ഹൃദയത്തിന്റെ പ്രവര്‍ത്തനം തകരാറിലായി. തുടർന്ന് ശസ്ത്രക്രിയ നടത്തിയ മധ്യവയസ്‌ക്കനു ഇപ്പോൾ തുടിക്കുന്നത് രണ്ടു ഹൃദയം. ഹൈദരാബാദിലെ അപ്പോളോ ഹോസ്പിറ്റലിലാണ് ഇത്തരത്തിലൊരു ശസ്ത്രക്രിയ നടന്നത്. 56 വയസുകാരനില്‍ 17 കാരന്റെ ഹൃദയമാണ് പുതുതായി ഘടിപ്പിച്ചത്. ദാതാവിന്റെ ഹൃദയം സ്വീകര്‍ത്താവില്‍ മാറ്റിവയ്ക്കുന്നത് എളുപ്പമല്ലാത്തതിനെത്തുടർന്നാണ് ഡോക്ടർമാർ ഇങ്ങനെ ചെയ്തത്.

ദാതാവിന്റെ ഹൃദയം സ്വീകര്‍ത്താവിന്റെ ഹൃദയത്തേക്കാള്‍ ചെറുതായതുകൊണ്ടാണ് പഴയ ഹൃദയം നീക്കം ചെയാതെ തന്നെ പുതിയ ഹൃദയം വച്ചുപിടിപ്പിക്കാൻ ഡോക്ടര്‍മാർ തീരുമാനമെടുത്തത്. രോഗിയുടെ ഹൃദയത്തിന്റെ ചെറിയ ഭാഗം (പെരികാഡിയം) മാത്രമാണ് ശസ്ത്രക്രിയയില്‍ നീക്കം ചെയ്തത്. തുടര്‍ന്ന് വലത്തെ ശ്വാസകോശത്തിനും പഴയ ഹൃദയത്തിനും മധ്യേ പുതുഹൃദയം തുന്നിച്ചേര്‍ക്കുകയായിരുന്നു. രണ്ടു ഹൃദയങ്ങളും ഒരേ സമയം പ്രവര്‍ത്തിച്ചതോടെ രോഗിയുടെ ശ്വാസകോശത്തിലെ രക്ത സമ്മര്‍ദ്ദം നാലു മടങ്ങ് കൂടി. സങ്കീര്‍ണമായ ഈ പ്രശ്നം ഏഴ് മണിക്കൂര്‍ നീണ്ട ശസ്ത്രക്രിയയിലൂടെയാണ് ഡോക്ടർമാർ പരിഹരിച്ചത്.