ഫ്‌ളാഷിന്റെ അണിയറക്കാര്‍ തന്നെ ചതിച്ചതായി പുലിമുരുകന്റെ നിര്‍മ്മാതാവ് ടോമിച്ചന്‍ മുളകുപാടം. ഫ്‌ളാഷ് എന്ന ചിത്രം തന്റെ തലയില്‍ കെട്ടി വച്ച് തന്നെ സാമ്പത്തികമായി തകര്‍ത്തെന്നാണ് ടോമിച്ചന്റെ പ്രതികരണം. പുലിമുരുകന്റെ സന്തോഷം അത്തരം ദുഖങ്ങളെയൊക്കെ ഇല്ലാതാക്കിയതായും ടോമിച്ചന്‍ പറയുന്നു.
ഫ്‌ളാഷ് എന്ന പരാജയത്തില്‍ നിന്നാണ് ടോമിച്ചന്റെ തുടക്കം. സിബിമലയില്‍ മോഹന്‍ലാല്‍ കൂട്ടുകെട്ടിന്റേതാണ് ചിത്രം. ദുബായില്‍ ബിസിനസ് നടത്തുകയായിരുന്ന ടോമിച്ചനെ ചില സുഹൃത്തുക്കള്‍ നാട്ടിലേയ്ക്ക് വിളിച്ചു വരുത്തുകയായിരുന്നു. അക്കാലത്ത് ടോമിച്ചന് സിനിമയുടെ എബിസിഡി അറിയുമായിരുന്നില്ല. പലരും വേണ്ടെന്ന് പറഞ്ഞ് ഉപേക്ഷിച്ച സിനിമയായിരുന്നു ഫ്‌ളാഷ്. എന്നാല്‍ ഇക്കാര്യം ടോമിച്ചനെ ആരും അറിയിച്ചില്ല. മോഹന്‍ലാലിനെ കണ്ട് ടോമിച്ചന്‍ മയങ്ങി വീഴുകയായിരുന്നു. സിനിമ വലിയ പരാജയമായി മാറി. യാതൊരു തരത്തിലും യാഥാര്‍ത്ഥ്യബോധമുള്ള സിനിമയായിരുന്നില്ല ഫ്‌ളാഷ് . ഫ്‌ളാഷ് പൊളിഞ്ഞു. ചങ്ങനാശ്ശേരിയിലായിരുന്നു ചിത്രീകരണം.
എന്നാലും മോഹന്‍ലാല്‍ ടോമിച്ചനൊപ്പം നിന്നു. ചിത്രം പൊളിഞ്ഞയുടന്‍ ടോമിച്ചനോട് മോഹന്‍ലാല്‍ പറഞ്ഞു പകരം ഒരു സിനിമ തരാം എന്നാല്‍ ടോമിച്ചന്‍ വിശ്വസിച്ചില്ല. കാരണം സിനിമാക്കാര്‍ അങ്ങനെയാണ്. അവര്‍ പലതും പറയും. പുലിമുരുകന്റെ ചിത്രീകരണത്തിനിടയിലും സാമ്പത്തിക ഞെരുക്കം സംഭവിച്ചിട്ടുള്ളതായി ടോമിച്ചന്‍ പറഞ്ഞു. ഒരു വര്‍ഷത്തോളം നീണ്ട ചിത്രീകരണം മാനസികമായും സാമ്പത്തികമായും തളര്‍ത്തി. ടോമിച്ചന്‍ മുളകുപാടം പൊട്ടി പാളീസായെന്ന് പറഞ്ഞു പരത്തിയവരും നിരവധി . ഫ്‌ളാഷ് പൊളിഞ്ഞപ്പോഴും ഇത്തരത്തില്‍ പറഞ്ഞു. പുലിമുരുകന്‍ എന്ന പേരുള്ള ഒരു സിനിമ നിര്‍മ്മിച്ച് പാളീസായി എന്നാണ് പറഞ്ഞു പരത്തിയത്. തന്റെ ആദ്യ ചിത്രത്തിന്റെ പരാജയത്തിനുള്ള മധുര പ്രതികാരമാണ് പുലിമുരുകനെന്നും ടോമിച്ചന്‍ പറയുന്നു.
ഫ്‌ളാഷിന്റെ പരാജയം വാശിയായി തീര്‍ന്നതാണ് പുലിമുരുകന്റെ വിജയത്തിനുള്ള കാരണമെന്ന് ടോമിച്ചന്‍ പറയുന്നു. ചതിക്ക് ദൈവം നല്‍കിയ മറുപടിയാണ് പുലിമുരുകനെന്നും ടോമിച്ചന്‍ പറയുന്നു.
ഫ്‌ളാഷ് ഒരു ബിഗ് ബജറ്റ് സിനിമയായിരുന്നു. പാര്‍വതിയായിരുന്നു മോഹന്‍ലാലിന്റെ നായിക. ഒരു മനോരോഗിയുടെ കഥയാണ് ഫ്‌ളാഷ് പറഞ്ഞത് ചങ്ങനാശ്ശേരി എസ് ബി കോളേജിലാണ് മിക്കഭാഗങ്ങളും ചിത്രീകരിച്ചത്. കോളേജ് വിദ്യാര്‍ത്ഥിനിയായിട്ടാണ് പാര്‍വതി അഭിനയിച്ചത്. പണം പലിശക്കെടുത്താണ് ഫ്‌ളാഷ് നിര്‍മ്മിച്ചതെങ്കില്‍ ജീവിതം പാഴാകുമായിരുന്നു എന്നാണ് ടോമിച്ചന്‍ മുളകുപാടം പറയുന്നത്. മൂന്നു കോടിയോളം രൂപയാണ് പുലിമുരുകന്റെ പ്രമോഷനു വേണ്ടി ചെലവാക്കിയതെന്നും ടോമിച്ചന്‍ മുളകുപാടം പറഞ്ഞു. തന്നെ ചതിച്ചതു പോലെ മറ്റാരെയും ചതിക്കരുതെന്ന് ടോമിച്ചന്‍ പറയുന്നു.