ഒരു കാലത്ത് സംഗീത ആരാധകരുടെ പ്രിയ ഗായികയായിരുന്നു മച്ചാട് വാസന്തി. പ്രശസ്ത സംഗീത സംവിധായകന്‍ എംഎസ് ബാബുരാജിന്റെ പച്ചപ്പനംതത്തേ പുന്നാര പൂമുത്തേ.. എന്ന പ്രശസ്തമായ ഗാനത്തിലൂടെ സംഗീതാസ്വാദകരുടേയും പ്രിയഗായികയായി. എംഎസ് ബാബുരാജിന്റെ പ്രിയപ്പെട്ട ഗായികയായിരുന്നു മച്ചാട് വാസന്തി. എന്നാല്‍ തുടര്‍ച്ചയായി നിര്‍ഭാഗ്യം വേട്ടയാടിയപ്പോള്‍ ഒന്നെഴുന്നേല്‍ക്കാന്‍ പോലും പരസഹായം വേണമെന്ന ദുരവസ്ഥയിലേക്ക് അവര്‍ എറിയപ്പെട്ടു. 

1957ല്‍ റിലീസായ മിന്നാമിനുങ്ങിലെ 'ആരു ചൊല്ലിടും',അമ്മുവിലെ 'കുഞ്ഞിപ്പെണ്ണിന്', എന്നീ ഗാനങ്ങളും വാസന്തിയിലെ ഗായികയെ ശ്രദ്ധേയയാക്കി. 2006ല്‍ വടക്കുനാഥനിലെ തത്തക തത്തക എന്ന ഗാനത്തിലാണ് ചലച്ചിത്ര പിന്നണിയില്‍ വാസന്തിയുടെ നാദം അവസാനമായി റെക്കോഡ് ചെയ്യപ്പെട്ടത്.

സംഗീതം മാത്രം കൂട്ടായി ഉണ്ടായിരുന്ന വാസന്തിക്ക് നാല് വര്‍ഷം മുന്‍പ് ഒരു സംഗീത പരിപാടി കഴിഞ്ഞ് വരും വഴിയാണ് ആദ്യമായി അപകടം പറ്റിയത്. അന്ന് കാല്‌തെറ്റി റോഡില്‍ വീണ അവരുടെ സംഗീതത്തിന് ആദ്യമായി ഇടവേള ഉണ്ടായി. അപകടത്തില്‍ വലതുകൈക്ക് പരുക്കേറ്റ് വാസന്തി ദീര്‍ഘനാളുകള്‍ക്ക് ശേഷമാണ് പിന്നീട് പരിപാടികളില്‍ സാന്നിദ്ധ്യമറിയിച്ചത്. പക്ഷെ അധികം നീണ്ടു നിന്നില്ല. അതിനു മുമ്പ് തന്നെ വീണ്ടും ഒരു പരിപാടി കഴിഞ്ഞ് വരുന്നതിനിടെ ഉണ്ടായ വീഴ്ചയില്‍ ഇടതു കൈക്കും പരുക്കേറ്റു. തുടര്‍ന്നൊരു ദിനത്തിലുണ്ടായ മറ്റൊരു ഓട്ടോ അപകടത്തില്‍ ഇടുപ്പെല്ലിനും ക്ഷതമേറ്റു. അതോടെ കിടപ്പിലായ മച്ചാട് വാസന്തിയെ തിരിഞ്ഞുനോക്കാന്‍ പോലും ആരും ഉണ്ടായിരുന്നില്ല. തുടര്‍ന്ന് മാധ്യമങ്ങളിലൂടെയാണ് അവരുടെ ദുരവസ്ഥ പുറംലോകം അറിയുന്നത്.

ചികിത്സയ്ക്ക് പോലും പണമില്ലാതെ കിടപ്പിലായ മുന്‍പിന്നണിഗായിക മച്ചാട് വാസന്തിക്ക് കൈത്താങ്ങായി മെഗാതാരം മമ്മൂട്ടിയും എം3ഡിബി ഫേസ്ബുക്ക് കൂട്ടായ്മയും രംഗത്തെത്തി. ചികിത്സക്ക് പണമില്ലാതെ കാരുണ്യത്തിനായി കാത്തുകിടന്ന മച്ചാട് വാസന്തിക്ക് ചികിത്സാസഹായമായി നവമാധ്യമ കൂട്ടായ്മ ദിവസങ്ങള്‍ക്കൊണ്ട് പിരിച്ചെടുത്തത് 79000 രൂപയാണ്. മലയാളം മൂവി ആന്റ് മ്യൂസിക് ഡാറ്റാബേസ് (എം3ഡിബി ) എന്ന ഫേസ്ബുക്ക് കൂട്ടായ്മയാണ് ഈ വലിയ തുക പിരിച്ചെടുത്ത് ഗായികക്ക് കൈമാറിയത്. ഒപ്പം കാരുണ്യ ഹസ്തവുമായി മലയാളത്തിന്റെ മെഗാതാരം മമ്മൂട്ടിയും എത്തിയത് ഇവര്‍ക്ക് വേദനക്കിടയിലും വലിയ സന്തോഷം നല്‍കി. മമ്മൂട്ടി ചെയര്‍മാനായ കെയര്‍ ആന്റ് ഷെയര്‍ ഇന്റര്‍നാഷണലിന്റെ ധനസഹായം മച്ചാട് വാസന്തിക്ക് കൈമാറിയിട്ടുണ്ട്.

അപകടത്തെ തുടര്‍ന്ന് കിടപ്പിലായ വാസന്തിയുടെ ശസ്ത്രക്രിയയ്ക്ക് 50000 രൂപയാണ് ചെലവ് പ്രതീക്ഷിക്കുന്നത്. ശസ്ത്രക്രിയ കഴിഞ്ഞാലുടനെ സംഗീത ലോകത്തേക്ക് തിരിച്ച് വരാനാകുമെന്ന് മച്ചാട് വാസന്തി പ്രതീക്ഷ പ്രകടിപ്പിച്ചു. കടുത്ത വേദനകള്‍ക്കിടയില്‍ അടുത്തിടെ വന്ന മറവിരോഗവും ഒരുഭാഗത്ത് ഈ കലാകാരിയെ തളര്‍ത്തികൊണ്ടിരിക്കുകയാണ്. എന്നാലും തന്റെ രക്തത്തില്‍ അലിഞ്ഞു ചേര്‍ന്നിട്ടുള്ള സംഗീതത്തെ കൈവിടില്ലെന്ന് വാസന്തി ഉറപ്പിച്ചു പറയുന്നു.