കാര്‍ബണ്‍ ചലനമുണ്ടാക്കി, ആ ദ്വീപിലെ വൃക്ഷങ്ങള്‍ മാത്രം അസാധാരണമായി പൂത്തുലഞ്ഞു!
ഉഷ്ണമേഖലാ വനപ്രദേശമായ പനാമയിലെ ബറോ കൊളറാഡോ ദ്വീപിലെ മരങ്ങള്‍ അസാധാരണമായി കാലം തെറ്റിയും പൂത്തുലഞ്ഞിരുന്നു. എന്തുകൊണ്ടാണ് ആ കാട്ടില്‍ മാത്രം ഇത്രയേറെ 'പൂക്കാലങ്ങള്‍' ഉണ്ടാകുന്നത് എന്നത് ദശാബ്ദങ്ങളായുള്ള പരിസ്ഥിതി ഗവേഷകരുടെ ചോദ്യമായിരുന്നു. അങ്ങനെ യുഎസിലെ ഫ്‌ലോറിഡ സ്‌റ്റേറ്റ് യൂണിവേഴ്‌സിറ്റിയിലെ ഗവേഷകര്‍ ആ രഹസ്യം കണ്ടെത്താന്‍ തന്നെ തീരുമാനിച്ചു.
വര്‍ഷങ്ങള്‍ക്കിടെ പലപ്പോഴായി ആ ദ്വീപില്‍ നിന്നു ശേഖരിച്ചിരുന്ന ചെടികളുടെ സാംപിളുകള്‍ പരിശോധിച്ചപ്പോഴാണ് പൂക്കാലത്തിന്റെ രഹസ്യം പുറത്തായത്. അതാകട്ടെ ഒട്ടും ആശ്വസിക്കാവുന്നതുമായിരുന്നില്ല. അന്തരീക്ഷത്തിലെ കാര്‍ബണ്‍ ഡൈ ഓക്‌സൈഡിന്റെ അളവ് വന്‍ തോതില്‍ വര്‍ധിച്ചതാണ് അസാധാരണമായ പൂക്കാലത്തിലേക്ക് ഈ സസ്യജാലങ്ങളെ നയിച്ചത്.
ഏതാനും ദശാബ്ദങ്ങളായി ലോകത്ത് ചൂടും അന്തരീക്ഷത്തില്‍ കാര്‍ബണിന്റെ അളവും കൂടുകയാണ്. അക്കാര്യത്തില്‍ തര്‍ക്കവുമില്ല. ഇതിനോട് പല സസ്യജന്തുജാലങ്ങളും പല തരത്തിലാണു പ്രതികരിക്കുന്നത്. ബറോ കൊളറാഡോ ദ്വീപിലെ സസ്യങ്ങള്‍പ്രതികരിച്ചതാകട്ടെ അപ്രതീക്ഷിതമായും കാലം തെറ്റിയും പൂത്തുലഞ്ഞ്!
ചൂടുള്ള കാലാവസ്ഥയില്‍ വളര്‍ന്നാണ് ഇത്തരം വനങ്ങളിലെ മരങ്ങളുടെ ശീലം. എന്നാല്‍ പുതിയ അന്തരീക്ഷ സാഹചര്യങ്ങളില്‍ വളരെ 'സെന്‍സിറ്റീവ്' ആയി സസ്യങ്ങള്‍ പ്രതികരിക്കുമെന്നതിന്റെ തെളിവാണ് ഇപ്പോള്‍ ലഭിച്ചിരിക്കുന്നതെന്നും ഗവേഷകര്‍ പറയുന്നു. അതാകട്ടെ ഗവേഷകര്‍ ഒട്ടും പ്രതീക്ഷിക്കാത്തതുമായിരുന്നു. 28 വര്‍ഷത്തിനിടെ ദ്വീപില്‍ നിന്നു ശേഖരിച്ച സസ്യ സാംപിളുകളാണ് ഗവേഷകര്‍ പരിശോധനയ്ക്കു വിധേയമാക്കിയത്.
ചൂട്, മഴ, പ്രകാശം, കാര്‍ബണ്‍ ഡൈ ഓക്‌സൈഡ് ഇവയില്‍ ഏതാണ് ചെടികളുടെ പൂവിടലിനെ ഏറെ സ്വാധീനിച്ചതെന്നായിരുന്നു പരിശോധന. അങ്ങനെയാണ് വന്‍തോതിലുള്ള കാര്‍ബണിന്റെ സ്വാധീനം തിരിച്ചറിയുന്നതും.
അധികമായുള്ള കാര്‍ബണിനെ ചെടികള്‍ 'പഞ്ചസാര'യാക്കി മാറ്റുകയാണു പതിവ്. ഊര്‍ജത്തിന്റെ ഈ വന്‍ സ്രോതസ്സിനെ പ്രത്യുത്പാദനപരമായ കാര്യങ്ങള്‍ക്കായി ഉപയോഗിക്കാനും തുടങ്ങി. അതോടെ വന്‍തോതില്‍ മരങ്ങള്‍ പൂത്തുലഞ്ഞു. ദ്വീപിലെ പല ചെടികളും പല തരത്തിലാണ് കാര്‍ബണിന്റെ ആധിക്യത്തോടു പ്രതികരിച്ചത്. എന്തുതന്നെയായാലും വരുംകാലത്ത് ആഗോളതാപനവും കാര്‍ബണിന്റെ ആധിക്യവും എപ്രകാരമാണ് പ്രകൃതിയെ തികച്ചും അപ്രതീക്ഷിതമായ രീതിയില്‍ ബാധിക്കുകയെന്നതിന്റെ സൂചനയാണ് ഈ പഠനം നല്‍കിയിരിക്കുന്നതെന്നു ഗവേഷകര്‍ പറയുന്നു. മുഴുവന്‍ പഠനം ഗ്ലോബല്‍ ചേഞ്ച് ബയോളജി ജേണലില്‍ പ്രസിദ്ധീകരിച്ചിട്ടുണ്ട്.
https://www.facebook.com/Malayalivartha
