മലയാളത്തിലെ മുൻനിര നായകന്മാരിൽ ഒരാളുടെ നായികയായി മലയാള സിനിമയിൽ എത്തിയ താരമാണ് നവ്യ നായർ. 2001-ൽ പുറത്തിറങ്ങിയ ഇഷ്ടം എന്ന ഒറ്റ ചിത്രം കൊണ്ട് തന്നെ നവ്യ പ്രേക്ഷക ശ്രദ്ധ നേടി. ചിത്രത്തിൽ അഞ്ജന എന്ന നായികവേഷം ലഭിക്കുമ്പോൾ നവ്യക്ക് വെറും 16 വയസ്സായിരുന്നു പ്രായം. ഈ ചെറുപ്രായത്തിലും വളരെ പക്വതയോടെ തനിക്ക് ലഭിച്ച കഥാപാത്രത്തെ അഭിനയിപ്പിച്ചു ഫലിപ്പിച്ച താരം തന്റെ അഭിനയമികവ് മലയാള സിനിമയെ തുറന്ന് കാട്ടുകയായിരുന്നു. തുടർന്ന് നവ്യ അഭിനയിച്ച നന്ദനത്തിലെ "ബാലാമണി"എന്ന കഥാപാത്രത്തിന് ഏറെ ജനപ്രീതി നേടാൻ സാധിച്ചു.

2002ൽ മികച്ച നടിക്കുള്ള കേരള സംസ്ഥാന ചലച്ചിത്ര അവാർഡും മികച്ച നടിക്കുള്ള ഫിലിംഫെയർ അവാർഡും നവ്യ നേടി. മലയാളത്തിലെ മുൻനിര നായകന്മാരോടൊപ്പം എല്ലാം അഭിനയിച്ച നവ്യ, തമിഴിലും കന്നഡയിലും തന്റെ സാന്നിധ്യം അറിയിച്ചിരുന്നു. ഇപ്പോഴിതാ ജീവിതത്തിൽ ഒറ്റപ്പെട്ടുപോകാൻ സാദ്ധ്യതകളേറെയാണെന്ന് തുറന്നു പറഞ്ഞിരിക്കുകയാണ് നടി. സോളോ ട്രിപ്പുകൾ പോകാൻ തുടങ്ങിയതിനെക്കുറിച്ചും താരം പറഞ്ഞു.

ജീവിതത്തിൽ അച്ഛനും അമ്മയും നൽകുന്ന സ്നേഹം ഒരിക്കലും മറ്റുളളവർക്ക് നൽകാൻ സാധിക്കില്ലെന്നും നവ്യ പറഞ്ഞു. അമ്മയുടെ ഫോണിലേക്ക് ഒരു വ്യക്തി വിളിച്ചതിനെക്കുറിച്ചും നടി പങ്കുവച്ചു. സ്വന്തം യൂട്യൂബ് ചാനലിലൂടെയാണ് നവ്യ ഇക്കാര്യങ്ങൾ പറഞ്ഞത്.

'അമ്മയുടെ ഫോണിൽ ഒരു കോൾ വന്നു. അച്ഛന്റെ പ്രായമുളള വ്യക്തിയാണ് വിളിച്ചത്. അമ്മയോട് അദ്ദേഹം സംസാരിക്കുന്നത് ഞാൻ കേട്ടു. അദ്ദേഹത്തിന്റെ ഭാര്യ മരിച്ചു. മക്കൾ വിദേശത്താണ് ജോലി ചെയ്യുന്നത്. മക്കൾ സാമ്പത്തികമായി സഹായിക്കാറുണ്ട്. അദ്ദേഹത്തിന് പെൻഷനുണ്ട്. വീട്ടിൽ പരിചരിക്കാൻ ഒരാളെ നിയമിച്ചിട്ടുണ്ട്. പക്ഷെ അദ്ദേഹത്തിന് ഗാന്ധി ഭവനിലേക്ക് താമസം മാറണമെന്നാണ് പറയുന്നത്. നിറയെ ആളുകൾ ഉളള സ്ഥലത്ത് താമസിക്കണമെന്നാണ് ആഗ്രഹം.ഒറ്റപ്പെടലാണ് കാരണം.

ഞാനും അമ്മയും കരഞ്ഞുപോകുന്ന തരത്തിലാണ് അദ്ദേഹം സംസാരിച്ചത്. ഒറ്റപ്പെടൽ കാരണം മാതാപിതാക്കൾ ഗാന്ധിഭവൻ പോലുളള സ്ഥലങ്ങളിൽ പോയാൽ മക്കൾക്ക് അത് വലിയ ക്ഷീണമാണ്. ഇതിൽ മക്കളെയും കുറ്റം പറയാൻ പറ്റില്ല. അസുഖങ്ങൾ മക്കൾക്ക് ബുദ്ധിമുട്ടാകുമെന്ന് കരുതി മക്കളോടൊപ്പം നിൽക്കാൻ പോലും സാധിക്കാത്ത അവസ്ഥയാണ് അദ്ദേഹത്തിനുളളത്.

ഇത് എല്ലാ മനുഷ്യർക്കും ഉണ്ടാകുന്ന അവസ്ഥയാണ്. പണ്ട് കൂട്ടുകുടുംബമായതുകൊണ്ട് ഇത്തരത്തിലുളള പ്രശ്നങ്ങളില്ലായിരുന്നു. ഇതിൽ ആരുടെ പക്ഷത്ത് ചേരണമെന്ന് അറിയില്ല. ഇതുകേട്ടപ്പോൾ ഞാൻ എന്നെക്കുറിച്ച് ആലോചിച്ചു. ഞാൻ ജീവിതത്തിൽ ഒരു തവണ മാത്രമേ സോളോ ട്രിപ്പിന് പോയിട്ടുളളൂ. സ്വാതന്ത്ര്യത്തിന് വേണ്ടിയല്ല ഞാൻ ട്രിപ്പിന് പോയത്. ചെറുപ്പത്തിൽ ഷൂട്ടിന് പോകുമ്പോൾ അച്ഛനും അമ്മയും ഡ്രൈവറും അസിസ്റ്റൻസും ഉണ്ടാകും. അങ്ങനെ എനിക്ക് സഹായത്തിനായി ഒരുപാട് ആളുകളുണ്ടായിരുന്നു. വിവാഹം കഴിഞ്ഞതോടെ അതെല്ലാം മാറിമറിഞ്ഞു. ഞാനും ഭർത്താവും മാത്രമായി. ഒറ്റപ്പെട്ടുപോയി. ഇപ്പോൾ ഞാൻ നാട്ടിലാണ്. ഒറ്റപ്പെടലില്ല.

നമ്മൾ മരണത്തിലേക്ക് അടുക്കുകയാണ്. ശാരീരികമായി പലതും നിയന്ത്രിക്കാൻ പറ്റാത്ത അവസ്ഥയുണ്ടാകും. അമ്മയും അച്ഛനും നൽകുന്ന സ്‌നേഹവും സംരക്ഷണവും മറ്റാർക്കും നൽകാൻ കഴിയില്ല. അവരില്ലെങ്കിൽ നമ്മൾ എങ്ങനെ അതിജീവിക്കും. ആ പേടി വന്നപ്പോഴാണ് ഞാൻ സോളോ ട്രിപ്പ് ചെയ്യാൻ തുടങ്ങിയത്. ഒറ്റപ്പെടാൻ സാദ്ധ്യതയുണ്ടെന്ന് നമ്മൾ മനസിലാക്കണം.നമ്മളെ ആശ്രയിച്ച് ഒരുപാട് പേരുണ്ടെങ്കിൽ ഒറ്റപ്പെടില്ല. യാത്ര ചെയ്യുമ്പോൾ നമ്മൾ ശ്രദ്ധാലുക്കലാകും. ഞാൻ വാർദ്ധക്യത്തിലെത്തുമ്പോൾ ഒറ്റപ്പെടുമോ ഇല്ലയോ എന്നറിയില്ല.