പുതിയ സമയക്രമവുമായി നാളെ സ്‌കൂളുകള്‍ തുറക്കും. ഹൈസ്‌കൂളിന് രാവിലെയും വൈകിട്ടും 15 മിനിട്ട് വീതമാണ് കൂടുന്നത്. ക്ലാസ് രാവിലെ 9.45 ന് ആരംഭിച്ച് 4.15ന് അവസാനിക്കും. സ്‌കൂള്‍ അക്കാഡമിക കലണ്ടര്‍ സംബന്ധിച്ച ഉത്തരവില്‍ മന്ത്രി വി.ശിവന്‍കുട്ടി ഒപ്പുവച്ചു.


1100 മണിക്കൂര്‍ പഠനസമയം ഉറപ്പാക്കാനായി ആറ് ശനിയാഴ്ചകള്‍ ഹൈസ്‌കൂളിന് പ്രവൃത്തിദിനമായിരിക്കും. തുടര്‍ച്ചയായി ആറ് പ്രവൃത്തിദിനങ്ങള്‍ വരാത്ത ആഴ്ചകളിലായിരിക്കും ശനി ക്‌ളാസ്. ഇങ്ങനെ 204 പ്രവൃത്തിദിനങ്ങളാണ് ഉറപ്പാക്കുന്നത്.

യു.പി ക്‌ളാസുകളില്‍ ആയിരം മണിക്കൂര്‍ അദ്ധ്യയനം ഉറപ്പാക്കാനായി രണ്ട് ശനിയാഴ്ച ക്‌ളാസും ഏര്‍പ്പെടുത്തും. ഹയര്‍ സെക്കന്‍ഡറിക്ക് നിലവില്‍ രാവിലെ ഒന്‍പത് മുതല്‍ 4.45 വരെയാണ് ക്‌ളാസ്. ഹൈസ്‌കൂള്‍ ക്‌ളാസുകളില്‍ വെള്ളിയാഴ്ചയൊഴികെ അദ്ധ്യയനസമയം ഓരോ ദിവസവും അരമണിക്കൂര്‍ വീതം വര്‍ദ്ധിപ്പിക്കാമെന്ന് വിദ്യാഭ്യാസ കലണ്ടര്‍ സംബന്ധിച്ച് സര്‍ക്കാര്‍ നിയോഗിച്ച അഞ്ചംഗ സമിതി ശുപാര്‍ശ ചെയ്തിട്ടുണ്ടായിരുന്നു.

25 ശനിയാഴ്ചകള്‍ പ്രവൃത്തിദിനമാക്കാനുള്ള നീക്കത്തെ എതിര്‍ക്കുകയും ചെയ്തു.സ്‌കൂളുകള്‍ക്ക് ആശങ്കസമയക്രമം മാറുന്നത് പ്രവര്‍ത്തനം താളം തെറ്റിക്കുമെന്ന് സ്‌കൂളുകള്‍. ഒന്ന് മുതല്‍ പന്ത്രണ്ട് വരെ ക്‌ളാസുകളുള്ളിടത്തും യു.പിയും ഹൈസ്‌കൂളും ഒരുമിച്ചുള്ളിടത്തും രണ്ട് വിഭാഗത്തിന് രണ്ട് സമയക്രമം ബുദ്ധിമുട്ടാകും. സ്‌കൂള്‍ അസംബ്‌ളി, പ്രാര്‍ത്ഥന, വാഹന സൗകര്യം എന്നിവ താളംതെറ്റുമെന്നാണ് പരാതിയുള്ളത്.

കൂടുതല്‍ ശനിയാഴ്ചകള്‍ അദ്ധ്യയനദിനങ്ങളാക്കുന്നത് കുട്ടികളില്‍ മാനസിക സമ്മര്‍ദ്ദമുണ്ടാക്കുമെന്ന വിദഗ്ധസമിതി നിര്‍ദ്ദേശപ്രകാരമാണ് ഹൈസ്‌കൂളിന്റെ സമയക്രമത്തില്‍ മാറ്റംവരുത്തിയത്.