ഇന്റര്‍ നാഷണല്‍ യൂണിയന്‍ ഓഫ് ജിയോളജിക്കല്‍ സയന്‍സിനു കീഴിലുള്ള ഇന്റര്‍നാഷണല്‍ കമ്മീഷന്‍ ഓണ്‍ സ്ട്രാറ്റിഗ്രാഫി ആണ് ഭൂമിയിലെ വിവിധ യുഗങ്ങള്‍ നിര്‍ണയിക്കുന്നത്. അതനുസരിച്ച് ഇപ്പോള്‍ ഹോലോസിന്‍ യുഗമാണ്.

11,000 വര്‍ഷം മുമ്പാരംഭിച്ച ഹോലോസിന്‍ യുഗത്തിലെ ഒന്നാം കാലഘട്ടം ഗ്രീന്‍ലാന്‍ഡിന്‍ ആണ്. ഹിമയുഗത്തിനുശേഷം തുടങ്ങിയ ഇത് 8,300 വര്‍ഷം മുമ്പ് അവസാനിച്ചു. പിന്നെ വന്നതു നോര്‍ത്ത് ഗ്രിപ്പിയന്‍ കാലം. ഇത് ആഗോള ഊഷ്മാവ് പെട്ടെന്നു കുറഞ്ഞ കാലമാണ്. ഹിമാനികള്‍ ഉരുകിയുള്ള വെള്ളം അറ്റ്‌ലാന്റിക്കിലെ ഒഴുക്കുമായി സംഗമിച്ച കാലമാണിത്.

4200 വര്‍ഷം മുമ്പ് ഒരു മഹാവരള്‍ച്ചയില്‍ നിരവധി നാഗരികതകള്‍ ഇല്ലാതായ ശേഷമാണ് മേഘാലയന്‍ കാലം തുടങ്ങുന്നത്. ഈജിപ്ത്, ഗ്രീസ്, സിറിയ, പലസ്തീന, മെസൊപൊട്ടേമിയ (ഇറാക്ക്), സിന്ധു നദീതടം, യാങ്ട്‌സി നദീതടം(ചൈന) എന്നിവിടങ്ങളിലെല്ലാം രണ്ടു നൂറ്റാണ്ടോളം നീണ്ടുനിന്നു മഹാവരള്‍ച്ച.

ഗുഹയില്‍ നിന്ന് മേഘാലയയിലെ ഒരു ഗുഹയില്‍ കണ്ടെത്തിയ സ്റ്റലാഗ് മൈറ്റ് പാറകളുടെ രാസഘടന പരിശോധിച്ചാണ് പുതിയ കാലഘട്ടത്തിന്റെ പിറവി 4200 വര്‍ഷം മുമ്പാണെന്ന് പ്രഖ്യാപിച്ചത്. ഗുഹകളുടെ മുകളില്‍ നിന്നു വീഴുന്ന പൊടിപടലം കട്ടപിടിച്ചുണ്ടാകുന്ന പാറയാണ് സ്റ്റലാഗ്മൈറ്റ്.

ഇപ്പോള്‍ ഭൂമി കടന്നുപോകുന്ന കാലഘട്ടത്തിന്റെ പേര് ഇന്ത്യയില്‍ നിന്നാണ്. കൃത്യമായി പറഞ്ഞാല്‍ മേഘാലയയില്‍ നിന്ന്. കാലഘട്ടത്തിന്റെ പേര് മേഘാലയന്‍. മേഘാലയന്‍ എന്ന പേരിനെ എതിര്‍ക്കുന്നവരുണ്ട്. അവര്‍ ഹോലോസിന്‍ യുഗം അവസാനിപ്പിച്ച് ആന്ത്രോപോസിന്‍ യുഗഗണന തുടങ്ങണമെന്ന വാദക്കാരാണ്.

മനുഷ്യന്‍ ഭൂമിയിലും പ്രകൃതിയിലും നിയന്ത്രണം ഏറ്റെടുക്കുന്നതു കണക്കിലെടുത്താണ് മനുഷ്യകാലം എന്നര്‍ഥം വരുന്ന ആന്ത്രോപോസിന്‍ എന്ന പേര്‍ നിര്‍ദേശിക്കപ്പെട്ടത്. ഇന്റര്‍നാഷണല്‍ ജിയോളജിക്കല്‍ കോണ്‍ഗ്രസ് 2016-ല്‍ ഇത് ശിപാര്‍ശ ചെയ്തിരുന്നതാണ്.