വിമാനം ഒറ്റയടിക്ക് 10,000 അടി താഴേക്ക് എത്തി, 189-പേരുടെ നിലവിളി മുഴങ്ങി, യാത്രക്കാരുടെ ചെവിയിലും മൂക്കിലും രക്തം...ഡീകംപ്രഷന്‍ എന്ന മര്‍ദ്ദക്കുറവ് സംഭവിച്ചപ്പോള്‍!
അയര്‍ലന്‍ഡിലെ ഡബ്ലിനില്‍ നിന്ന് ക്രൊയേഷ്യയിലെ സദാറിലേക്കുള്ള യാത്രയിലായിരുന്നു റയന്‍ എയറിന്റെ ആ FR 7312 ഫ്‌ലൈറ്റ്. രാത്രി 8.07 മണിയോടെ റയന്‍ എയറിന്റെ ആ FR 7312 ഫ്‌ലൈറ്റ് പറന്നുയര്‍ന്നത് യാതൊരു പ്രശ്‌നങ്ങളുമില്ലാതെയായിരുന്നു. പക്ഷേ രണ്ടേക്കാല്‍ മണിക്കൂര്‍ ദൈര്‍ഘ്യമുള്ള ആ യാത്രയ്ക്കിടയില്‍ ആകാശത്തു വച്ചുണ്ടായത് തികച്ചും അപ്രതീക്ഷിത സംഭവങ്ങളാണ്.
ഏകദേശം ഒന്നേക്കാല്‍ മണിക്കൂര്‍ സഞ്ചരിച്ച വിമാനം പെട്ടെന്ന് താഴേക്കുള്ള ഉയരത്തിലേക്ക് വീണ് പറക്കുകയായിരുന്നു. 37,000 അടി ഉയരത്തില്‍ പറക്കുകയായിരുന്നു വിമാനം 10,000 അടി താഴേക്ക് പതിച്ചു. ഫ്‌ലൈറ്റ്‌റഡാര്‍24 ഡോട്ട് കോമിന്റെ റിപ്പോര്‍ട്ട് പ്രകാരം ഏഴു മിനിറ്റോളം 10,000 അടി ഉയരത്തില്‍ യാത്ര തുടര്‍ന്നുവെന്നാണ്.
യാത്രക്കാരെല്ലാം യാത്ര ആസ്വദിക്കുന്ന സമയത്താണ് ഈ സംഭവം ഉണ്ടാകുന്നത്. വിമാനം താഴേക്കു വന്നതോടെ കാബിനിലെ വായു മര്‍ദ്ദത്തില്‍ മാറ്റം വന്നു. ഇതോടെ യാത്രക്കാരുടെ മൂക്ക്, ചെവി പൊട്ടി രക്തം വരാന്‍ തുടങ്ങി. പലരും രക്തം പുരണ്ട കൈകളുമായി പ്രത്യക്ഷപ്പെട്ടതോടെ വിമാനത്തിനകത്ത് കരച്ചിലും ബഹളവുമായി. ഇതിനിടെ മുകളില്‍ നിന്ന് ഓക്‌സിജന്‍ മാസ്‌കുകള്‍ യാത്രക്കാരുടെ സീറ്റിലേക്ക് വീണു. പിന്നീടുള്ള യാത്ര ഓക്‌സിജന്‍ മാസ്‌ക് ധരിച്ചായിരുന്നു.
കാബിനിലെ മര്‍ദ്ദം കുറഞ്ഞ് മുപ്പതോളം യാത്രക്കാരുടെ ചെവിയില്‍ നിന്ന് രക്തം വരാന്‍ തുടങ്ങിയതോടെ വിമാനം ജര്‍മ്മനിയിലെ ഫ്രാങ്ക്ഫര്‍ട്ട് വിമാനത്താവളത്തിലേക്ക് അടിയന്തരമായി ലാന്‍ഡ് ചെയ്യുകയായിരുന്നു. പരുക്കേറ്റ യാത്രക്കാരെ എല്ലാം ആശുപത്രിയിലേക്ക് മാറ്റി.
ഒരു മുന്നറിയിപ്പും ഇല്ലാതെ ഓക്‌സിജന്‍ മാസ്‌കുകള്‍ താഴേക്ക് വീണതോടെ യാത്രക്കാര്‍ ഭയന്നുപോയിരുന്നു. എന്താണ് സംഭവിക്കുന്നതെന്ന് പോലും അറിയിപ്പുണ്ടായില്ലെന്ന് യാത്രക്കാരില്‍ ഒരാള്‍ ട്വീറ്റ് ചെയ്തു. ഇതോടെ എല്ലാവരും ഓക്‌സിജന്‍ മാസ്‌ക് ധരിച്ചു, വിമാനത്തിനകത്ത് മൊത്തം കരച്ചിലും ബഹളവുമായിരുന്നു, രക്തം കണ്ടു ചില യാത്രക്കാര്‍ താഴെ വീണു, വിവരിക്കാന്‍ കഴിയാത്ത കാഴ്ചകളാണ് കണ്ടതെന്നും യാത്രക്കാര്‍ പറയുന്നു.
പൈലറ്റുമാരോ, വിമാനത്തിലെ ജീവനക്കാരോ എന്താണ് സംഭവിച്ചതെന്ന് മുന്‍പെ പറഞ്ഞിരുന്നില്ല. വിമാനം താഴേക്ക് വീഴുന്നുവെന്നും ഞങ്ങളെല്ലാം മരിക്കാന്‍ പോകുകയാണെന്ന് കരുതി യാത്രക്കാര്‍ ഭയന്നു വിറച്ചു. വിമാനത്തിനകത്തു നിന്നുള്ള ചിത്രങ്ങളും വിഡിയോയും യാത്രക്കാരുടെ ഭീതി വ്യക്തമാക്കുന്നുണ്ട്. ഏറെ നേരത്തെ പരിഭ്രാന്തിക്കൊടുവില്‍ വിമാനം സുരക്ഷിതമായി താഴെയെത്തിയപ്പോള്‍ യാത്രക്കാര്‍ പറഞ്ഞു: 'ഇത്രയും ഭീതി നിറഞ്ഞൊരു യാത്ര ജീവിതത്തില്‍ അനുഭവിച്ചിട്ടില്ല'.
https://www.facebook.com/Malayalivartha
