മനസ്സിനെ നൊമ്പരപ്പെടുത്തി അച്ഛനെ ചേര്ത്തുപിടിച്ചു കവിളിലുമ്മ കൊടുക്കുന്ന വിസ്മയ...
കൗതുകം നിറഞ്ഞ കണ്ണുകളും തെളിഞ്ഞ പുഞ്ചിരിയുമായി ചുറുചുറുക്കോടെ പരിപാടിയില് പങ്കെടുത്ത കൊച്ചുമിടുക്കി വിസ്മയയുടെ വീഡിയോ വേദനയോടെയാണ് സമൂഹ മാധ്യമങ്ങള് ഏറ്റെടുത്തത്. കാരണം അടുത്ത ദിവസങ്ങളിലാണ് ബിജെപി പ്രവര്ത്തകനായ വിസ്മയയുടെ അച്ഛന് സന്തോഷ് രാഷ്ട്രീയ കൊലപാതകത്തിന് ഇരയാവുന്നത്. സംസ്ഥാന സ്കൂള് കലോല്സവ നഗരിയെ മുള്മുനയില് നിര്ത്തിയാണ് കണ്ണൂര് ധര്മ്മടം സ്വദേശിയായ സന്തോഷ് കൊല്ലപ്പെടുന്നത്.
രാത്രി പതിനൊന്നരയോടെ വീടിന്റെ വാതില് തകര്ത്ത് അകത്തുകയറിയ അക്രമി സംഘമാണ് 52 കാരനായ സന്തോഷ് കുമാറിനെ വെട്ടി വീഴ്ത്തിയത്. ഇപ്പോള് വിസ്മയയുടെ മുന്കാല ടിവി ഷോ വൈറലാകുകയാണ്. ഒരു പ്രമുഖ ടിവി ചാനലിലെ ക്വിസ് മത്സരത്തിലാണ് വിസ്മയ പങ്കെടുത്തത്. അന്ന് മിന്നുന്ന പ്രകടനത്തിലൂടെ ഈ കൊച്ചു മിടുക്കി പ്രേക്ഷക ശ്രദ്ധ നേടിയിരുന്നു.
കൃഷിപ്പണിക്കാരനായ അച്ഛനെ സഹായിക്കാനാണ് ഇവിടെയെത്തിയതെന്നും വീട്ടില് ടിവി പോലുമില്ലെന്നും ചാനല് പരിപാടിയില് വിസ്മയ പറഞ്ഞിരുന്നു. ഇപ്പോഴും അച്ഛനെ ചേര്ത്തുപിടിച്ചു കവിളിലുമ്മ കൊടുക്കുന്ന മകളുടെ ചിത്രം പ്രേക്ഷകരുടെ മനസ്സിനെ നൊമ്പരപ്പെടുത്തി കടന്നുപോകുന്നു.
വീഡിയോ കണ്ട് സഹായ വാഗ്ദാനവുമായി ബോളിവുഡ് സിനിമ 'കഹാനി'യുടെ തിരക്കഥാകൃത്ത് അദൈ്വത കല രംഗത്തെത്തി. അവരുടെ ട്വിറ്റര് പേജില് വിസ്മയയുടെ വിഡിയോ ഷെയര് ചെയ്തതോടെ നിരവധിപേര് പിന്തുണയുമായെത്തി. സാമ്പത്തികമായി വിസ്മയയെ സഹായിക്കാന് മുന്നിട്ടെത്തിയ പലരും സഹായ പ്രവര്ത്തനങ്ങള്ക്ക് നേതൃത്വം നല്കാനും അദൈ്വത കലയോട് ആവശ്യപ്പെട്ടു.
അച്ഛന് നഷ്ടപ്പെട്ട മകളുടെ വേദന കവിതയായും പ്രചരിക്കുന്നുണ്ട്. 'കൊന്നുവോ നിങ്ങളെന്റെ അച്ഛനെ'എന്നുതുടങ്ങുന്ന കവിതയാണ് വായനക്കാരുടെ കണ്ണുനിറച്ചു കടന്നുപോകുന്നത്. സന്തോഷ് കുമാറിനെ വെട്ടി വീഴ്ത്തിയ സംഭവവുമായി ബന്ധപ്പെട്ട് ആറു സിപിഎം പ്രവര്ത്തകരെ അറസ്റ്റ് ചെയ്തു. ബിജെപി അണ്ടല്ലൂര് ബൂത്ത് പ്രസിഡന്റായിരുന്ന സന്തോഷ് കഴിഞ്ഞ പഞ്ചായത്ത് തിരഞ്ഞെടുപ്പില് ധര്മടം അണ്ടല്ലൂര് വാര്ഡിലെ ബിജെപി സ്ഥാനാര്ഥിയായിരുന്നു
വിസ്മയയുടെ കത്തെന്ന രീതിയില് സമൂഹ മാധ്യമങ്ങളില് പ്രചരിക്കുന്ന കവിത;
https://www.facebook.com/Malayalivartha