ഗ്രീന്‍ഫീല്‍ഡ് സ്റ്റേഡിയത്തില്‍ തുടരെ രണ്ടാം പോരാട്ടമാണ് ഇന്ത്യന്‍ വനിതകള്‍ വിജയം കരസ്ഥമാക്കുന്നത്. ഇതോടെ അഞ്ച് മത്സരങ്ങളടങ്ങിയ പരമ്പരയില്‍ ഇന്ത്യ 4-0ത്തിനു മുന്നില്‍. ഗ്രീന്‍ഫീല്‍ഡില്‍ ശ്രീലങ്കന്‍ വനിതകള്‍ക്ക് മുന്നില്‍ റെക്കോര്‍ഡ് സ്‌കോറുയര്‍ത്തിയാണ് ഇന്ത്യ ജയിച്ചു കയറിയത്. ടോസ് നേടി ശ്രീലങ്ക ആദ്യം ബൗള്‍ ചെയ്യാനായി തീരുമാനിക്കുകയായിരുന്നു. നിശ്ചിത ഓവറില്‍ ഇന്ത്യ 2 വിക്കറ്റ് മാത്രം നഷ്ടത്തില്‍ ബോര്‍ഡില്‍ ചേര്‍ത്തത് 221 റണ്‍സ്.

രാജ്യാന്തര വനിതാ ടി20യില്‍ ഇന്ത്യയുടെ ഏറ്റവും വലിയ ടോട്ടലെന്ന റെക്കോര്‍ഡും ഈ സ്‌കോര്‍ സ്വന്തമാക്കി. മറുപടി പറഞ്ഞ ശ്രീലങ്കയുടെ പോരാട്ടം 6 വിക്കറ്റ് നഷ്ടത്തില്‍ 191 റണ്‍സില്‍ അവസാനിക്കുകയും ചെയ്തു. ലങ്കന്‍ വനിതകള്‍ പൊരുതി നോക്കിയെങ്കിലും ജയം നേടാനിയില്ല. 30 റണ്‍സ് ജയമാണ് ഇന്ത്യ സ്വന്തമാക്കിയത്. 222 റണ്‍സെന്ന കൂറ്റന്‍ ലക്ഷ്യത്തിലേക്ക് ബാറ്റെടുത്ത ലങ്കന്‍ വനിതകള്‍ അതിവേഗ തുടക്കവുമായി മുന്നേറിയെങ്കിലും പിന്നീട് റണ്‍സെടുക്കുന്നതില്‍ വേഗം കുറഞ്ഞു.

ക്യാപ്റ്റന്‍ ചമരി അട്ടപ്പട്ടു 37 പന്തില്‍ 3 വീതം സിക്‌സും ഫോറും സഹിതം 52 റണ്‍സെടുത്തു തിരിച്ചടിക്കു നേതൃത്വം നല്‍കിയെങ്കിലും ലക്ഷ്യത്തിലെത്തിയില്ല.

ടോസ് നഷ്ടപ്പെട്ട് ബാറ്റിങിനു ഇറങ്ങിയ ഇന്ത്യയ്ക്കായി ഓപ്പണര്‍മാരായ സ്മൃതി മന്ധാനയും ഷെഫാലി വര്‍മയും ചേര്‍ന്നു സ്വപ്‌നതുല്യ തുടക്കമാണ് നല്‍കിയത്. ചമരി അട്ടപ്പട്ടുവിന്റെ തീരുമാനം തെറ്റായിരുന്നുവെന്നു സ്മൃതിയും ഷെഫാലിയും തെളിയിച്ചു. ഇരുവരും ഒന്നാം വിക്കറ്റില്‍ ബോര്‍ഡില്‍ ചേര്‍ത്തത് 162 റണ്‍സ്. സ്മൃതിയും ഷെഫാലിയും അര്‍ധ സെഞ്ച്വറികള്‍ തികച്ചാണ് കളം വിട്ടത്.തുടരെ രണ്ടാം പോരാട്ടത്തിലാണ് ഷെഫാലി അര്‍ധ സെഞ്ച്വറി കുറിക്കുന്നത്.