ആരും തടഞ്ഞില്ല... നികേഷിന്റെ ചാനല്‍ ചര്‍ച്ചക്കിടെ മംഗളം സിഇഒയെ നാട്ടുകാര്‍ കയ്യേറ്റം ചെയ്യാന്‍ ശ്രമിച്ചു; അവസാനം ആര്‍ അജിത് കുമാറിന് പ്രാണരക്ഷാര്‍ത്ഥം ഓടേണ്ടി വന്നു
ഉദ്ഘാടന ദിവസം തന്നെ ഒരു മന്ത്രിയെ രാജി വയ്പ്പിച്ച് തുടക്കം ഗംഭീരമാക്കി പരക്കെ പ്രശംസ കിട്ടിയ ചാനല്‍ സിഇഒയ്ക്ക് ഇന്നലെ നിരാശയുടെ ദിനമായിരുന്നു. ചൊവ്വാഴ്ച രാത്രി ഏഴിന് തിരുവനന്തപുരം പ്രസ് ക്ലബ്ബിന് സമീപത്ത് കസ്റ്റംസ് ഓഫീസിനോട് ചേര്‍ന്ന മൂലയിലാണ് പ്രശസ്ത പത്രപ്രവര്‍ത്തകന്‍ കൂടിയായ സിഇഒയ്ക്ക് പണി കിട്ടിയത്. അതും റിപ്പോര്‍ട്ടര്‍ ചാനലിലെ ചാനല്‍ ചര്‍ച്ചയ്ക്കിടെ.
എല്ലാം വളരെ പെട്ടെന്നായിരുന്നു. റിപ്പോര്‍ട്ടര്‍ ചാനലിന്റെ സംഘമെത്തി. അര മണിക്കൂറിനുള്ളില്‍ പ്രസ് ക്ലബ്ബിന് സമീപം അവര്‍ സെറ്റിട്ടു. ചര്‍ച്ചയ്ക്കായി കേരളത്തിലെ പ്രമുഖ മാധ്യമപ്രവര്‍ത്തകരുമെത്തി. കൂട്ടത്തില്‍ മംഗളം ചാനല്‍ സിഇഒ ആര്‍ അജിത് കുമാറുമെത്തി. ഞായറാഴ്ച മംഗളം ചാനല്‍ പുറത്തുവിട്ട ശബ്ദസംപ്രേഷണത്തെത്തുടര്‍ന്ന് എ കെ ശശീന്ദ്രന്‍ എല്‍ഡിഎഫ് സര്‍ക്കാരില്‍നിന്ന് മന്ത്രിസ്ഥാനം രാജിവയ്‌ക്കേണ്ടിവന്നതിനെക്കുറിച്ചായിരുന്നു ചര്‍ചര്‍ച്ച.
മംഗളം ചാനലിന്റെ നിലപാടാണോ യഥാര്‍ത്ഥ മാധ്യമധര്‍മ്മം എന്നതായിരുന്നു വിഷയം. അവതാരകന്‍ സാക്ഷാല്‍ നികേഷ് കുമാറും.
തെരഞ്ഞെടുപ്പ് പരാജയത്തിനുശേഷം മാധ്യമപ്രവര്‍ത്തന രംഗത്തുനിന്നും, രാഷ്ട്രീയരംഗത്തുനിന്നും വിട്ടുനിന്ന നികേഷ് റിപ്പോര്‍ട്ടര്‍ ചാനലിലിലെ 'എന്റെ ചോര തിളയ്ക്കുന്നു' എന്ന പരിപാടിയിലൂടെലാണ് തിരിച്ചുവരവിന് ശ്രമിച്ചത്. ഈ പരിപാടിയാണ് നാട്ടുകാര്‍ അലങ്കോലമാക്കിയത്.
മംഗളം ചാനലിന്റെ പ്രവൃത്തി അനുചിതമാണെന്ന് ചര്‍ച്ചയില്‍ പങ്കെടുത്ത മാധ്യമപ്രവര്‍ത്തകര്‍ ഒന്നടങ്കം പറഞ്ഞു. പ്രസ് ക്ലബ്ബില്‍ നിന്ന് മാധ്യമപ്രവര്‍ത്തരെല്ലാം അജിത് കുമാറിന്റെ ചര്‍ച്ച കേള്‍ക്കാന്‍ എത്തിയിരുന്നു. അതില്‍ പലരും ഇടക്കിടക്ക് അജിത്കുമാറിനെ ചോദ്യം ചെയ്യുകയും, മറ്റുള്ളവരെക്കൊണ്ട് ചോദ്യങ്ങള്‍ ചോദിപ്പിക്കാന്‍ ശ്രമിക്കുകയും ചെയ്തു.
ചര്‍ച്ച തുടങ്ങി നിമിഷങ്ങള്‍ക്കുള്ളില്‍ രോഷാകുലനായ അജിത് കുമാറിനെ, ചര്‍ച്ചയില്‍ ഒപ്പമുണ്ടായിരുന്നവര്‍ തന്നെ സമാധാനിപ്പിച്ചു. 'എടാ.. നീ കുറെ നേരമായി അവിടെ ഇരുന്ന് ചൊറിയുന്നു... ശശീന്ദ്രനോട് കാശ് വാങ്ങിയാല്‍ അവിടെ കീശയില്‍ വച്ചാമതി...' ആര്‍ അജിത് കുമാര്‍ ചര്‍ച്ചയില്‍ തന്നെ വിമര്‍ശിച്ച പ്രേക്ഷകനോട് ഇങ്ങനെ പോലും പ്രതികരിച്ചു.
ഇതോടെ രോഷം അടക്കാനാകാതെ ആവേശം പൂണ്ട അദ്ദേഹത്തെ ചിലര്‍ കൈയേറ്റം ചെയ്യാന്‍ ശ്രമിച്ചു. ചാനല്‍ ക്യാമറകളെ തട്ടിത്തെറിപ്പിച്ച് അമ്പത് മീറ്ററോളം ഓടിയ അദ്ദേഹം പ്രസ് ക്ലബ്ബില്‍ അഭയം പ്രാപിച്ചു. എ കെ ശശീന്ദ്രന്റെ എന്‍സിപി പ്രവര്‍ത്തകരാണ് തന്നെ ആക്രമിച്ചതെന്ന് അജിത്കുമാര്‍ സഹപ്രവര്‍ത്തകരോട് പറഞ്ഞു. അതേ സമയം സംഘര്‍ഷത്തിനിടയില്‍ നികേഷ് കുമാര്‍ സംഭവസ്ഥലത്തുനിന്ന് മുങ്ങിയെന്നും ആരോപണമുണ്ട്.
https://www.facebook.com/Malayalivartha
