സിനിയില്‍ ഫൈറ്റ് ഡിസൈന്‍ ചെയ്ത് താരങ്ങളെ പരിശീലിപ്പിക്കുന്ന സ്റ്റണ്ട് മാസ്റ്ററാണ് ഗീതാ ടാണ്ടന്‍. വനിതാ സ്റ്റണ്ട് മാസ്റ്ററായ ഗീതയ്ക്ക് കാര്‍ ചേസ് നടത്തുന്ന ബുള്ളറ്റില്‍പ്പായുന്ന തീയെപ്പോലും പേടിയില്ല. പക്ഷെ കരഞ്ഞു തീര്‍ത്ത ജീവിതത്തെ പേടിയാണ്.

15 ാം വയസ്സില്‍ വിവാഹിതയായ 21 ാം വയസ്സില്‍ രണ്ടു കുഞ്ഞുങ്ങളുടെ അമ്മയായ ഒരു സ്ത്രീക്ക് പറയാനൊരുപാടു കഥകളുണ്ടായിരുന്നു. മോശം സാഹചര്യമാണ് എന്തു വെല്ലുവിളികളെയും നേരിടാന്‍ അവളെ പ്രാപ്തയാക്കിയത്. വീട്ടിലെ ദാരിദ്രമാണ് 15 ാം വയസ്സില്‍ മകളെ വിവാഹം ചെയ്തയക്കാന്‍ അവളുടെ അച്ഛനെ നിര്‍ബന്ധിതനാക്കിയത്.

എന്നാല്‍ വളരെമോശപ്പെട്ട ആളുകളാണ് ഭര്‍തൃവീട്ടില്‍ അവളെ കാത്തിരുന്നത്. നിരന്തരമായ ശാരീരിക പീഡനങ്ങളും ബലാല്‍സംഗവും അവളെ തളര്‍ത്തി. ദിവസവും മദ്യപിച്ചെത്തുന്ന ഭര്‍ത്താവ് അവളെ നിരന്തരം മര്‍ദിച്ചു. പിന്നെ അയാള്‍ക്കു മതിയാവോളം അവളെ ബലാല്‍സംഗം ചെയ്തു. എല്ലാത്തിനും പിന്തുണയുമായി അയാളുടെ മാതാപിതാക്കളും ഒപ്പം നിന്നപ്പോള്‍ അവര്‍ തകര്‍ന്നു തളര്‍ന്നു.

കുഞ്ഞുങ്ങള്‍ പാലിനായി വിശന്നു കരയുമ്പോഴും അവള്‍ ഭര്‍ത്താവിന്റെ കാട്ടാളത്തരത്തിന് ഇരയായിക്കൊണ്ടിരുന്നു. ഒടുവില്‍ ആ ദുരിത ജീവിതത്തില്‍ നിന്നു മോചനം നേടാന്‍ അവള്‍ തീരുമാനിച്ചു. അഭയത്തിനായി സഹോദരിയുടെ വീട്ടിലെത്തി. എന്നാല്‍ സഹോദരിയുടെ അമ്മായിഅമ്മ അവരുടെ മകനെയും ഗീതയെയും ചേര്‍ത്ത് കഥകള്‍ മെനഞ്ഞു തുടങ്ങിയപ്പോള്‍ അവള്‍ക്കു അവിടെനിന്നും പടിയിറങ്ങേണ്ടി വന്നു.

ആ യാത്രയില്‍ അവള്‍ കണ്ടുമുട്ടിയ ഒരു സ്ത്രീയില്‍ നിന്നാണ് സാഹസികലോകത്തേക്കെത്താന്‍ ഗീതയ്ക്കു വഴിതെളിഞ്ഞത്. പരിശീലനത്തിനിടെ പലവട്ടം മുഖം പൊള്ളി, ശരീരത്തില്‍ മുറിവുകളും ചതവുകളും പറ്റാത്തയിടങ്ങളില്ലാതായി. പക്ഷെ തോറ്റു പിന്മാറാന്‍ ഗീത തയാറല്ലായിരുന്നു. വളരെചുരുങ്ങിയ കാലംകൊണ്ട് അവള്‍ ഡ്രൈവിങ് പരിശീലിച്ചു. ബുള്ളറ്റും കാറുകളുമെല്ലാം ഓടിക്കാന്‍ പഠിച്ചു. ഇന്ത്യയില്‍ കാര്‍ചേസിങ് ചെയ്യുന്ന ആദ്യ വനിതാ സ്റ്റന്‍ഡ്മാസ്റ്റര്‍ എന്ന ഖ്യാതിയോടെ അവള്‍ ബിടൗണിലെത്തി. 

പിന്നെ സ്വപ്നതുല്യമായ വളര്‍ച്ചയായിരുന്നു. ബോളിവുഡിലെ താരറാണിമാരുടെ ഇഷ്ടക്കാരിയായി ഗീത മാറി. 16 വയസ്സുകാരി മകള്‍ക്കും 14 വയസ്സുകാരനായ മകനുമൊപ്പം സന്തോഷത്തോടെ കഴിയുകയാണ് ഗീത.