തിരുവനന്തപുരത്ത് രക്തദാനത്തിലൂടെ കുട്ടിക്ക് എച്ച്.ഐ.വി ബാധിച്ച സംഭവവുമായി ബന്ധപ്പെട്ടു നടന്ന അന്വേഷണത്തില്‍ ആര്‍.സി.സിക്ക് വീഴ്ച്ച സംഭവിച്ചിട്ടില്ലെന്നു ആഭ്യന്തര അന്വേഷണ വകുപ്പിന്റെ റിപ്പോര്‍ട്ട് . റിപ്പോര്‍ട്ട് ആരോഗ്യ സെക്രട്ടറിക്ക് സമര്‍പ്പിക്കും.

മാനദണ്ഡങ്ങള്‍ പാലിച്ചാണ് രക്തം നല്‍കിയതെന്നും രക്ത പരിശോധനക്കും മറ്റും ആധുനിക ഉപകരണങ്ങളുടെ കുറവുണ്ടെന്നും റിപ്പോര്‍ട്ടില്‍ ചൂണ്ടിക്കാണിക്കുന്നു. എച്ച്.ഐ.വി സ്ഥിതീകരണത്തിനുള്ള ടെസ്റ്റിന്റെ കാലതാമസം കേരളത്തിലുടനീളം രക്ത ദാനത്തിനും പരിശോധനക്കും തിരിച്ചടിയാണെന്നും റിപ്പോര്‍ട്ട് വിലയിരുത്തുന്നു.

മുന്‍പ് എയ്ഡ്‌സ് കണ്‍ട്രോള്‍ അതോറിറ്റി ഡയറക്ടര്‍ ഡോ .ആര്‍ രമേശിന്റെ നേതൃത്വത്തിലും അന്വേഷണം നടന്നിരുന്നു. എച്ച്.ഐ.വി രോഗബാധയുണ്ടാവുകയും നാല് ആഴ്ച്ച മുതല്‍ പന്ത്രണ്ട് ആഴ്ചകളില്‍ രക്തദാനം നടത്തുകയും ചെയ്താല്‍ രോഗം കണ്ടു പിടിക്കാന്‍ കഴിയില്ലെന്ന് ആ റിപ്പോര്‍ട്ടില്‍ സൂചിപ്പിച്ചിരുന്നു. 

അതേ സമയം, രക്താര്‍ബുദത്തിന് ചികിത്സക്കെത്തിയ കുട്ടിക്ക് ആര്‍.സി.സിയില്‍ നിന്ന് രക്തം സ്വീകരിച്ചതിനാലാണ് എച്ച്.ഐ.വി ബാധിച്ചതെന്ന മാതാപിതാക്കളുടെ പരാതിയിലാണ് ആരോഗ്യമന്ത്രി ഈ അന്വേഷണത്തിന് വിദഗ്ധ സംഘത്തെ നിയോഗിച്ചത്. ജോയിന്റ് ഡി.എം.ഇ ഡോ.ശ്രീകുമാരിയുടെ നേതൃത്വത്തില്‍ നടന്ന അന്വേഷണവും ഇതേ വസ്തുതകള്‍ ചൂണ്ടിക്കാട്ടി ആര്‍.സി.സിക്ക് ക്ലീന്‍ ചിറ്റ് നല്‍കിയിരിക്കുകയാണ്.