തെലുങ്കില്‍ ഉണ്ണി മുകുന്ദന്‍ എത്തിയപ്പോള്‍ ആദ്യം പഠിച്ചത്
തെലുങ്കു സിനിമയുടെ സെറ്റിലെത്തിയപ്പോള്‍ നടന്‍ ഉണ്ണി മുകുന്ദന്‍ പ്രൊഡക്ഷന്‍ മാനേജരോട് ആദ്യം ചോദിച്ചത് 'എനിക്കു വെള്ളം വേണം' എന്ന് എങ്ങനെ തെലുങ്കില്‍ പറയാമെന്നാണ്. അല്‍പം കഷ്ടപ്പെട്ടിട്ടാണെങ്കിലും 'മജാ നീരു പവാലി' എന്ന വാക്കു പഠിച്ചെടുത്തു. തെലുങ്കില്‍ ഉണ്ണിയുടെ ആദ്യ സിനിമ, ജനതാ ഗാരിജ്, മോഹന്‍ലാലിനൊപ്പമാണ്. അതും വില്ലനായി. രണ്ടാമത്തെ ചിത്രത്തില്‍ നായകനാണ്. തെന്നിന്ത്യയിലെ സുന്ദരിമാരില്‍ പ്രമുഖയായ അനുഷ്‌ക ഷെട്ടിയാണു ഉണ്ണിയുടെ നായിക.
തെലുങ്ക് തെരുസാ ജനതാ ഗാരിജിന്റെ സെറ്റില്‍ ലാലേട്ടന്‍ തെലുങ്ക് ഡയലോഗ് പഠിച്ചെടുക്കുന്നതു കണ്ടപ്പോഴാണ് എന്നാ പിന്നെ തെലുങ്കിനെ പേടിക്കുന്നതെന്തിനെന്നു തോന്നിയത്. ഡയലോഗ് മനഃപാഠമാക്കി പഠിക്കുകയായിരുന്നു. അതു പിന്നീടു ഡബ്ബിങ്ങിനെത്തിയപ്പോള്‍ സഹായകരമായി.
നാലു മണിക്കൂര്‍ കൊണ്ടു ഡബ്ബിങ് പൂര്‍ത്തിയാക്കിയപ്പോള്‍ ലോകം കീഴടക്കിയ സന്തോഷം. ഒരു ഭാഷയെക്കൂടി വളച്ചെടുത്ത ചാരിതാര്‍ഥ്യം. പുതുമുഖമായി ആദ്യ സിനിമയുടെ സെറ്റിലെത്തിയ അതേ വികാരമായിരുന്നു ജനതാ ഗാരിജിന്റെ സെറ്റിലും. കരിയറിന്റെ ഏറ്റവും വലിയ സംഭവം, ആദ്യമായി മറ്റൊരു ഭാഷയുടെ മുറ്റത്തെത്തുമ്പോഴുള്ള ഒരു ടെന്‍ഷന്‍. പക്ഷേ, ലാലേട്ടന്റെ പിന്തുണ ഒപ്പമുള്ളപ്പോള്‍ പിന്നെയെന്തിനു ടെന്‍ഷന്‍. ഉണ്ണിക്കു ആത്മധൈര്യമേറി.
ജനതാ ഗാരിജില്‍ നിന്ന് ഉണ്ണി പോകുന്നത് അടുത്ത തെലുങ്ക് സിനിമയിലേക്കാണ്. പ്രമുഖ ബാനറായ യുവി പ്രൊഡക്ഷന്‍സിന്റെ ബാഗ്മതി എന്ന ചിത്രത്തില്‍ നായകനായി. അനുഷ്‌ക ഷെട്ടിയാണു നായിക. ഓഗസ്റ്റില്‍ ചിത്രീകരണ സംഘത്തിനൊപ്പം ചേരുന്ന ഉണ്ണിക്കിപ്പോള്‍ നോ ടെന്‍ഷന്‍. തെലുങ്കു പറയാനും പറയിക്കാനും അഭിനയിക്കാനും ഇപ്പോള്‍ എക്‌സ്ട്രാ ആത്മധൈര്യമാണ്. അല്‍പം കട്ടിയുള്ള ഡയലോഗ് തൊണ്ടയില്‍ കുരുങ്ങിയാല്‍ മജാ നീരു പവാലി എന്നു പറഞ്ഞാ മതിയെന്ന് ഉണ്ണിക്കറിയാം..!!
https://www.facebook.com/Malayalivartha
