വ്യാജ ഐഡിയില്‍ നിന്നും തനിക്കെതിരെ ഫേസ്ബുക്ക് പോസ്റ്റ് നടത്തുന്നവര്‍ ഭീരുക്കളാണെന്ന് നടന്‍ ആസിഫ് അലി. തനിക്കെതിരെ പ്രതികരിക്കണമെന്നുണ്ടെങ്കില്‍ നേരിട്ടാവാമെന്നും ആസിഫ് അലി പറയുന്നു. 

ഭാര്യയും കുഞ്ഞുമൊത്ത് ആസിഫ് അലി നില്‍ക്കുന്ന ചിത്രമാണ് വിവാദമായത്. ബുര്‍ഖയിട്ടാണ് ചിത്രത്തില്‍ ആസിഫിന്റെ ഭാര്യ നില്‍ക്കുന്നത്. സോഷ്യല്‍ മീഡിയയിലാണ് ചിത്രം ആദ്യം പോസ്റ്റ് ചെയ്തത്. പിന്നീട് അത് ഒരു വാരികയുടെ കവര്‍ ചിത്രമായി. ആസിഫ് അലിയുടെ നിര്‍ബന്ധപ്രകാരമാണ് ഭാര്യ ബുര്‍ഖയിടുന്നതെന്നാണ് ആരോപണം. എന്നാല്‍ താന്‍ ഭാര്യയെ ബുര്‍ഖയിടാന്‍ നിര്‍ബന്ധിക്കാറില്ലെന്നും കര്‍ശനമായ മതചിട്ടകള്‍ക്കൊത്താണ് ഭാര്യ വളര്‍ന്നതെന്നും ആസിഫ് അലി പറയുന്നു. ഇസ്ലാമിന്റെ ചിട്ടകള്‍ക്കൊത്ത് വളര്‍ന്ന സമയെ നിയന്ത്രിക്കാന്‍ താനൊരുക്കമല്ലെന്നും അദ്ദേഹം പറയുന്നു. 

മതപരമായ ആചാരങ്ങള്‍ അനുസരിക്കാന്‍ താന്‍ ഭാര്യയെ നിര്‍ബന്ധിക്കുന്നു എന്ന് ആരോപണം ഉന്നയിച്ചവര്‍ക്ക് സിനിമാ രംഗത്ത് നിന്നും മറുപടി നല്‍കിയവര്‍ക്ക് നന്ദിയുണ്ടെന്നും ആസിഫ് അലി പറയുന്നു. ആഷിക്ക് അബുവും എം.എ നിഷാദുമാണ് തന്റെ കുടുംബചിത്രം ഷെയര്‍ ചെയ്തത്. 

താനൊരു സിപിഎമ്മുകാരനാണെന്നും ആസിഫ് അലി പറയുന്നു. തന്റെ ബാപ്പ പാര്‍ട്ടിയുടെ ലോക്കല്‍ കമ്മിറ്റി സെക്രട്ടറിയാണ്. പിണറായിക്കും ജയരാജനും ഷംസീറിനും വേണ്ടി താന്‍ തെരഞ്ഞെടുപ്പ് പ്രചരണത്തിന് ഇറങ്ങിയിരുന്നു. എന്നാല്‍ തന്റെ വീടിനു നേരെയുണ്ടായ ആക്രമണത്തെ തുടര്‍ന്ന് താന്‍ സിപിഎമ്മിനെതിരായെന്നാണ് ആരോപണം. തനിക്ക് പാര്‍ട്ടിയെക്കാളേറെ വ്യക്തികളോട് താത്പര്യമെന്നും ആസിഫ് അലി പറയുന്നു. തനിക്കെതിരെ ആരോപണം ഉന്നയിക്കുമ്പോള്‍ മര്യാദയോടെ പെരുമാറണമെന്നും ആസിഫ് അലി പറയുന്നു.