സ്‌കൂള്‍ കുട്ടികള്‍ക്ക് നേരെ നഗ്നത പ്രദര്‍ശിപ്പിച്ച യുവ നടന്‍ ശ്രീജിത് രവിയ്ക്ക് മാനസികാസ്വാസ്ഥ്യം ഉള്ളതായി പോലീസിന് സംശയം. അദ്ദേഹത്തെ മനശാസ്ത്രജ്ഞനെ കാണിക്കാനാണ് പോലീസ് നീക്കം. യുവനടന്റെ പിതാവ് പ്രമുഖ ചലച്ചിത്രതാരമാണ്. യുവനടന്റെ ബന്ധുക്കളുമായി ബന്ധപ്പെട്ട് മുമ്പ് അദ്ദേഹത്തിന് ഇത്തരം പ്രശ്‌നങ്ങളുണ്ടോ എന്നു പോലീസ് ആരാഞ്ഞു.

ഒരു ബന്ധവുമില്ലാത്ത പെണ്‍കുട്ടികള്‍ക്ക് നേരെ ഒരാള്‍ നഗ്നത പ്രദര്‍ശിപ്പിക്കണമെങ്കില്‍ അയാള്‍ക്ക് എന്തെങ്കിലും കുഴപ്പമുണ്ടെന്നു മനസിലാക്കണം. പത്തിരിപാലയിലെ സ്‌കൂളിലേയ്ക്ക് നടന്നു പോകുകയായിരുന്ന കുട്ടികളെയാണ് നടന്‍ തന്റെ സ്വകാര്യ ഭാഗം കാണിച്ചത്. ഇതില്‍ ഒരു പെണ്‍കുട്ടി ആത്മഹത്‌യ്ക്ക് ശ്രമിച്ചതാണ് പ്രകോപനത്തിന് കാരണമായത്.

പരസ്യമായി നഗ്നത പ്രദര്‍ശിപ്പിക്കുന്നത് മനോ രോഗത്തിന്റെ ലക്ഷണമെന്ന് ഡോക്ടര്‍മാര്‍ പറയുന്നു. അങ്ങനെയുള്ളവര്‍ക്ക് ശരിയായ ചികിത്സയാണ് വേണ്ടത്. എന്നാല്‍ യുവനടന് അത്തരത്തിലുള്ള ചികിത്സ ലഭ്യമായതായി പോലീസിനറിയില്ല. കുടുംബാംഗങ്ങള്‍ നടന് ഇത്തരമൊരു രോഗമുള്ളതായി സമ്മതിക്കുന്നില്ല.

അതേസമയം നടന്‍ മയക്കുമരുന്നിന്റെ മയക്കത്തിലാണ് ഇത് ചെയ്തതെന്നും പറയപ്പെടുന്നു.

ഇതിനിടെ യുവനടനെ രക്ഷിക്കാന്‍ പോലീസ് തലത്തില്‍ ശ്രമങ്ങള്‍ നടന്നിരുന്നു, എന്നാല്‍ പെണ്‍കുട്ടി ആത്മഹത്യക്ക് ശ്രമിച്ചതോടെ പോലീസിന്റെ തന്ത്രപ്രധാന നീക്കങ്ങള്‍ കൈവിട്ടു പോയി. പ്രതിയെ നിയമത്തിനു മുമ്പില്‍ കൊണ്ടു വരുമെന്നു തന്നെയാണ് ഒറ്റപ്പാലം സബ്കളക്ടര്‍ അറിയിച്ചിരിക്കുന്നത്. നടനെ പെണ്‍കുട്ടികള്‍ തിരിച്ചറിഞ്ഞിരുന്നു. നടന്‍ സഞ്ചരിച്ചിരുന്ന കാറിന്റെ നമ്പരും നല്‍കിയിരുന്നു. എന്നിട്ടും പ്രതിയെ കണ്ടു കിട്ടിയില്ലെന്ന് പറഞ്ഞ് പോലീസ് ഒഴിഞ്ഞു മാറുകയായിരുന്നു.

അതിനിടെ നടന്റെ കാറിലുണ്ടായിരുന്നത് മറ്റാരെങ്കിലുമാണെന്ന് വരുത്തി തീര്‍ക്കാനും ശ്രമങ്ങള്‍ നടന്നതായി അറിയുന്നു. എന്നാല്‍ അതൊന്നും ഏശിയില്ല.