ഇന്ദ്രജിത്തിനെ രക്ഷിക്കാന് പൃഥ്വിരാജ് അഥിതി വേഷത്തില്
നായക വേഷമേ ചെയ്യൂ എന്ന് വാശിപിടിച്ചിരിക്കുന്ന ഇന്ദ്രജിത്തിനെ രക്ഷിക്കാന് പൃഥ്വിരാജ് അതിഥി വേഷത്തില് എത്തുന്നു. ജി.എന് കൃഷ്ണകുമാര് സംവിധാനം ചെയ്യുന്ന ടിയാന് എന്ന ചിത്രത്തിലാണ് പൃഥ്വിരാജ് ഗസ്റ്റ് റോളില് പ്രത്യക്ഷപ്പെടുന്നത്. പൃഥ്വിരാജിനെ അഭിനയിപ്പിച്ച് ഉയര്ന്ന സാറ്റലൈറ്റ് അവകാശം നേടിയെടുക്കുകയാണ് ലക്ഷ്യം. മൂന്ന് വര്ഷത്തേക്ക് ഡേറ്റ് ബ്ളോക്ക് ചെയ്തിരിക്കുന്ന പൃഥ്വിരാജ് ഇന്ദ്രജിത്തിന്റെ നിര്ബന്ധത്തിന് വഴങ്ങിയാണ് ടിയാനില് അഭിനയിക്കാന് സമ്മതിച്ചത്. കൃഷ്ണകുമാര് ജയിംസ് ആന്റ് ആലീസിന്റെ ലൊക്കേഷനില് ആദ്യം കഥപറയാന് ചെന്നപ്പോള് ഡേറ്റില്ലെന്ന് പറഞ്ഞ് രാജു പറഞ്ഞയച്ചിരുന്നു. ഇതേ തുടര്ന്നാണ് ഇന്ദ്രജിത്ത് ഇടപെട്ടത്.
തന്റെ കൂടെയുള്ള ജയസൂര്യ, കുഞ്ചാക്കോബോബന് എന്നിവര് നായകന്മാരായി തിളങ്ങുമ്പോള് നായകന് തുല്യമല്ലാത്ത വേഷങ്ങള് ചെയ്യില്ലെന്ന ഉറച്ചനിലപാടിലാണ് ഇന്ദ്രജിത്ത്. അമര്, അക്ബര് ആന്റണിയില് അഭിനയിച്ചത് പോലും അതുകൊണ്ടാണ്. എന്നാല് ഇന്ദ്രജിത്തിനെ മാത്രം നായകനാക്കി സിനിമ നിര്മിക്കാന് ആരും തയ്യാറല്ല. അഭിനയം നല്ലതാണെങ്കിലും ഇന്ദ്രജിത്തിന് മാര്ക്കറ്റില്ലെന്നാണ് നിര്മാതാക്കളുടെയും വിതരണക്കാരുടെയും വാദം. മാത്രമല്ല ഉയര്ന്ന തുക സാറ്റലൈറ്റ് അവകാശമായി ലഭിക്കുകയുമില്ല. ഇതെല്ലാം കണക്കിലെടുത്താണ് ഇന്ദ്രജിത്ത് പൃഥ്വിരാജിനെ അഭിനയിപ്പിക്കാന് തീരുമാനിച്ചത്. ചേട്ടന്റെ നിര്ബന്ധത്തിന് അനുജന് വഴങ്ങി.
ജി.എന് കൃഷ്ണകുമാര് ആദ്യം സംവിധാനം ചെയ്ത കോളജ് ഡേയ്സിലും രണ്ടാമത്തെ ചിത്രമായ കാഞ്ചിയിലും ഇന്ദ്രജിത്തായിരുന്നു നായകന്. രണ്ട് ചിത്രങ്ങളും ബോക്സ് ഓഫീസില് വലിയ പരാജയമായിരുന്നു. അതുകൊണ്ടാണ് പൃഥ്വിരാജ് ആദ്യം ഡേറ്റ് നല്കാതിരുന്നത്. പിന്നെ മുരളിഗോപിയുടെ ലെഫ്റ്റ് റൈറ്റ് ലെഫ്റ്റ് കണ്ടത് മുതല് അദ്ദേഹത്തിന്റെ തിരക്കഥകളുടെ ആരാധകനാണ് പൃഥ്വിരാജ് അതും ടിയാനില് അഭിനയിക്കാന് കാരണമായി. 13 കോടിയാണ് ചിത്രത്തിന്റെ മുതല്മുടക്ക്.
https://www.facebook.com/Malayalivartha
