വെള്ളം കുടിക്കുമ്പോള് പ്രധാനമായും അറിഞ്ഞിരിക്കേണ്ട കാര്യങ്ങള്
വെള്ളമെന്നത് നമ്മുടെ ശരീരത്തിന് അത്യന്താപേക്ഷികമാണ്. വെള്ളമില്ലാതെ രണ്ടോ മൂന്നോ ദിവസത്തിലധികം ജീവിക്കാന് കഴിയില്ല. സാധാരണ ഒരാളുടെ ശരീരത്തിന്റെ 60-70 ശതമാനം വരെ ജലാംശമാണ്. മസ്തിഷ്കകോശങ്ങളിലാകട്ടെ 80-85 ശതമാനം വരെയുണ്ട് ജലാംശം. രണ്ടു ദിവസത്തിലധികം ജലം കിട്ടാതിരുന്നാല് ശരീരത്തില് നിന്നുള്ള മാലിന്യങ്ങള് കൊണ്ടു തന്നെ നമുക്ക് വിഷബാധയനുഭവപ്പെടും. എന്നാല് എങ്ങനെ, എപ്പോള്, എത്ര മാത്രം വെള്ളം കുടിക്കണമെന്ന് നമ്മളില് പലര്ക്കും അറിയില്ല. വെള്ളം കുടിയില് അറിഞ്ഞിരിക്കേണ്ട ചില കാര്യങ്ങള്.
ആഹാരം കഴിക്കുന്നതിനു മുമ്പാണോ ശേഷമാണോ വെള്ളം കുടിക്കേണ്ടത് എന്നതിനെക്കുറിച്ച് പലരും സംശയം പ്രകടിപ്പിക്കാറുണ്ട്. ആഹാരത്തിനു മുമ്പ് വെള്ളം കുടിച്ചാല് മെലിയും, ആഹാരത്തിനൊപ്പം കുടിച്ചാല് അതേ ശരീരനില തുടരും, ആഹാരത്തിനു ശേഷം കുടിച്ചാല് തടിക്കും എന്നൊരു കാഴ്ചപ്പാട് ആയുര്വേദത്തിലുണ്ട്.
ആഹാരത്തിനു മുമ്പ് വെള്ളം കുടിക്കുമ്പോള് ഭക്ഷണത്തിന്റെ അളവു കുറയും എന്നതാണ് മെലിയാന് കാരണം. കൂടുതല് ഭക്ഷണം കഴിച്ചാല് അതു കഴിഞ്ഞ് കുറച്ചു വെള്ളം കുടിക്കാന് തോന്നും. ഭക്ഷണം നിയന്ത്രിക്കണമെന്നുള്ളവര് ആഹാരത്തിനു മുമ്പ് ഒരു ഗ്ലാസ്സ് വെള്ളം കുടിച്ചു ശീലിക്കുന്നത് നല്ലതാണ്. മിക്കവര്ക്കും ആഹാരത്തിനൊപ്പം സ്വാഭാവികമായും വെള്ളം കുടിക്കേണ്ടി വരാറുണ്ട്. വെള്ളം എപ്പോള് കുടിക്കണമെന്നതിന് നിയമമൊന്നുമില്ല. എപ്പോഴാണോ വെള്ളം കുടിക്കാന് തോന്നുന്നത് അപ്പൊഴൊക്കെ കുടിക്കാം.
പഴയ പല നാടന് ആരോഗ്യസമ്പ്രദായങ്ങളിലും നിര്ദേശിക്കുന്ന ഒന്നാണ് രാവിലെ ഉണര്ന്നാലുടന് ഒരു ഗ്ലാസ്സ് വെള്ളം കുടിക്കുക എന്നത്. ജപ്പാനില് ഇത്തരത്തിലൊരു ജലചികില്സാ രീതി തന്നെയുണ്ട്. രാവിലെ എഴുന്നേറ്റാലുടന് വായും മുഖവും വൃത്തിയാക്കി 650 മില്ലി വെള്ളം കുടിക്കുകയാണ് ഈ ചികില്സാ രീതിയില് പ്രധാനം. ശുദ്ധമായ പച്ചവെള്ളമാണ് കുടിക്കേണ്ടത്.
വെള്ളം കുടിക്കേണ്ടത് എപ്പോഴൊക്കെ?
*ദിവസം മുഴുവന് വെള്ളം അല്പാല്പമായി കുടിച്ചു കൊണ്ടിരിക്കുക. നിര്ജലീകരണം ഒഴിവാക്കാന് ഇതു സഹായിക്കും.
*അതിരാവിലെ ഉറക്കമുണര്ന്നയുടന് തന്നെ രണ്ട് ഗ്ലാസ് വെള്ളം കുടിക്കുക. ശരീരത്തിലുള്ള വിഷാംശങ്ങളെ പുറന്തള്ളാന് ഇതു വളരെ നല്ലതാണ്.
*വ്യായാമത്തിനു മുന്പും ശേഷവും ആവശ്യത്തിന് വെള്ളം കുടിക്കുക. വ്യായാമം ചെയ്യുമ്പോള് വിയര്പ്പിലൂടെ ശരീരത്തില് നിന്നും ജലനഷ്ടമുണ്ടാകുന്നതിനാലാണിത്.
*ആഹാരത്തിന് 30 മിനിറ്റു മുന്പ് വെള്ളം കുടിക്കുന്നത് ദഹനം സുഗമമായി നടക്കാന് സഹായിക്കും.
*കുളിക്കുന്നതിനു മുന്പ് ഒരു ഗ്ലാസ് വെള്ളം കുടിക്കുന്നത് രക്തസമ്മര്ദ്ദം ശരിയായ രീതിയില് നിലനിര്ത്താന് നല്ലതാണ്.
*പുറത്തേക്കിറങ്ങുമ്പോഴും അതിനു ശേഷവും വെള്ളം കുടിക്കുക. രോഗം പരത്തുന്ന ചിലയിനം വൈറസുകളെ പ്രതിരോധിക്കാന് ഇതു സഹായിക്കും.
*ഉറങ്ങുന്നതിനു മുന്പ് ഒരു ഗ്ലാസ് വെള്ളം കുടിക്കുക. അന്നേ ദിവസത്തെ ജലനഷ്ടം നികത്താന് ഇതാവശ്യമാണ്.
https://www.facebook.com/Malayalivartha