കല്യാണ്‍ ജ്വല്ലറിയുടെ പുതിയ പരസ്യത്തിന് എതിരെ ഇന്ത്യന്‍ ബാങ്ക് ഓഫീസേഴ്‌സ് അസോസിയേഷന്‍ നോട്ടീസ് ആയച്ചിരിക്കുന്നു. പരസ്യം നിലവിലെ ബാങ്ക് സംവിധാനത്തെ അവഹേളനപരവും അധിക്ഷേപകരവും ആണെന്ന് നോട്ടീസില്‍ വ്യക്തമാക്കുന്നു. പരസ്യം പിന്നിവലിച്ചില്ലെങ്കില്‍ ധര്‍ണയും മറ്റു പ്രക്ഷോഭ പരിപാടികള്‍ സംഘടിപ്പിക്കും എന്നും നോട്ടീസില്‍ പറയുന്നു. പരസ്യം യു ട്യൂബിലൂടെയും ചാനലുകളിലൂടെയും പ്രചരിക്കുന്നുണ്ട്. ബാങ്ക് ജീവനക്കാര്‍ സത്യസന്ധതയില്ലാത്തവരാണെന്നും സ്ഥാപനത്തോടും സര്‍ക്കാരിനോടും സമൂഹത്തോടും കൂറില്ലാത്തവരാണെന്നും വരുത്തിത്തീര്‍ക്കുന്ന ആവിഷ്‌ക്കാരമാണീ പരസ്യത്തിലുള്ളത്. 

ഹിന്ദിയിലെയും മലയാളത്തിലേയും തമിഴിലെയും തെലുങ്കിലെയും പ്രമുഖ താരങ്ങളാണ് അഭിനയിക്കുന്നത്. നെഗറ്റിവ് ക്യാംപയിനിലൂടെ ഇതേ ജൂവല്ലറിക്കും നടീ നടന്മാര്‍ക്കും പ്രചാരം കൊടുക്കാന്‍ ഉദ്ദേശമില്ലാത്തതിനാല്‍ അവരുടെ പേരോ യു ട്യൂബ് ലിങ്കോ ഇടാന്‍ ഉദ്ദേശിക്കുന്നില്ലെന്ന് അസോസിയേഷന്‍ നേതാവ് ജി.പി രാമചന്ദ്രന്‍ ഫെയിസ്ബുക്കിലൂടെ അറിയിച്ചു. ജീവിത ദുരിതങ്ങളുടെ ഭാഗമായി രാജ്യത്ത് വര്‍ദ്ധിച്ചു വരുന്ന അസംതൃപ്തി ബാങ്ക് ജീവനക്കാര്‍, കറുത്ത തൊലി നിറമുള്ളവര്‍, മറ്റു സംസ്ഥാനക്കാര്‍, കേറിക്കിടക്കാന്‍ ഇടമില്ലാത്തതിനാല്‍ തെരുവില്‍ ഉറങ്ങുന്നവര്‍, ദളിതര്‍, ന്യൂനപക്ഷങ്ങള്‍ എന്നിവര്‍ക്കെതിരെ തിരിച്ചു വിടാനുള്ള കോര്‍പ്പറേറ്റുകളുടെയും ഭരണവര്‍ഗ്ഗത്തിന്റെയും തന്ത്രങ്ങളാണിതിന് പിന്നിലെന്ന് വ്യക്തമാണെന്നും അദ്ദേഹം പറയുന്നു. 

വാട്‌സാപ്പിലൂടെ സ്വയം ഒത്തുകൂടി ആള്‍ക്കൂട്ട കൊല നടത്തുന്നത് മുതല്‍, എല്ലാ കുഴപ്പങ്ങള്‍ക്കും കാരണം ബാങ്ക് ജീവനക്കാരാണെന്ന് പ്രചരിപ്പിക്കുന്ന മനോഭാവം വരെ രാജ്യദ്രോഹപരമായ നീക്കങ്ങളാണ് ഫാസ്സിസ്റ്റുകള്‍ നടത്തിവരുന്നത്. സ്വര്‍ ണത്തില്‍ പൊതിഞ്ഞ ഈ പൊതികള്‍ തെരുവിലെന്നതു പോലെ വീടകത്തും കടത്താതിരിക്കുന്നതാണ് സംസ്‌കാരത്തിന്റെയും മനുഷ്യരുടെയും ആരോഗ്യത്തിന് മെച്ചമെന്നും അദ്ദേഹം ചൂണ്ടിക്കാട്ടുന്നു.