പ്രതിപക്ഷ നേതാവ് രമേശ് ചെന്നിത്തല നയിച്ച യുഡിഎഫിന്റെ പടയൊരുക്കം സമാപന ചടങ്ങിനിടെ കോണ്‍ഗ്രസ് പ്രവര്‍ത്തകര്‍ ഗ്രൂപ്പ് തിരിഞ്ഞ് ഏറ്റുമുട്ടി. കെഎസ്യു ജില്ലാ സെക്രട്ടറി ആദേശ് സുധര്‍മന്‍, ആറ്റിങ്ങല്‍ പാര്‍ലമെന്റ് മണ്ഡലം കോണ്‍ഗ്രസ് ഐടി കോര്‍ഡിനേറ്ററും യൂത്ത് കോണ്‍ഗ്രസ് നേതാവുമായ നജീം എന്നിവരെ കത്തിക്കുത്തേറ്റ നിലയില്‍ ജനറല്‍ ആശുപത്രിയില്‍ പ്രവേശിപ്പിച്ചു.

വ്യാഴാഴ്ച വൈകിട്ട് നിയുക്ത കോണ്‍ഗ്രസ് അധ്യക്ഷന്‍ രാഹുല്‍ഗാന്ധി പങ്കെടുത്ത് സെന്‍ട്രല്‍ സ്‌റ്റേഡിയത്തില്‍ നടന്ന പടയൊരുക്കം യാത്രയുടെ സമാപനയോഗം കഴിഞ്ഞ ഉടന്‍ നഗത്തില്‍ എ ഐ, സുധീര ഗൂപ്പുകാര്‍ ചേരി തിരിഞ്ഞ് ഏറ്റുമുട്ടുകയായിരുന്നു. സെന്‍ട്രല്‍ സ്‌റ്റേഡിയത്തിന് കവാടത്തില്‍ കന്റോണ്‍മെന്റ് സ്‌റ്റേഷന് മുന്നിലാണ് അടി തുടങ്ങിയത്. രാത്രിയില്‍ നഗരത്തില്‍ സംഘര്‍ഷം തുടരുകയാണ്. ആദേശിന് ഇടതു കൈക്കും കാലിനുമാണ് കുത്തേറ്റത്. നജീമിനെ തലയ്ക്കാണ് കുത്തിയത്. 

പടയൊരുക്കം സമാപന സമ്മേളനത്തിലും കോണ്‍ഗ്രസിലെ തമ്മിലടി പ്രകടമായിരുന്നു. നേതാക്കള്‍ പ്രസംഗിക്കാനെഴുനേല്‍ക്കുമ്‌ബോള്‍ ഗ്രൂപ്പ്തിരിഞ്ഞായിരുന്നു കൈയടി. ഉമ്മന്‍ചാണ്ടി പ്രസംഗിച്ചപ്പോള്‍ ഒരു ഭാഗത്തുനിന്നും ചെന്നിത്തല പ്രസംഗിച്ചപ്പോള്‍ മറുഭാഗത്തുനിന്നും മാത്രമാണ് കൈയടി ഉയര്‍ന്നത്. പടയൊരുക്കം നയിച്ച രമേശ് ചെന്നിത്തലയ്ക്ക് കൈയടി കുറഞ്ഞത് ഐഗ്രൂപ്പ് നേതാക്കളെ ചൊടിപ്പിച്ചിരുന്നു. തലസ്ഥാന ജില്ലയില്‍നിന്ന് പെടയൊരുക്കത്തിന് പാരവയ്ക്കാന്‍ ചില കോണ്‍ഗ്രസ് നേതാക്കള്‍തന്നെ പണിയെടുത്തുവെന്ന ആരോപണം ഉയര്‍ന്നിട്ടുണ്ട്.

പടയൊരുക്കത്തിന്റെ സമാപനസമ്മേളനം മുന്‍ കെപിസിസി പ്രസിഡന്റ് വി എം സുധീരന്‍ ബഹിഷ്‌ക്കരിച്ചു. രാഹുല്‍ഗാന്ധി പങ്കെടുത്ത പടയൊരുക്കം സമാപന സമ്മേളനത്തില്‍ പങ്കെടുക്കാതെ വിട്ടുനിന്നതിനെക്കുറിച്ച് പിന്നീട് സംസാരിക്കാമെന്നായിരുന്നു സുധീരന്റെ പ്രതികരണം. കോണ്‍ഗ്രസുകാരുടെ ചേരിതിരിഞ്ഞുള്ള കൊലവിളിയും സംഘര്‍ഷാവസ്ഥയും തുടരുന്നതിനാല്‍ നഗരത്തില്‍ കൂടുതല്‍ പൊലീസിനെ നിയോഗിച്ച് കര്‍ശന പരിശോധന തുടരുകയാണ്.