരീക്ഷ എഴുതാന്‍ കഴിയുമെന്ന് ഉറപ്പാക്കാന്‍ സര്‍ക്കാര്‍ എല്ലാ ശക്തിയും ഉപയോഗിച്ചു,' ഇങ്ങനെയാണ് വിഡിയോയില്‍ മോദി സംസാരിച്ചത്. ഫ്രണ്ട് ക്യാമറയില്‍ ചിത്രീകരിച്ച സെല്‍ഫി വിഡിയോയിലൂടെ ജനങ്ങളുമായി പ്രധാനമന്ത്രി സംവദിക്കുന്നത് ആദ്യമായാണ്.

ഈ വിഡിയോ ഇതുവരെ 271 ദശലക്ഷം ആളുകള്‍ കണ്ടു. 1.3 ദശലക്ഷം പേരാണ് വിഡിയോയ്ക്ക് കമന്റുകള്‍ രേഖപ്പെടുത്തിയത്. വിഡിയോയില്‍ പറഞ്ഞതുപോലെ കര്‍ശനമായ നിലപാടുകളാണ് സര്‍ക്കാര്‍ സ്വീകരിച്ചത്. പേപ്പര്‍ ചോര്‍ച്ചയ്ക്ക് കടുത്ത ശിക്ഷ നല്‍കുന്ന നിയമം പാസാക്കാനും തീരുമാനിച്ചു. പുതുക്കിയ നിയമം 10 വര്‍ഷം വരെ തടവും 10 കോടി രൂപ വരെ പിഴയും നിര്‍ദേശിക്കുന്നുണ്ടെന്നും കുറഞ്ഞ തടവ് ശിക്ഷ മൂന്ന് വര്‍ഷത്തില്‍ നിന്ന് അഞ്ച് വര്‍ഷമായി ഉയര്‍ത്തുമെന്നും വൃത്തങ്ങള്‍ പറഞ്ഞു.