കണ്ടവരും പുലിമുരുകന്മാരായി... പുലിമുരുകന് പ്രദര്ശനം നിലച്ചതോടെ കാണികള് തിയറ്റര് അടിച്ചു തകര്ത്തു
മോഹന്ലാല് അഭിനയിച്ച പുലിമുരുകന് സിനിമ കണ്ടു കൊണ്ടിരിക്കെ ഇടയ്ക്ക് വച്ച് പ്രദര്ശനം നിലച്ചത് ഇരിട്ടി കല്പന ടാക്കീസില് സംഘര്ഷത്തിന് ഇടയാക്കി. കാണികളില് ചിലര് തിയറ്റര് എറിഞ്ഞു തകര്ത്തു. പൊലീസെത്തി നാലുപേരെ പിടികൂടി സ്റ്റേഷനില് എത്തിച്ചു.
ഇന്നലെ 1.30ന്റെ ഷോ നടക്കുന്നതിനിടെയാണ് യുഎഫ്ഒ സംവിധാനത്തില് പ്രവര്ത്തിക്കുന്ന തിയറ്ററില് സാറ്റലൈറ്റ് ബന്ധം നിലച്ച് പ്രദര്ശനം തടസ്സപ്പെട്ടത്. ഇതോടെ പ്രകോപിതരായ കാണികളില് ചിലര് ടാക്കീസിന് പുറത്തെത്തി കണ്ണില് കണ്ടതെല്ലാം തല്ലിത്തകര്ക്കുകയായിരുന്നു. ജനല് ഗ്ലാസുകളും കസേരകളും ടിക്കറ്റ് കൗണ്ടറും എറിഞ്ഞു തകര്ത്തു.
സാറ്റലൈറ്റ് ബന്ധം പുന:സ്ഥാപിച്ച് വീണ്ടും സിനിമ തുടങ്ങിയപ്പോള് ഇവര് വീണ്ടും ടാക്കീസിന് അകത്തു കയറി സിനിമ കാണുകയും ചെയ്തു. ടാക്കീസ് ജീവനക്കാരും സംഭവം കണ്ട സമീപത്തെ കച്ചവടക്കാരും പ്രകോപനം സൃഷ്ടിക്കാതെ പൊലീസിനെ വിവരം അറിയിക്കുകയും പൊലീസെത്തി അക്രമം നടത്തിയവരെ പിടികൂടുകയുമായിരുന്നു. ഇതിനിടയില് പൊലീസ് എത്തിയപ്പോള് ഓടി രക്ഷപ്പെടാന് ശ്രമിച്ച ഒരു അക്രമിയെ പിന്തുടര്ന്ന് പിടികൂടി. ഇതിനു മുന്പും ഇവിടെ പ്രദര്ശനം നിലച്ച സംഭവവും ഇതേ തുടര്ന്ന് അക്രമ സംഭവവും ഉണ്ടായിരുന്നു. ടാക്കീസ് മാനേജര് ഷിബുവിന്റെ പരാതിയില് പൊലീസ് കേസെടുത്തു.
https://www.facebook.com/Malayalivartha
