തെന്നിന്ത്യന്‍ താരം നാഗചൈതന്യയുടെയും സമാന്തയുടെയും വിവാഹവും വിവാഹ മോചനവുമെല്ലാം അടുത്തിടെ വലിയ ചര്‍ച്ചയായിരുന്നു. നടി സാമന്തയുമായി നാല് വര്‍ഷത്തെ ദാമ്പത്യ ജീവിതം അവസാനിപ്പിച്ച നാഗചൈതന്യ ഇപ്പോള്‍ മറ്റൊരു നടിയുമായി പ്രണയത്തിലാണെന്നാണ് കഴിഞ്ഞ ദിവസം പുറത്ത് വന്ന റിപ്പോർട്ടുകൾ. നടിയും മോഡലുമായ ശോഭിത ധൂലിപാലുമായി നാഗചൈതന്യ പ്രണയത്തിലാണെന്ന റിപ്പോര്‍ട്ടുകളാണ് പുറത്തുവന്നുകൊണ്ടിരിക്കുന്നത്. ഇതോടെ നാഗചൈതന്യയുടെ പ്രതിച്ഛായ തകര്‍ക്കാനായി മുന്‍ ഭാര്യ സാമന്തയുടെ പിആര്‍ ടീം നടത്തുന്ന പ്രചാരണമാണിതെന്ന തരത്തില്‍ ആരാധകര്‍ പറഞ്ഞെന്ന വാര്‍ത്തകളുമെത്തി. എന്നാൽ ഈ വിവാദങ്ങളോടുള്ള തന്റെ പ്രതികരണം അറിയിച്ച് രംഗത്തെത്തിയിരിക്കുകയാണ് സാമന്ത.

പെണ്‍കുട്ടികള്‍ക്കെതിരെ ഗോസിപ്പ് വന്നാല്‍ അത് സത്യം. ആണ്‍കുട്ടികള്‍ക്കെതിരെ വന്നാല്‍ അത് പെണ്‍കുട്ടികള്‍ സൃഷ്ടിച്ചത്. അല്‍പം പക്വത കാണിച്ചുകൂടെയെന്നും ആദ്യം നിങ്ങളുടെ സ്വന്തം ജോലിയും കുടുംബവും നോക്കൂ എന്നുമാണ് സാമന്ത പറഞ്ഞിരിക്കുന്നത്. ട്വിറ്ററിലൂടെയാണ് സാമന്തയുടെ പ്രതികരണം. അടുത്തിടെ നാഗചൈതന്യ ഹൈദരാബാദില്‍ പുതിയ വീട് വാങ്ങിയിരുന്നു. ഈ വീട്ടിലേയ്ക്ക് ശോഭിതയെ ക്ഷണിച്ചിരുന്നുവെന്നും താരം ക്ഷണം സ്വീകരിച്ച് എത്തിയതായും റിപ്പോര്‍ട്ടുകളുണ്ട്. 'മേജര്‍' എന്ന ചിത്രത്തിന്റെ പ്രൊമോഷന്റെ ഭാഗമായി ഇരുലരും ഒരു ഹോട്ടലില്‍ വെച്ച് ഒന്നിലേറെ തവണ കണ്ടുമുട്ടിയതായി റിപ്പോര്‍ട്ടുണ്ട്. ശോഭിത ഹൈദരാബാദില്‍ വെച്ചാണ് തന്റെ പിറന്നാള്‍ ആഘോഷിച്ചത്. തന്റെ അടുപ്പക്കാര്‍ക്ക് മാത്രമായി നടത്തിയ പാര്‍ട്ടിയില്‍ നാഗചൈതന്യയും പങ്കെടുത്തിരുന്നു. ഇതോടെയാണ് ഇരുവരും തമ്മില്‍ പ്രണയത്തിലാണെന്ന അഭ്യൂഹങ്ങള്‍ ശക്തമായത്. എന്നാല്‍ ഇരുവരും ഇക്കാര്യത്തില്‍ ഇതുവരെ പ്രതികരിച്ചിട്ടില്ല.