മലയാള സിനിമയിലെ ഉരുക്കു മനുഷ്യന്‍, ഇന്ത്യന്‍ സിനിമയിലെ 'റോക്ക്' എന്നൊക്കെയുള്ള വിശേഷണങ്ങള്‍ക്ക് യോഗ്യനായ നടനാണ് അബു സലിം എന്ന വായനാടുകാരന്‍. മനുഷ്യര്‍ക്കൊക്കെ തന്നോടു തോന്നുന്ന ദേഷ്യത്തിന് അവരോടൊക്കെ നന്ദിയും സ്‌നേഹവും ഉണ്ടെന്ന് പറയുന്നൊരാള്‍. വര്‍ഷങ്ങളായി സിനിമയില്‍ നായകന്മാര്‍ക്കെതിരെയും നായകന്മാരോടൊപ്പവും നിന്ന് തല്ലു കൊള്ളുന്ന വില്ലന്‍ അബു സലീമിനെ കാണുന്നവര്‍ ഇങ്ങേരെ കാരിരുമ്പു കൊണ്ടുണ്ടാക്കിയതാണോ എന്ന സംശയം തോന്നിപ്പോകും.

1979 ല്‍ പോലീസില്‍ ചേരുന്നതിനു മുന്‍പേ സുകുമാരന്‍ ആദ്യമായി ഹീറോ ആയ 'രാജന്‍ പറഞ്ഞ കഥ'യാണ് ആദ്യത്തെ സിനിമ. അതു കഴിഞ്ഞ് 'അങ്ങാടി' എന്ന സിനിമയിലേക്ക് ഓഫര്‍വന്നെങ്കിലും അഭിനയിക്കാന്‍ കഴിഞ്ഞില്ല. പൊലീസില്‍ ജോലി കിട്ടി, ട്രെയിനിങ്ങിലായിരുന്നതുകൊണ്ട് കുറച്ചു നാള്‍ സിനിമയൊന്നും ചെയ്തില്ല.

നടനും മുന്‍ മിസ്റ്റര്‍ യൂണിവേഴ്‌സുമായ ആര്‍നള്‍ഡിനെ നേരില്‍ കാണണമെന്നത് ചെറുപ്പം മുതലേയുള്ള ആഗ്രഹമാണ്. അങ്ങനെയിരിക്കെ ഒരു ദിവസം നടന്‍ വിക്രം വിളിച്ചു 'ഐ' എന്ന ചിത്രത്തിന്റെ ഓഡിയോ ലോഞ്ചിനായി ആര്‍നള്‍ഡ് വരുന്നു അര്‍ണോള്‍ഡിനെ കാണണ്ടേ വേഗം ചെന്നൈക്ക് വരൂ എന്ന്. നേരെ ചെന്നൈയ്ക്കു വിട്ടു. മുഖ്യമന്ത്രിയുടെ പ്രത്യേക നിര്‍ദേശമുള്ളതുകൊണ്ട് വന്‍ സുരക്ഷാക്രമീകരണങ്ങളാണ്. ആരേയും കാണാന്‍ സമ്മതിക്കില്ല എന്ന് സുരക്ഷാ ഉദ്യോഗസ്ഥര്‍ പറഞ്ഞു.

പൊലീസുകാരുമായുള്ള പരിചയം വച്ച് ഹോട്ടലില്‍ അദ്ദേഹം ഭക്ഷണം കഴിക്കുന്നതിനടുത്തെത്തി. റിസപ്ഷനിലേക്കു പോകുന്ന വഴിയില്‍ നിന്നു. സുരക്ഷാ ഉദ്യോഗസ്ഥര്‍ തീര്‍ത്ത വലയത്തിലൂടെ സാക്ഷാല്‍ ആര്‍നള്‍ഡ് നടന്നു പോകുന്നു.ഇത്രയും കൊല്ലം മനസ്സില്‍ സൂക്ഷിച്ച അടങ്ങാത്ത ആഗ്രഹത്തിന്റെയൊരു തരംഗമുണ്ടല്ലോ, അതിലൊന്ന് അദ്ദേഹത്തിന്റെയടുത്ത് എത്തിക്കാണും. ആര്‍നള്‍ഡ് അബു സലീമിനെ നോക്കി നോക്കി കൈവീശി വിഷ് ചെയ്തു.
പിറകിലുള്ള ആരോടെങ്കിലും ആണോ എന്ന് തിരിഞ്ഞു നോക്കി. അല്ല, അബു സലീമിനോട് തന്നെ. നടക്കുന്ന വഴി അദ്ദേഹത്തോടൊപ്പം ചെന്ന് ഞാന്‍ സ്വയം പരിചയപ്പെടുത്തി. ബോഡി ബില്‍ഡറാണെന്നറിഞ്ഞപ്പോള്‍ സെക്യൂരിറ്റി ഉദ്യോഗസ്ഥരെ മാറ്റി ഒപ്പം നിന്ന് ഫോട്ടോ എടുക്കാനും അദ്ദേഹം സമ്മതിച്ചു.
പോകാന്‍ നേരം ആര്‍നള്‍ഡ് പറഞ്ഞു 'യൂ ഹാവ് എ ഗുഡ് ബോഡി'. ജീവിതത്തില്‍ രണ്ടേ രണ്ടുതവണ മാത്രമേ ഞാന്‍ കരഞ്ഞിട്ടുള്ളൂ.ഒന്ന് മിസ്റ്റര്‍ ഇന്ത്യയായപ്പോഴും പിന്നെ, ആര്‍നള്‍ഡിനെ കണ്ടപ്പോഴും അബു സലിം ഓര്‍മ്മിക്കുന്നു. ഒരു ദേശീയ മാധ്യമത്തിന് നല്‍കിയ അഭിമുഖത്തിലാണ് ഇക്കാര്യം അബു സലിം പറഞ്ഞത്.

തന്റെ അറുപതാം വയസിലും ഇരുപതുകാരന്റെ ശരീരമുള്ള അബു സലീമിന് കരാട്ടേ ബ്ലാക്ക് ബെല്‍റ്റുണ്ട്. അത്ലറ്റിക്‌സ്, കബഡി, റെസ്ലിങ്, റിവോള്‍വര്‍ ഷൂട്ടിങ് എന്നിവയിലൊക്കെ കമ്പമുള്ള അബു സലീമിന് ഇപ്പോഴും ഫുട്ബാള്‍ കളിക്കാനും മടിയില്ല.

മിസ്റ്റര്‍ കേരള മത്സരത്തില്‍ രണ്ടാം സ്ഥാനം നേടിയ പൊലീസ് വണ്ടിയൊക്കെ നന്നാക്കുന്ന പവിത്രനെന്നയാളുടെ അടുത്ത് നിന്നാണ് ബോഡി ബില്‍ഡിങ് പാഠങ്ങള്‍ പഠിച്ചത്. അദ്ദേഹത്തിന്റെ വീട്ടില്‍ വച്ചു തന്നെ ട്രെയിനിങ്. അങ്ങനെ 1981ല്‍ മിസ്റ്റര്‍ കോഴിക്കോടായി. '82ല്‍ മിസ്റ്റര്‍ കേരള, '83ല്‍ മിസ്റ്റര്‍ സൗത്ത് ഇന്ത്യ, '84ല്‍ ആദ്യമായി മിസ്റ്റര്‍ ഇന്ത്യ ('87ല്‍ വീണ്ടും മിസ്റ്റര്‍ ഇന്ത്യ) തുടര്‍ച്ചയായി രണ്ടു വര്‍ഷത്തോളം ദേശീയ ചാംപ്യന്‍ഷിപ്പ് മത്സരങ്ങളിലുണ്ടായിരുന്നു. മിസ്റ്റര്‍ ഏഷ്യാ മത്സരത്തിലും പങ്കെടുത്തിരുന്നു. 19 രാജ്യങ്ങള്‍ മത്സരിച്ചതില്‍ എട്ടാം സ്ഥാനം കിട്ടി. പിന്നെ, പതുക്കെ മത്സരങ്ങളില്‍ നിന്നു വിട്ടു, ബോഡി ബില്‍ഡിങ് അസോസിയേഷന്റെ സംസ്ഥാന പ്രസിഡന്റായി, ഇപ്പോഴും നാഷനല്‍ ജഡ്ജാണ്.