വളരെ സുഖകരമായി ഒപ്പം ജോലിചെയ്യാന്‍ സാധിക്കുന്ന സംവിധായകനാണ് അടൂര്‍ ഗോപാലകൃഷ്ണന്‍ എന്നു നടന്‍ ദിലീപ്. മറ്റു സിനിമകളില്‍ അഭിനയിക്കുമ്പോള്‍ പല കാര്യങ്ങളെക്കുറിച്ചു ടെന്‍ഷന്‍ ഉണ്ടായിരുന്നുവെങ്കില്‍ 'പിന്നെയും' എന്ന ചിത്രത്തില്‍ അഭിനയിക്കുമ്പോള്‍ ഒന്നിനെക്കുറിച്ചും തനിക്കു ചിന്തിക്കേണ്ടി വന്നിട്ടില്ലെന്നു ദിലീപ് പറഞ്ഞയുന്നു.
'അടൂര്‍ സാറിനെ വച്ചു പടം എടുക്കാന്‍' സാധിച്ചതു മലയാളത്തില്‍ ഒരു നടനും ലഭിക്കാത്ത ഭാഗ്യമാണെന്നു ദിലീപ് തമാശയായി പറഞ്ഞു.''പഞ്ചാബി ഹൗസിനു ശേഷം ഞാന്‍ അടൂരിനെ കണ്ട് ഒരു സിനിമയില്‍ അഭിനയിക്കാന്‍ അവസരം ചോദിച്ചിരുന്നു. അവസരം വന്നാല്‍ വിളിക്കാമെന്നു പറഞ്ഞ് അദ്ദേഹം എന്നെ ആശ്വസിപ്പിച്ചു വിട്ടു. ഞാന്‍ അസിസ്റ്റന്റ് ഡയറക്ടറായിരിക്കെ, കമല്‍ സാര്‍ പലരെയും ആശ്വസിപ്പിച്ചു വിടുന്നതു കണ്ടിട്ടുണ്ട്. പിന്നീട് പലതവണ അടൂരിനെ കണ്ടെങ്കിലും അദ്ദേഹം എന്നെ മറന്നുവെന്നു തോന്നി.
ഇതിനിടെ, കാവ്യ അദ്ദേഹത്തിന്റെ സിനിമയില്‍ അഭിനയിക്കുകയും ചെയ്തു. അങ്ങനെയിരിക്കെ, ഓര്‍ക്കാപ്പുറത്താണ് ഈ സിനിമയിലേക്ക് വിളി വന്നത്. ഇതു വലിയ അംഗീകാരമാണ്. ഒരുപാടു കാര്യങ്ങള്‍ അടൂരില്‍ നിന്നു പഠിക്കാന്‍ സാധിച്ചു. സംശയം ചോദിക്കുമ്പോഴെല്ലാം മുഖം കറുപ്പിക്കാതെ അദ്ദേഹം ഉത്തരം പറഞ്ഞു തന്നു. 'പിന്നെയും' അടൂരിന്റെ ഒരു പടം കൂടി ലഭിക്കണമേയെന്നാണ് എന്റെ മോഹം.''അടൂര്‍ ആര്‍ക്കും തിരക്കഥ നല്‍കാറില്ലെന്നു കേട്ടിട്ടുണ്ട്. പക്ഷെ, അദ്ദേഹം എനിക്കു തിരക്കഥ വായിക്കാന്‍ തന്നു. വായിക്കാന്‍ പറഞ്ഞ അത്രയും സ്ഥലം വരെ മാത്രമേ വായിച്ചിട്ടുള്ളൂ. കൂടുതല്‍ വായിച്ചാല്‍ അദ്ദേഹം കാണുമല്ലോ എന്ന പേടി മൂലം വായിച്ചില്ല.
ഓരോ സീനിലും എങ്ങനെ ചെയ്യണമെന്ന് അദ്ദേഹം പറഞ്ഞു തരും. കൈ കൂടുതല്‍ ആട്ടരുതെന്നു പറയുമ്പോള്‍ അതിന്റെ കാരണവും അദ്ദേഹം വിശദീകരിക്കും. എല്ലാം കഴിഞ്ഞപ്പോള്‍ ഇന്‍സ്റ്റിറ്റിയൂട്ടില്‍ പഠിച്ച തോന്നലാണ് ഉണ്ടായത്'' ദിലീപ് ചൂണ്ടിക്കാട്ടി. വീണ്ടുമൊരു അടൂര്‍ സിനിമ ചെയ്യാന്‍ സാധിച്ചതില്‍ ഒരുപാട് സന്തോഷമുണ്ടെന്നു കാവ്യ മാധവന്‍ പറഞ്ഞു. എല്ലാവരുടെയും പ്രതീക്ഷയ്‌ക്കൊത്ത സിനിമയായിരിക്കും 'പിന്നെയും' എന്നു വിശ്വാസമുണ്ട്. ദിലീപേട്ടനു തിരക്കിനിടെ, അടൂര്‍സാര്‍ അറിയാതെ തിരക്കഥ കൊടുത്തു പോയതാണ്. അതുമായി നമുക്ക് ഓടിക്കളഞ്ഞാലോ എന്ന് അപ്പോള്‍ ദീലിപേട്ടന്‍ എന്നോടു പറയുകയുണ്ടായി കാവ്യ ഓര്‍മിച്ചു.
തനിക്ക് ഈ ചിത്രത്തില്‍ നീണ്ട ഒരു സീന്‍ മാത്രമാണുള്ളതെന്നും അതു തനിക്കു വേണ്ടി എഴുതിച്ചേര്‍ത്തതാണെന്ന് അടൂര്‍ പറയുകയുണ്ടായെന്നും കെപിഎസി ലളിത അറിയിച്ചു. പടത്തിനു നീളം കൂടിയതിനാല്‍ ആ സീന്‍ പിന്നീട് അടൂര്‍ സാര്‍ വെട്ടിക്കളഞ്ഞു എന്നു ദിലീപ് ഇടയ്ക്കു കയറിപ്പറഞ്ഞതു ചിരി പടര്‍ത്തി. അടൂരിന്റെ സെറ്റില്‍ താന്‍ ചെല്ലുമ്പോള്‍ എല്ലാവരും വളരെ ഗൗരവത്തിലായിരുന്നുവെന്ന് ലളിത ഓര്‍മിച്ചു. താന്‍ ചെന്ന ശേഷമാണ് എല്ലാവരും തുറന്നു ചിരിക്കാന്‍ തുടങ്ങിയതെന്നും ലളിത ചേച്ചി പറഞ്ഞു.