പണമൊഴുകുന്ന ​കായിക വിനോദമാണ്​ ക്രിക്കറ്റ്​. പക്ഷെ ക്രിക്കറ്റ്​ കളിച്ച്‌​ കൂടുതല്‍ പണം വാരുന്നത്​ പുരുഷന്‍മാരാണ്​. ക്രിക്കറ്റിലേക്ക്​ വനിതകള്‍ കടന്ന്​ വന്നിട്ട്​ കാലങ്ങളായെങ്കിലും മുഖ്യധാരയില്‍ അവര്‍ക്കുള്ള പ്രാധിനിധ്യം കുറവായിരുന്നു. വനിതാ താരങ്ങള്‍ക്ക്​ ലഭിക്കുന്ന പ്രതിഫലമാകട്ടെ പുരുഷന്‍മാരുടെ നാലിലൊന്നും.

ഐ .സി.സിയുടെ പുതിയ നീക്കം ചരിത്രപരമാകുന്നത്​ ഇവിടെയാണ്​. ആസ്​ത്രേലിയയില്‍ 2020ല്‍ നടക്കുന്ന വനിതകളുടെയും പുരുഷന്‍മാരുടെയും ട്വന്‍റി20 ലോകകപ്പി​​ന്റെ സമ്മാനത്തുകയാണ്​ തുല്യമായി നല്‍കുക. ​ഐ .സി.സിയുടെ തീരുമാനം വലിയ കയ്യടിയോടെയാണ് കായിക​ ലോകം സ്വീകരിച്ചത്​. സമ്മാനത്തുക എത്രയാണെന്ന്​ തീരുമാനിച്ചിട്ടില്ല.

2020 ഫെബ്രുവരി 21നാണ്​ വനിതാ ട്വന്‍റി20 ലോകകപ്പ് നടക്കുക​. വനിതാ ദിനമായ മാര്‍ച്ച്‌​ എട്ടിനാണ്​ ഫൈനല്‍. ഒക്​ടോബര്‍ 18 മുതല്‍ പുരുഷന്‍മാരുടെ ലോകകപ്പും നടക്കും. ഫൈനല്‍ നവംബര്‍ 25നും. ഇരുവിഭാഗങ്ങളുടെയും ഫൈനല്‍ മാച്ചുകള്‍ നടക്കുക മെല്‍ബണ്‍ ക്രിക്കറ്റ്​ ഗ്രൗണ്ടിലായിരിക്കും.