ടൊവിനോ തോമസും ജോജു ജോര്ജും പ്രതിഫലക്കാര്യത്തില് വിട്ടുവീഴ്ചയ്ക്ക് സമ്മതിച്ചു; തര്ക്കത്തിന് പരിഹാരമായി
കോവിഡിന്റെ പശ്ചാത്തലത്തിലുള്ള പ്രതിസന്ധി നിലനില്ക്കവേ, പ്രതിഫലം കൂട്ടുന്ന നടന്മാരുടെ സിനിമകള്ക്ക് അംഗീകാരം നല്കില്ലെന്ന് നിര്മാതാക്കളുടെ തീരുമാനത്തെത്തുടര്ന്ന് നടന്മാരായ ടൊവിനോ തോമസും ജോജു ജോര്ജും പ്രതിഫലക്കാര്യത്തില് വിട്ടുവീഴ്ചയ്ക്ക് സമ്മതിച്ചു.
ഷംസുദ്ദീന് നിര്മ്മിച്ച് മനു അശോകന് സംവിധാനം ചെയ്യുന്ന ടൊവിനോ ചിത്രം കാണെക്കാണെ, അബാം നിര്മ്മിക്കുന്ന ജോജു ജോര്ജ് ചിത്രം എന്നിവയെച്ചൊല്ലിയായിരുന്നു പ്രതിഫലക്കാര്യത്തില് തര്ക്കം. സിനിമ റിലീസായ ശേഷം പ്രതിഫലം മതിയെന്ന് ടൊവിനോയും 20 ലക്ഷം കുറയ്ക്കാമെന്ന് ജോജുവും അറിയിച്ചതോടെയാണ് ഒത്തുതീര്പ്പിനു വഴിയൊരുങ്ങിയത്. പുതിയ ചിത്രത്തിനായി ആവശ്യപ്പെട്ട 50 ലക്ഷം 30 ലക്ഷം രൂപയാക്കിയാണ് ജോജു കുറച്ചത്.
പ്രതിഫലമില്ലാതെ പുതിയ ചിത്രത്തില് അഭിനയിക്കാമെന്നും സിനിമ റിലീസ് ചെയ്തശേഷം വിജയിച്ചാല് നിര്മ്മാതാവ് നല്കുന്ന ഷെയര് സ്വീകരിക്കാമെന്നും ടൊവിനോ പറഞ്ഞതായി നിര്മ്മാതാക്കളുടെ സംഘടന അറിയിച്ചു.
സമീപകാലത്ത് മോഹന്ലാല് ഉള്പ്പെടെയുള്ള നടന്മാര് പ്രതിഫലം കുറയ്ക്കാന് തയ്യാറായത് ചൂണ്ടിക്കാട്ടിയാണ് പ്രൊഡ്യൂസേഴ്സ് അസോസിയേഷന് പ്രതിഫലക്കാര്യത്തില് നിബന്ധനകള് മുന്നോട്ടുവച്ചത്. എന്നാല് ഇതിന്റെ പേരില് ആരെയും വിലക്കിയിട്ടില്ലെന്ന് പ്രൊഡ്യൂസേഴ്സ് അസോസിയേഷന് പ്രസിഡന്റ് ആന്റോ ജോസഫ് അറിയിച്ചു.
https://www.facebook.com/Malayalivartha