സ്ഫടികം സിനിമയില്‍ അവസരത്തിനായി താന്‍ പുറകേ നടന്നെന്ന ഭദ്രന്റെ ആരോപണം നുണയാണെന്ന് പ്രശസ്ത സംഗീത സംവിധായകന്‍ എസ്പി വെങ്കിടേഷ്. ഇതുവരെ അവസരത്തിനായി ആരെയും സമീപിച്ചിട്ടില്ലെന്ന് എസ്.പി. വെങ്കടേഷ് അറിയിച്ചു. ഭദ്രന്റെ പ്രസ്താവന വേദനിപ്പിച്ചു. തന്നെ അറിയാവുന്ന ആരും ഇത് വിശ്വസിക്കില്ലെന്നും എസ്.പി. വെങ്കടേഷ് പറയുന്നു.

അവസരം ചോദിച്ച് എസ്.പി. വെങ്കടേഷ് സമീപിച്ചതായി സ്ഫടികം സിനിമയുമായി ബന്ധപ്പെട്ടു നല്‍കിയ പ്രതികരണത്തില്‍ ഭദ്രന്‍ വ്യക്തമാക്കിയിരുന്നു. സംവിധായകന്‍ ഹരിഹരന്റെ വീട്ടില്‍ നിന്നും മടങ്ങവെയായിരുന്നു എസ്.പി വെങ്കടേഷ് സമീപിച്ചതെന്ന് ഭദ്രന്‍ പറയുന്നു. കോടമ്പാക്കം പാലം മുതല്‍ പിന്‍തുടര്‍ന്നിരുന്നതായും ആരും തനിക്ക് ചാന്‍സ് നല്‍കുന്നില്ലെന്നും എസ്.പി. വെങ്കിടേഷ് പറഞ്ഞതായി ഭദ്രന്‍ അഭിമുഖത്തില്‍ പറയുന്നു.

ഭദ്രന്റെ വാക്കുകള്‍ ഇങ്ങനെ: 'പശ്ചാത്തല സംഗീതം നന്നായി ചെയ്യുന്ന ആളാണ്. കണ്ണുകളില്‍ ആത്മാര്‍ഥതയുണ്ട്. എങ്കിലും ഞാന്‍ പറഞ്ഞു. നിങ്ങള്‍ ചെയ്യുന്ന പാട്ട് എനിക്കിഷ്ടപ്പെടും. ഞാന്‍ ഓകെ പറയും. മൂന്നു നാലു ദിവസം കഴിയുമ്പോള്‍ ശരിയായില്ല. അതു മാറ്റി ചെയ്യണമെന്ന് ഞാന്‍ പറഞ്ഞേക്കാം. അപ്പോള്‍ വന്നു ചെയ്യണം. പറ്റുമോ? സാറിന്റെ വീട്ടില്‍ താമസിച്ചു കൊള്ളാം. ഒരു നേരത്തെ ഭക്ഷണം തന്നാല്‍ മതി.' അങ്ങനെയാണ് സ്ഫടികത്തിലെ ഏഴുമല പൂഞ്ചോല എന്ന ഗാനത്തിന്റെ പിറവി. പ്രതിഫലം വാങ്ങാതെയാണ് എസ്.പി. വെങ്കടേഷ് സ്ഫടികത്തിനായി പാട്ടുകള്‍ ചെയ്തതെന്നും ഭദ്രന്‍ പറഞ്ഞുവെക്കുന്നു.

ഈ പ്രസ്താവന തന്നെ വേദനിപ്പിക്കുന്നു എന്ന് എസ്.പി. വെങ്കടേഷ് സോഷ്യല്‍ മീഡിയയില്‍ കുറിച്ചു. സ്ഫടികത്തിനും എത്രയോ മുന്‍പു തന്നെ അദ്ദേഹം മലയാള ചലച്ചിത്ര ഗാന രംഗത്ത് തന്റെതായ വ്യക്തിമുദ്ര പതിപ്പിച്ചിട്ടുണ്ട്. ജോണി വാക്കര്‍, തുടര്‍ക്കഥ, കിലുക്കം, ഇന്ദ്രജാലം...എന്നിങ്ങനെ സ്ഫടികത്തിനു മുന്‍പു തന്നെ നിരവധി ഗാനങ്ങള്‍ക്ക് എസ്.പി വെങ്കടേഷ് സംഗീതം പകര്‍ന്നിട്ടുണ്ട്.