കെയര്‍ ഓഫ് സൈറാബാനു ചിത്രീകരണം പൂര്‍ത്തിയാക്കി അമല മടങ്ങുമ്പോള്‍ മഞ്ജു വാര്യര്‍ ഏറെ വിഷമിക്കുന്നു. ഇരുപത്തഞ്ചു വര്‍ഷത്തെ നീണ്ട ഇടവേളയ്ക്ക് ശേഷമാണ് നടി അമല കെയര്‍ ഓഫ് സൈറാബാനു എന്ന ചിത്രത്തിലൂടെ മലയാള സിനിമയില്‍ എത്തിയത്.
രാവേറുമ്പോഴും അസ്തമിക്കാത്ത ചിരിയായിരുന്നു അമല മാഡത്തിന്റെ ഏറ്റവും വലിയ സവിശേഷത. ജീവിതത്തെ ഇത്രമേല്‍ പ്രസാദാത്മകമായി സമീപിക്കുന്നവര്‍ അപൂര്‍വമാണ്. അതുകൊണ്ടുതന്നെ ഒരുമിച്ചായിരുന്നപ്പോള്‍ ഒരു പോസിറ്റീവ് എനര്‍ജിയുണ്ടായിരുന്നുവെന്ന് മഞ്ജു പറയുന്നു.

മഞ്ജുവിന്റെ ഫേസ്ബുക്ക് പോസ്റ്റ്

കെയര്‍ ഓഫ് സൈറാബാനുവിന്റെ ഷൂട്ടിങ്ങ് പൂര്‍ത്തിയാക്കി അമല മാഡം യാത്രപറഞ്ഞുപോകുമ്പോള്‍ ഹൃദയത്തില്‍ ഒരു തരി നൊമ്പരം. ഈ ദിനങ്ങളില്‍ ഞാനൊരു സുഹൃത്തിന്, വഴികാട്ടിക്ക്, സഹോദരിക്ക്, ഗുരുവിന് എല്ലാം ഒപ്പമായിരുന്നു. അവര്‍ പരത്തിയ പ്രകാശത്തിലായിരുന്നു ഓരോ ദിനവും ഷൂട്ടിങ്ങ്. രാവേറുമ്പോഴും അസ്തമിക്കാത്ത ചിരിയായിരുന്നു അമല മാഡത്തിന്റെ ഏറ്റവും വലിയ സവിശേഷത. ജീവിതത്തെ ഇത്രമേല്‍ പ്രസാദാത്മകമായി സമീപിക്കുന്നവര്‍ അപൂര്‍വമാണ്. അതുകൊണ്ടുതന്നെ ഒരുമിച്ചായിരുന്നപ്പോള്‍ ഒരു പോസിറ്റീവ് എനര്‍ജിയുണ്ടായിരുന്നു, ഓരോ നിമിഷവും.

അഭിനയപാഠങ്ങളേക്കാളുപരി സ്‌നേഹത്തിന്റെ, കാരുണ്യത്തിന്റെ വലിയ അധ്യായങ്ങളാണ് നേരിട്ടറിഞ്ഞത്. പ്രത്യേകിച്ച് ഹൈദരാബാദില്‍ അവര്‍തന്നെ തുടക്കമിട്ട ദി ബ്ലൂക്രോസ് പോലുള്ള സാമൂഹികദൗത്യങ്ങളെക്കുറിച്ചുള്ള വിവരണങ്ങള്‍ തന്ന പ്രചോദനം ചെറുതല്ല.

മാഡം... നിങ്ങള്‍ ഇപ്പോള്‍ ഒരു സഹപ്രവര്‍ത്തകയ്ക്കുമപ്പുറം എനിക്ക് പ്രിയപ്പെട്ടതാകുന്നു..