സ്വകാര്യ സ്ഥാപനത്തിന്റെ ഉദ്ഘാടന ചടങ്ങില്‍ പങ്കെടുക്കാനായി മലപ്പുറം ജില്ലയിലെ മഞ്ചേരിയില്‍ എത്തിയ നടന്‍ സിദ്ധീക്കിനെ സംഘാടകര്‍ അപമാനിച്ചതായി ആരോപണം. മുഖ്യാതിഥിയായി എത്തിയ നടന്‍ സിദ്ധിഖിനെ സംഘാടകര്‍ വേദിയില്‍ കയറാന്‍ അനുവദിക്കാതിരുന്ന സംഭവം ഇതോടെ വിവാദമായിരിക്കുകയാണ്.

ഇക്കഴിഞ്ഞ ശനിയാഴ്ച മഞ്ചേരിയില്‍ നടന്ന ഇവേ ഗ്യാലറി എന്ന സ്ഥാപനത്തിന്റെ ഉദ്ഘാടന ചടങ്ങിലെ മുഖ്യാതിഥി ആയിരുന്നു സിദ്ധിഖ്. പാണക്കാട് സാദ്ധിഖലി തങ്ങള്‍ ആയിരുന്നു ഉദ്ഘാടകന്‍. നിശ്ചയിച്ച സമയത്തെക്കാള്‍ പത്ത് മിനിറ്റ് വൈകിയാണ് സിദ്ധിഖ് വേദിയിലെത്തിയത്. സാദ്ധിഖലി തങ്ങള്‍ പോയതിന് ശേഷം മാത്രമേ വേദിയില്‍ കയറ്റൂ എന്ന് സംഘാടകര്‍ അറിയിച്ചതിനാലാണ് താന്‍ നിശ്ചയിച്ച സമയത്തെക്കാള്‍ വൈകി വേദിയില്‍ എത്തിയതെന്നാണ് നടന്‍ വേദിയില്‍ സംസാരിക്കവേ വ്യക്തമാക്കിയത്.

സംഭവത്തെക്കുറിച്ച് വിശദീകരണവുമായി സിദ്ധിഖ് രംഗത്തെത്തിയതിങ്ങനെ'പത്തരയ്ക്കുള്ള ഉദ്ഘാടനത്തിന് പത്ത് മണിക്ക് തന്നെ മഞ്ചേരിയില്‍ എത്തിയതാണ്. ഇവിടെ തങ്ങള്‍ വന്ന് പോയിട്ടേ ഇവിടെ എന്നെ കയറ്റൂ എന്ന് ഇവര്‍ പറഞ്ഞു. ആര്‍ക്കും എന്നോട് വെറുപ്പ് തോന്നരുത്. ഞാന്‍ എത്താന്‍ വൈകിയതില്‍ ക്ഷമ ചോദിക്കുന്നു.
അതേസമയം വേദിയില്‍ പറഞ്ഞതിലേക്കാള്‍ കൂടുതലായി തനിക്കൊന്നും ഈ സംഭവത്തെക്കുറിച്ച് പറയാനില്ലെന്ന് സിദ്ധീഖ് മാധ്യമങ്ങളോട് വ്യക്തമാക്കിയിട്ടുണ്ട്.