ബൗളിംഗിലൂടെ ക്രിക്കറ്റ് പ്രേമികളെ വിസ്മയിപ്പിച്ച് ലണ്ടനിലെ മൈതാനത്ത് ബോളിവുഡ് നടന്‍ സെയ്ഫ് അലി ഖാന്‍. കൗണ്ടി ക്രിക്കറ്റ് വേഷത്തില്‍ ബൗളിംഗ് ചെയ്യുന്ന സെയ്ഫിന്റെ വീഡിയോ സമൂഹ മാദ്ധ്യമങ്ങളില്‍ വൈറലാണ്.

പാരമ്പര്യത്തിന്റെ തുടര്‍ച്ചസെയ്ഫ് അലീഖാന്റെ പട്ടൗഡി കുടുംബത്തിന് ക്രിക്കറ്റുമായുള്ള ആത്മബന്ധം വളരെ വലുതാണ്. താരത്തിന്റെ പിതാവ് മന്‍സൂര്‍ അലി ഖാന്‍ പട്ടൗഡി ഇന്ത്യന്‍ ക്രിക്കറ്റിലെ എക്കാലത്തെയും മികച്ച ഇതിഹാസങ്ങളില്‍ ഒരാളായിരുന്നു. 21ാം വയസിലാണ് ഇദ്ദേഹം ഇന്ത്യന്‍ ടീമിന്റെ ക്യാപ്ടനായത്. മുത്തശ്ശന്‍ ഇഫ്തിഖര്‍ അലി ഖാന്‍ പട്ടൗഡിയാകട്ടെ 1946ല്‍ ഇന്ത്യന്‍ ക്രിക്കറ്റ് ടീമിനെ നയിക്കുകയും, അതിനുമുമ്പ് 1932ലും 1934ലും ഇംഗ്ലണ്ടിനായി ടെസ്റ്റ് ക്രിക്കറ്റ് കളിക്കുകയും ചെയ്തിട്ടുണ്ട്.

മകന്‍ തെയ്മൂറിനൊപ്പമുള്ള നിമിഷങ്ങള്‍നേരത്തെ സെയ്ഫിന്റെ മകന്‍ തെയ്മൂര്‍ അലി ഖാന്‍ ലണ്ടനിലെ ലോര്‍ഡ്‌സ് ക്രിക്കറ്റ് മൈതാനത്ത് പരിശീലനം നേടുന്നതിന്റെ ദൃശ്യങ്ങള്‍ സോഷ്യല്‍ മീഡിയയില്‍ ശ്രദ്ധനേടിയിരുന്നു. മുന്‍ ഇംഗ്ലണ്ട് താരം ഉസ്മാന്‍ അഫ്‌സാലിന്റെ നേതൃത്വത്തിലുള്ള ഐസിഎം ക്രിക്കറ്റ് അക്കാദമിയുടെ കീഴിലായിരുന്നു പരിശീലനം. പരിശീലനത്തിനിടയില്‍ കുടുംബത്തിന്റെ ക്രിക്കറ്റ് ചരിത്രത്തെക്കുറിച്ചും കൗണ്ടി ക്രിക്കറ്റിനെ പറ്റിയും സെയ്ഫ് മകന് പറഞ്ഞുകൊടുക്കുന്ന വീഡിയോയും ഏറെ ശ്രദ്ധ നേടിയിരുന്നു.

പ്രിയദര്‍ശന്‍ സംവിധാനം ചെയ്യുന്ന ത്രില്ലര്‍ ചിത്രം 'ഹൈവാന്‍'ആണ് സെയ്ഫ് അലി ഖാന്റെ വരാനിരിക്കുന്ന ചിത്രം. 18 വര്‍ഷങ്ങള്‍ക്ക് ശേഷം സെയ്ഫും അക്ഷയ് കുമാറും ഒന്നിക്കുന്നുവെന്ന പ്രത്യേകതയും പ്രിയദര്‍ശന്‍ ചിത്രത്തിനുണ്ട്. ബോമന്‍ ഇറാനി, സയാമി ഖേര്‍, ശ്രിയ പില്‍ഗോങ്കര്‍ എന്നിവരും പ്രധാന വേഷങ്ങളിലെത്തുന്ന ചിത്രം സെപ്തംബര്‍11ന് ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും.