എന്തു പറ്റി ഈ യുവ നടന്? അതുല്യ നടന്റെ എഞ്ചിനീയറിംഗ് ബിരുദധാരിയായ മകന്‍; അമ്പരപ്പോടെ സിനിമാലോകം
അതുല്യ നടനായ ടിജി രവിയുടെ മകനായ ശ്രീജിത് രവി കേവലം കവലച്ചട്ടമ്പികള്‍ കാണിക്കുന്ന നാലാംകിട പെരുമാറ്റം കാണിക്കുമെന്ന് ആരും കരുതിയില്ല. പക്ഷെ 15 പെണ്‍കുട്ടികളുടെ മൊഴികളും അറസ്റ്റുമായതോടെ ഈ നടനെന്തുപറ്റിയെന്ന ചിന്തയാണ് എല്ലാവര്‍ക്കും.
ചാന്തുപൊട്ടിലെ സെമി വില്ലന്‍ വേഷത്തിലൂടെ സിനിമാഭിനയം തുടങ്ങുകയും ചുരുങ്ങിയ കാലംകൊണ്ട് നിരവധി സിനിമകളില്‍ ശ്രദ്ധേയമായ വേഷങ്ങള്‍ ചെയ്ത നടനാണ് ശ്രീജിത് രവി. പുണ്യാളന്‍ അഗര്‍ബത്തീസിലെ തുത്തുരുവും സെക്കന്‍ഡ് ക്ലാസ് യാത്രയിലെ പൊലീസ് വേഷവും കഥ തുടരുന്നുവെന്ന ചിത്രത്തിലെ അഭിനയവുമെല്ലാം സിനിമാപ്രേമികളുടെ മനംകവര്‍ന്നു.
വില്ലന്‍ വേഷങ്ങളില്‍ ആദ്യകാലത്ത് സ്ത്രീകളുടെ പേടിസ്വപ്‌നമാവുകയും നല്ലൊരു സ്വഭാവനടനായി ഇപ്പോള്‍ അഭിനയം തുടരുകയും ചെയ്യുന്ന പ്രശസ്ത നടന് ടി ജി രവിയുടെ മകന്‍ ഇപ്പോള്‍ പെണ്‍കുട്ടികളെ അപമാനിച്ച കുറ്റത്തിന് പിടിയിലായ സംഭവം സിനിമാ ലോകത്തെയാകെ നടുക്കിയിരിക്കുകയാണ്.
ആരോപണങ്ങള്‍ക്കപ്പുറത്ത് സത്യമുണ്ടാവില്ലെന്ന വിശ്വാസത്തിലായിരുന്നു സിനിമയിലെ സഹപ്രവര്‍ത്തകരെങ്കിലും ഇന്നലെ പത്തിരിപ്പാലയില്‍ സ്‌കൂള്‍ വിദ്യാര്‍ത്ഥിനികളോടുണ്ടായ അശഌല പെരുമാറ്റത്തിന്റെ പേരില്‍ ശ്രീജിത് രവി പിടിയിലായതോടെ വാര്‍ത്ത കാട്ടുതീപോലെ പടര്‍ന്നു. മലയാളസിനിമയിലെ മികച്ച വില്ലനെന്ന് പേരെടുത്ത അച്ഛന്റെ മകന്‍ ജീവിതത്തില്‍ വില്ലത്തരം കാണിച്ചതിന്റെ വാര്‍ത്തയ്ക്ക് സാമൂഹ്യ മാദ്ധ്യമങ്ങളിലും വന്‍ പ്രചാരം ലഭിച്ചു.
ഇപ്പോള്‍ കേസില്‍ അറസ്റ്റിലായി ജാമ്യത്തിലിറങ്ങുന്ന ശ്രീജിത് രവിയുടെ അച്ഛന്റെ പാതയിലാണ് വളര്‍ന്നതെന്ന് പറയാം. എന്‍ജിനീയറിംഗും സിനിമയും തമ്മിലെന്ത് ബന്ധമെന്ന ചോദ്യത്തിന് ആദ്യത്തെ ഉത്തരമായിരുന്നു ടിജി രവി. തൃശൂര്‍ ഗവണ്‍മെന്റ് എന്‍ജിനീയറിങ് കോളേജില്‍ നിന്ന് മെക്കാനിക്കല്‍ എന്‍ജിനീയറിംഗില്‍ ബിരുദം നേടിയ ടിജി രവി പിന്നീട് സിനിമാലോകത്താണ് തന്റെ പ്രതിഭ തെളിയിച്ചത്.
പിന്നീട് പുതിയ തലമുറയില്‍ നിരവധിപേര്‍ അത്തരത്തില്‍ എന്‍ജിനീയറിങ് പഠനം കഴിഞ്ഞ് സിനിമാലോകം തിരഞ്ഞെടുത്തു. ഇലക്ട്രോണിക്‌സ് എന്‍ജിനീയറായ അജു വര്‍ഗീസും മെക്കാനിക്കല്‍ എന്‍ജിനീയറായ രജത് മേനോനും ബിടെക് കഴിഞ്ഞ സണ്ണിവെയിനും ചെന്നൈയില്‍ നിന്ന് മെക്കാനിക്കല്‍ എന്‍ജിനീയറായ വിനീത് ശ്രീനിവാസനും.
എന്തിനേറെ ഇപ്പോള്‍ സൂപ്പര്‍സ്റ്റാര്‍ പദവിയേക്ക് കുതിക്കുന്ന, അങ്കമാലിയിലെ ഫെഡറല്‍ ഇന്‍സ്റ്റിറ്റിയൂട്ട് ഓഫ് സയന്‍സ് ആന്‍ഡ് ടെക്‌നോളജിയില്‍ നിന്ന് ഇലക്ട്രോണിക്‌സ് ആന്‍ഡ് കമ്മ്യൂണിക്കേഷന്‍ എന്‍ജിനീയറിങ് പാസായ സാക്ഷാല്‍ നിവിന്‍പോളിയുമെല്ലാം ന്യൂജന്‍ താരങ്ങളില്‍ നിന്ന് സിനിമാലോകത്തെത്തി അഭിനയമികവ് തെളിയിച്ചവരാണ്. ഇന്‍ഫോസിസിലെ ജോലി രാജിവച്ചാണ് നിവിന്‍ സിനിമാ ലോകത്ത് എത്തുന്നത്.
ഇക്കൂട്ടത്തിലാണ് ശ്രീജിത് രവിയുടെയും സ്ഥാനം. അച്ഛന്റെ പാതയില്‍ കര്‍ണാടക നാഷണല്‍ ഇന്‍സ്റ്റിറ്റിയൂട്ട് ഓഫ് ടെക്‌നോളജിയില്‍ നിന്ന് എന്‍ജിനീയറിങ് കഴിഞ്ഞെങ്കിലും അഭിനയമോഹം ചെറുപ്പംമുതലേ ശ്രീജിത്തിനൊപ്പം ഉണ്ടായിരുന്നു. തൃശൂരിലെ പ്രശസ്ത സ്‌കൂളായ ഹരിശ്രീയിലെ പഠനകാലത്തുതന്നെ തിയേറ്റര്‍ പരിപാടികളില്‍ ഇടംപിടിച്ച ശ്രീജിത്ത് കോളേജിലെത്തിയപ്പോഴും അഭിനയരംഗത്തുണ്ടായിരുന്നു. 2005ല്‍ ചാന്തുപൊട്ടില്‍ അഭിനയിച്ചതോടെയാണ് സിനിമയില്‍ സജീവമായി. ഇടക്കാലത്ത് ടെക്‌സണ്‍ റബ്ബര്‍ പ്രൊഡക്ട്‌സ്, സണ്‍ടെക് ടയര്‍ എന്നീ സ്ഥാപനങ്ങളും തുടങ്ങി വ്യവസായിയുമായി ഈ നാല്പതുകാരന്‍. അദ്ധ്യാപികയായ സജിതയെ വിവാഹംകഴിച്ച ശ്രീജിത്തിന് ഒരു മകനുമുണ്ട്.
ചേകവര്‍, പ്രാഞ്ചിയേട്ടന്‍, പാസഞ്ചര്‍, സ്വലേ, ബെസ്റ്റ് ആക്ടര്‍, താന്തോന്നി, ത്രീകിങ്‌സ് തുടങ്ങി മുന്‍നിര താരങ്ങളുടെ ചിത്രങ്ങളിലും ന്യൂജന്‍ ചിത്രങ്ങളിലും ശ്രദ്ധേയമായ വേഷങ്ങള്‍ ചെയ്ത ശ്രീജിത്തിനെതിരെ ഇത്തരമൊരു കേസ് വന്നതോടെ അദ്ദേഹത്തിന്റെ അഭിനയഭാവി എന്താവുമെന്ന ആശങ്കയും സോഷ്യല്‍ മീഡിയയില്‍ സജീവമായിക്കഴിഞ്ഞു.
സിനിമയില്‍ വില്ലന്‍ വേഷങ്ങളേറെ ചെയ്‌തെങ്കിലും ജീവിതത്തില്‍ ഒരിക്കലും അദ്ദേഹം വില്ലത്തരം കാട്ടിയില്ല. നല്ലകാര്യങ്ങള്‍ ചെയ്യുകയും നല്ലൊരു ജനകീയനാകുകയും ചെയ്ത ടിജി രവിയുടെ മകന്‍ ഇത്തരമൊരു കേസില്‍ അകപ്പെട്ടതെങ്ങനെയെന്ന ചോദ്യമാണ് ഉയരുന്നത്.
https://www.facebook.com/Malayalivartha
