ദിലീപ് സംസ്ഥാനത്തെ 1000 നിര്ധന കുടുംബങ്ങള്ക്കു വീടു നിര്മിച്ചു നല്കുന്നു
55 കോടി രൂപയുടെ പദ്ധതിയുമായി സംസ്ഥാനത്തെ 1000 നിര്ധന കുടുംബങ്ങള്ക്കു വീടു നിര്മിച്ചു നല്കാന് ചലച്ചിത്ര നടന് ദിലീപ്. ആലുവ കേന്ദ്രമായ ജിപി ചാരിറ്റബിള് ട്രസ്റ്റ്, കേരള ആക്ഷന് ഫോഴ്സ് എന്നിവയുടെ നേതൃത്വത്തില് നടപ്പാക്കുന്ന പദ്ധതിക്കു വിവിധ സന്നദ്ധ സംഘടനകളുടെ സഹായം ഉണ്ട്. പദ്ധതിക്കു പ്രേരണയായത് അടച്ചുറപ്പില്ലാത്ത വീട്ടില് അന്തിയുറങ്ങേണ്ടിവന്ന നിയമ വിദ്യാര്ഥിനി ജിഷയുടെ ദാരുണ അന്ത്യമാണു ദിലീപ് പറഞ്ഞു. സമാന സാഹചര്യത്തില് കഴിയുന്നവര്ക്കാണു വീട് അനുവദിക്കുന്നതില് മുന്ഗണന. 'സുരക്ഷിത ഭവനം' എന്നാണ് ഈ വീടുകള്ക്കു പേരിടുക.
സമൂഹവുമായി ബന്ധപ്പെട്ടു നില്ക്കുന്നവരാണു കലാകാരന്മാര്. അതുകൊണ്ടാണു വരുമാനത്തിന്റെ ഒരു ഭാഗം സാമൂഹിക സേവനത്തിനു മാറ്റിവയ്ക്കുന്നത്. 'ഒരു കൈകൊണ്ടു സഹായിക്കുന്നതു മറുകൈ അറിയരുത്' എന്നാണു പറയാറെങ്കിലും മറ്റുള്ളവരുടെ സഹായം കൂടി കിട്ടാനാണു പദ്ധതി പരസ്യമാക്കുന്നതെന്നും ദിലീപ് പറഞ്ഞു.
സംസ്ഥാനത്തിന്റെ ഏതു ഭാഗത്തുള്ളവര്ക്കും വീടിന് അപേക്ഷിക്കാം. സ്വന്തമായി രണ്ടു സെന്റ് ഭൂമിയെങ്കിലും ഉണ്ടായിരിക്കണം. ജോലിയില്ലാത്ത വിധവകള്ക്കു പ്രത്യേക പരിഗണന നല്കും. ഒരു വീടിന് അഞ്ചര ലക്ഷം രൂപയാണു ചെലവു പ്രതീക്ഷിക്കുന്നത്. ദിലീപ് ഫാന്സ് അസോസിയേഷന്റെയും കേരള ആക്ഷന് ഫോഴ്സിന്റെയും വൊളന്റിയര്മാര് അപേക്ഷകരുടെ ജീവിതസാഹചര്യം പരിശോധിച്ച് അര്ഹരായവരെ കണ്ടെത്തുമെന്ന് ആക്ഷന് ഫോഴ്സ് പ്രസിഡന്റ് ഡോ. സി.എം.ഹൈദരാലി പറഞ്ഞു.
ആറു വീടുകളുടെ നിര്മാണം ഉടന് ആരംഭിക്കും. ജൂണ് 23നു സ്കൂട്ടറില് സഞ്ചരിക്കുമ്പോള് മരം വീണു മരിച്ച ആലുവ സ്വദേശി ടി.കെ.സുരേഷിന്റെ ഭാര്യയും രണ്ടു പെണ്കുട്ടികളും അടങ്ങിയ കുടുംബത്തിനാണ് ആദ്യ വീട്. അന്വര് സാദത്ത് എംഎല്എയുടെ അഭ്യര്ഥന അനുസരിച്ചാണിത്. സ്വന്തം ഭൂമിയില്ലാത്ത ഇവര്ക്കു സര്ക്കാരില് നിന്ന് അതു ലഭ്യമാക്കാമെന്ന് എംഎല്എ ഉറപ്പു നല്കി.
ജിപി ട്രസ്റ്റും ആക്ഷന് ഫോഴ്സും ചേര്ന്ന് ആലുവ മേഖലയില് മുന്പ് 66 വീടുകള് നിര്മിച്ചുനല്കിയിട്ടുണ്ട്. പദ്ധതിയില് പങ്കുചേരാന് താല്പര്യമുള്ളവര്ക്ക് ഇന്ഡസ് ഇന്ഡ് ബാങ്കിന്റെ ആലുവ ശാഖയിലേക്കു പണം അയയ്ക്കാം. അക്കൗണ്ട് നമ്പര്: 200010638611. ഐഎഫ്എസ് കോഡ്: indb 0000227. ഫോണ്: 94471 87868, 94475 77823.
https://www.facebook.com/Malayalivartha
