വ്യാജവാര്‍ത്തയില്‍ ഒരു പ്രമുഖ ചാനലിനോട് പ്രതികരിച്ച് നടി കുളപ്പുള്ളി ലീല. താന്‍ മരിച്ചിട്ടില്ലെന്നും ജീവനോടെ തന്നെയുണ്ടെന്നും പ്രതികരിച്ച്‌ നടി പറഞ്ഞു. കഴിഞ്ഞ ദിവസമാണ് കുളപ്പുള്ളി ലീല മരിച്ചുവെന്ന തരത്തില്‍ വാര്‍ത്തകള്‍ സമൂഹമാദ്ധ്യമങ്ങളില്‍ പ്രചരിച്ചത്.ഇതിനെതിരെയാണ് നടി ശക്തമായി പ്രതികരിച്ചിരിക്കുന്നത്.

പണമുണ്ടാക്കാന്‍ പോയാലും ആരെയും ഇങ്ങനെ കൊല്ലരുത്. പറയാനുള്ളതെല്ലാം അധികം വൈകാതെ ഒരു വീഡിയോയിലൂടെ പറയാമെന്നും കുളപ്പുള്ളി ലീല പറഞ്ഞു.എന്റെ അമ്മയ്ക്ക് 94 വയസ്സുണ്ട്. സിനിമയുടെ തിരക്കുകള്‍ക്ക് ഇടയിലും ഓടിയെത്തി ഞാന്‍ എന്റെ അമ്മയെയും നോക്കി ജീവിക്കുകയാണ്. അപ്പോഴാണ് ഇങ്ങനെ ഓരോന്ന് വരുന്നത്.

വീഡീയോ ആരെങ്കിലുമൊക്കെ കാണാന്‍ വേണ്ടി ഇങ്ങനെയൊക്കെ ചെയ്യുന്നത് എന്ത് കഷ്ടമാണ്. ആ തലക്കെട്ട് വായിച്ചിട്ട് ഒരുപാട് പേര്‍ വിളിച്ചു. എന്റെ നാട്ടില്‍ നിന്നൊക്കെ ആളുകള്‍ പേടിച്ചാണ് വിളിക്കുന്നത്. സമാധാനം പറഞ്ഞ് ഞാന്‍ മടുത്തു.എന്നെ നേരിട്ട് അറിയാവുന്ന ഒരാള്‍ വരെ ഇതെടുത്ത് പോസ്റ്റ് ചെയ്തു.

എന്നെ ഒന്ന് വിളിച്ചു നോക്കുകയെങ്കിലും ചെയ്യാമായിരുന്നല്ലോ.72 വയസ്സുള്ള എന്നെ പറ്റിയാണ് ഇങ്ങനെ ഒരു തലക്കെട്ട് ഇട്ട് വീഡിയോ കൊടുത്തിരിക്കുന്നത്. ആളെ കൂട്ടാന്‍ കാശുണ്ടാക്കണമെങ്കില്‍ വേറെ എന്തൊക്കെ ചെയ്യാം. ഇങ്ങനെ മനുഷ്യനെ കൊല്ലാക്കൊല ചെയ്യരുത്.പൊലീസില്‍ പരാതി കൊടുക്കാന്‍ പലരും പറഞ്ഞു. പക്ഷേ ഞാന്‍ പരാതി നല്‍കാനൊന്നും പോണില്ല. പറയാന്‍ ഉള്ളത് ഞാനൊരു വീഡിയോയിലൂടെ പറയാമെന്നും ലീല പറയുന്നു.