ഡാന്‍സ് ചെയ്താല്‍ കേരളം കാണില്ല... കുവൈറ്റില്‍ മേക്കപ്പിട്ട് ഡാന്‍സിനായി ഗ്രീന്‍ റൂമില്‍ കാത്തിരിക്കവേ മൊബൈലില്‍ സന്ദേശമെത്തി...
ചിലങ്കയണിഞ്ഞെങ്കിലും കളിക്കാനാവാതെ റിമ കല്ലിങ്കല്‍ മേക്കപ്പഴിച്ചു. പ്രമുഖ വിദേശ വ്യവസായി കെ.ജി എബ്രഹാമിന്റെ എന്‍.ബി.ടി.സി ഗ്രൂപ്പ് സംഘടിപ്പിച്ച കുടുംബസംഗമത്തില്‍ നൃത്തം ചെയ്യാന്‍ കുവൈറ്റിലെത്തിയ നടി ഭീഷണി സന്ദേശത്തെതുടര്‍ന്ന് നൃത്തം ചെയ്തില്ല. വ്യാഴാഴ്ച വൈകിട്ട് ആറ് മണിയോടെ ഫെസ്റ്റീവ് നൈറ്റ് ആരംഭിക്കുമെന്നായിരുന്നു സംഘാടകരുടെ പ്രഖ്യാപനം. ആദ്യ പരിപാടികളില്‍ തന്നെ റിമ കല്ലിങ്കലിന്റെ കേരളീയ നൃത്തവും ഉള്‍പ്പെടുത്തിയിരുന്നു.
പരിപാടിക്കായി നേരത്തെ കുവൈറ്റിലെത്തിയ റിമ മേക്കപ്പിട്ട് ഗ്രീന്‍ റൂമില്‍ ഇരിക്കുമ്പോള്‍ ഒരു മെസ്സേജ് ഫോണിലേക്കെത്തി, ഇതേത്തുടര്‍ന്ന് റിമ സംഘാടകരുമായി സംസാരിച്ച് പരിപാടി ഉപേക്ഷിക്കുകയായിരുന്നു. തുടര്‍ന്ന് വസ്ത്രം മാറി റിമ സദസ്സിലേക്ക് എത്തി.
സന്ദേശത്തെക്കുറിച്ച് വ്യക്തതയില്ല. ഏതെങ്കിലും സംഘടനയുടെ സന്ദേശമാണോയെന്ന് സംഘാടകരും റിമയും ഇതുവരെ തുറന്ന് പറയാന്‍ തയ്യാറായിട്ടില്ല. റിമയ്‌ക്കൊപ്പം കുവൈറ്റിലെത്തിയ ഗായകസംഘത്തിലെ പലരുമായും ഫോണില്‍ ബന്ധപ്പെട്ടുവെങ്കിലും അവരും സന്ദേശത്തിലെ വിവരങ്ങള്‍ പങ്കുവെയ്ക്കാന്‍ തയ്യാറായിട്ടില്ല.
മ്യൂസിക് ഡയറക്ടര്‍ എം ജയചന്ദ്രന്‍, പിന്നണി ഗായകരായ വിജയ് യേശുദാസ്, വിദു പ്രതാപ്, വിജയ് പ്രകാശ്, ഗായികമാരായ സിതാര, സയനോര ഫിലിപ്പ് എന്നിവരടങ്ങുന്ന ഗായകസംഘമാണ് തുടര്‍ന്ന വേദിയില്‍ പരിപാടി അവതരിപ്പിച്ചത്. ഗാനമേളയ്ക്കിടെ റിമയെ ഗായകര്‍ വേദിയിലേക്ക് ആനയിച്ചിരുന്നു. അതേസമയം നടി അസ്വസ്ഥതയിലായിരുന്നു എന്നാണ് കാഴ്ചക്കാരായെത്തിയവരുടെ നിരീക്ഷണം.
റിമയുടെ ചിത്രം പതിച്ച നൂറുകണക്കിന് കാര്‍ഡുകളും ഏതാനും ബോര്‍ഡുകളും ഉപയോഗിച്ചെങ്കിലും നടിയുടെ പരിപാടി ഭീഷണിയെതുടര്‍ന്ന സംഘാടകര്‍ ഉപേക്ഷിക്കുകയായിരുന്നു. അതേസമയം നടിയുടെ നൃത്തം നടത്തരുതെന്നും, നടത്തിയാല്‍ അലങ്കോലപ്പെടുമെന്നും നേരത്തെ സംഘാടകര്‍ക്കും ഭീഷണി സന്ദേശം ലഭിച്ചിരുന്നു.
സന്ദേശത്തിന് പിന്നില്‍ എന്‍.ബി.ടി.സി ഗ്രൂപ്പുമായി ബന്ധമുള്ളവര്‍ തന്നെയാണെന്നും അഭ്യൂഹമുണ്ട്. കഴിഞ്ഞ വര്‍ഷത്തെ ഫെസ്റ്റീവ് നൈറ്റില്‍ പൃഥ്വിരാജായിരുന്നു മുഖ്യാതിഥി. കൊച്ചി മരടിലെ ക്രൗണ്‍ പ്ലാസ്സാ പൈവ് സ്റ്റാര്‍ ഹോട്ടലിന്റെ ഓണര്‍കൂടിയാണ് കെജി എബ്രഹാം.
https://www.facebook.com/Malayalivartha
