കണ്ണൂര്‍ തളിപ്പറമ്പ് കീഴാറ്റൂരില്‍ വയല്‍നികത്തി ബൈപാസ് നിര്‍മിക്കാനുള്ള നീക്കത്തിനെതിരെ നടക്കുന്ന സമരത്തില്‍ കേന്ദ്ര സര്‍ക്കാര്‍ ഇടപെടുന്നു. ബൈപാസ്സുമായി ബന്ധപ്പെട്ട പാരിസ്ഥിതിക പ്രശ്‌നങ്ങള്‍ പഠിക്കാന്‍ കേന്ദ്ര പരിസ്ഥിതി മന്ത്രാലയത്തിലെ റീസേര്‍ച്ച് ഓഫീസര്‍ ജോണ് തോമസിന്റെ നേതൃത്വത്തിലുമുള്ള സംഘം സ്ഥലം സന്ദര്‍ശിക്കും. സംഘം മന്ത്രാലയത്തിന് റിപ്പോര്‍ട്ട് നല്‍കും. ദേശീയ പാതാ അതോറിറ്റിയിലെ ഉദ്യോഗസ്ഥരും ഒപ്പമുണ്ടാകും. മേയ് 3,4 തിയ്യതികളിലാണ് സംഘം എത്തുക. ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍ നല്‍കിയ പരാതിയിലാണ് നടപടി.

എന്‍എച്ച് 66 ലേയ്ക്ക് കീഴാറ്റൂരില്‍ ഒരു ബൈപാസ് നിര്‍മ്മാണം നടത്തുന്നതിനെതിരെ 20 മാര്‍ച്ച് 2018 ല്‍ ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍ നല്‍കിയ പരാതിയുടെ മറുപടിയിലാണ് കേന്ദ്രത്തിന്റെ കത്ത് വന്നത്. റിസര്‍വ്വ് ഓഫീസര്‍ ജോണ്‍ തോമസിന്റെ നേതൃത്വത്തിലുള്ള ഒരു സംഘം ഉദ്യോഗസ്ഥര്‍ മെയ് 3,4 തീയതികളില്‍ കീഴാറ്റൂര്‍ സന്ദര്‍ശിക്കുന്നു. ഈ സംഘം പ്രസ്തുത സ്ഥലം സന്ദര്‍ശിക്കുകയും മന്ത്രാലയത്തിന് നിജസ്ഥിതിയെ സംബന്ധിച്ച് റിപ്പോര്‍ട്ട് സമര്‍പ്പിക്കുകയും ചെയ്യും. തദവസരത്തില്‍ പരാതി പരിശോധിക്കുന്നതാണ്. കുമ്മനത്തിന്റെ പരാതിയുമായി ബന്ധപ്പെട്ട രേഖകളുമായി നേരിട്ട് വരികയോ ഉത്തരവാദപ്പെട്ട മറ്റാരെയെങ്കിലും അയയ്ക്കുകയോ ചെയ്യണമെന്നും പറയുന്നു.

അതേസമയം കേന്ദ്ര ഗതാഗതവകുപ്പും വിഷയത്തില്‍ ഇടപെട്ടിട്ടുണ്ട്. ബൈപാസ് സമരത്തിന് നേതൃത്വം നല്‍കുന്ന വയല്‍കിളി പ്രവര്‍ത്തകനായ സുരേഷ് കീഴാറ്റൂര്‍ നല്‍കിയ പരാതിയുടെ അടിസ്ഥാനത്തിലാണ് കേന്ദ്ര സര്‍ക്കാരിന്റെ ഇടപെടല്‍. വയല്‍ നികത്തിയുള്ള ബൈപാസ് നിര്‍മാണത്തെക്കുറിച്ച് കേരള വനംവകുപ്പ് മൂപ്പത് ദിവസത്തിനുള്ളില്‍ കേന്ദ്രത്തിന് റിപ്പോര്‍ട്ട് നല്‍കണം. നാട്ടുകാരുടെ പരാതികള്‍ പഠിച്ച് അനുയോജ്യമായ തീരുമാനം ഉടന്‍ എടുക്കണമെന്നും വനംവകുപ്പ് പ്രിന്‍സിപ്പല്‍ സെക്രട്ടറിക്ക് അയച്ച കത്തില്‍ നിര്‍ദേശമുണ്ട്.

കേന്ദ്ര ഗതാഗതവകുപ്പും പ്രതിഷേധക്കാരുടെ പരാതി ഗൗരവത്തോടെയാണ് എടുത്തിരിക്കുന്നത്. അനുയോജ്യമായ നടപടി എടുക്കാന്‍ ചീഫ് എന്‍ജിനീയറോട് ആവശ്യപ്പെട്ടു. കേന്ദ്ര കൃഷിവകുപ്പിനും സുരേഷ് കീഴാറ്റൂര്‍ നിവേദനം നല്‍കിയിട്ടുണ്ട്. ജനകീയ സമരം ശക്തമായതിനെത്തുടര്‍ന്ന് പുതിയ അലൈന്‍മെന്റ് പ്രഖ്യാപിക്കാന്‍ ദേശീയപാത അതോറിറ്റിയും തയ്യാറായിട്ടില്ല. വയല്‍ നികത്തുന്നതിന് പകരം നിലവിലുള്ള ദേശീയപാത വികസിപ്പിക്കണമെന്നാണ് പ്രതിഷേധക്കാരുടെ ആവശ്യം.