കേസുടുത്താല് വിവരം അറിയുമേ സാറേ... കൈക്കുഞ്ഞുമായി ആശുപത്രിയിലേക്ക് പോയ ദമ്പതികളെ മദ്യം വാങ്ങാന് പോയ നടിമാര് തടഞ്ഞ് മര്ദ്ദിച്ചു; സംഭവം പൊല്ലാപ്പയതിങ്ങനെ
കൈക്കുഞ്ഞിനെ ആശുപത്രിയില് കൊണ്ടുപോയ കുടുംബത്തിനുനേരേ സിനിമാ, സീരിയല് നടിമാരുടെ കയ്യാങ്കളി. മദ്യം വാങ്ങി ഒരു സ്കൂട്ടറില് വരികയായിരുന്നു ഈ നടിമാര്. കാര് പെട്ടെന്നു ബ്രേക്കിട്ടതു ചോദ്യംചെയ്താണ് കൈക്കുഞ്ഞുമായി മുന് സീറ്റിലിരുന്ന സ്ത്രീയെ തല്ലിയത്. സംഭവത്തില് കടവന്ത്ര കുമാരനാശാന് നഗര് സെന്റ് സെബാസ്റ്റിയന് റോഡ് ഗാലക്സി വിന്സ്റ്ററില് സാന്ദ്ര ശേഖര് (26), തൃശൂര് മുളങ്കുന്നത്തുകാവ് നങ്ങേത്തില് എം. അജിത (25), കോട്ടയം അയ്യര്കുളങ്ങര വല്ലകം മഠത്തില്പറമ്പില് ശ്രീല പത്മനാഭന് (30) എന്നിവരെ കടവന്ത്ര പോലീസ് അറസ്റ്റ് ചെയ്തു. താരസംഘടനയായ അമ്മയുടെ പ്രവര്ത്തകരാണെന്നും കേസെടുത്താല് വിവരമറിയുമെന്നുമായിരുന്നു ഇവരുടെ ഭീഷണി.
ഇന്നലെ വൈകുന്നേരം അഞ്ചരയ്ക്ക് കടവന്ത്ര പമ്പ് ജങ്ഷനിലായിരുന്നു കൈയാങ്കളി. ഹൈക്കോടതി അഭിഭാഷകനായ വൈറ്റില സ്വദേശി പി. പ്രജിത്തും ഭാര്യ ശ്രീജയും രണ്ടു മക്കളുമായിരുന്നു കാറില്. മുമ്പില് പോയ ഓട്ടോറിക്ഷ പെട്ടെന്നു തിരിഞ്ഞതിനാല് പ്രജിത്ത് കാര് പെട്ടെന്നു ബ്രേക്ക് ചെയ്തു. ഇതോടെ തൊട്ടുപിന്നാലെ സ്കൂട്ടറില് വന്ന യുവതികള് ഇടതുവശത്തുകൂടി കയറി കാര് തടഞ്ഞുനിര്ത്തിയ ശേഷം അസഭ്യവര്ഷമായി.
പ്രജിത്ത് കാറില്നിന്നു പുറത്തിറങ്ങാന് ശ്രമിച്ചപ്പോള് ഭാര്യ ശ്രീജ തടഞ്ഞു. തുടര്ന്ന്, ശ്രീജയെ മൂവര് സംഘം ചീത്തവിളിക്കുകയും സാന്ദ്ര അടിക്കുകയുമായിരുന്നെന്ന് പോലീസ് പറഞ്ഞു. മടിയിലായിരുന്നതിനാല് അടി പതിനെട്ടു ദിവസം മാത്രം പ്രായമുള്ള കുഞ്ഞിന്റെ ദേഹത്തുകൊണ്ടില്ല. സാന്ദ്രയാണു സ്കൂട്ടര് ഓടിച്ചത്.
പരാക്രമം കണ്ടു മറ്റു വാഹനങ്ങളിലുള്ളവര് പുറത്തിറങ്ങിയപ്പോള് യുവതികള് അവരോടും കയര്ത്തു. ഇതോടെ അരമണിക്കൂര് കലൂര്കടവന്ത്ര റോഡില് ഗതാഗതം തടസപ്പെട്ടു. എസ്.ഐ ടി. ഷാജിയുടെ നേതൃത്വത്തില് പോലീസെത്തി മൂവരെയും കസ്റ്റഡിയിലെടുത്തു. യുവതികള് മദ്യപിച്ചിട്ടില്ലെന്നു പരിശോധനയില് മനസിലായെങ്കിലും ജനറല് ആശുപത്രിയിലെത്തിച്ചു വിശദ പരിശോധന നടത്തി.
മര്ദനം, ഭീഷണിപ്പെടുത്തല്, അസഭ്യം പറയല് എന്നീ കുറ്റങ്ങള്ക്കു കേസെടുത്തതായി പോലീസ് പറഞ്ഞു. ഇവര് സഞ്ചരിച്ച സ്കൂട്ടറില്നിന്നു മൂന്നു കുപ്പി ബിയര് കണ്ടെടുത്തു. സാന്ദ്ര കടവന്ത്രയിലും അജിതയും ശ്രീലയും പാലാരിവട്ടത്തെയും ഫ്ളാറ്റിലാണു താമസം.
https://www.facebook.com/Malayalivartha
