ജയലളിതയെ കുറിച്ചും ജയലളിതയുമായുണ്ടായിരുന്ന ആത്മബന്ധത്തെക്കുറിച്ചും നടി ഷീല ഓര്‍ക്കുന്നു. അഭിനയിക്കുന്ന കാലത്ത് ഞങ്ങള്‍ രണ്ടു പേരും പലപ്പോഴും ഒന്നിച്ച് കൂടാറുണ്ടായിരുന്നു. ജയലളിതയെപ്പോലെ ബുദ്ധിയുള്ള, പ്രായോഗിക വാദിയായ ഒരു സ്ത്രീയെ ലോകത്ത് കാണാനാവില്ലെന്നു നടി ഷീല. അമ്മു എന്നായിരുന്നു വീട്ടില്‍ എല്ലാവരും ജയലളിതയെ വിളിച്ചിരുന്നത്. അന്നൊക്കെ ഞാനും അങ്ങനെ തന്നെയായിരുന്നു വിളിച്ചിരുന്നത്. അഭിനയിക്കുന്ന കാലത്ത് ഞങ്ങള്‍ രണ്ടു പേരും വലിയ തിരക്കിലായിരുന്നു.

മിക്കപ്പോഴും അടുത്തടുത്തായിരിക്കും ഷൂട്ടിംഗ്. പുറത്തുപോകുന്നത് എനിക്കു വലിയ ഇഷ്ടമായിരുന്നു. എനിക്കൊപ്പം ജയയും വരും. എനിക്ക് അന്നു പുറത്തു പോയാലും വലിയ കുഴപ്പമില്ല. എന്നെ അധികമാരും അവിടെ അറിയില്ല. ജയയുടെ സ്ഥിതി അതായിരുന്നില്ല. അങ്ങനെ പലപ്പോഴും പര്‍ദയിട്ട് ഞങ്ങള്‍ പുറത്തു പോയിരുന്നു.

എക്‌സിബിഷനും മറ്റും പര്‍ദയിട്ടു പോയത് ഇന്നലത്തെ പോലെ തോന്നുന്നു. ചെന്നൈയിലെ ബുഹാരി ഹോട്ടലിനു മുന്നില്‍ കാറിലിരുന്നിട്ട് ഫലൂദ കഴിക്കുമായിരുന്നു ഞങ്ങള്‍. ഒരുമിച്ച് രണ്ടുപേരും പടത്തിനു പോകും. രണ്ടുപേരുടെയും താമസസ്ഥലത്ത് ഞങ്ങള്‍ പരസ്പരം പോകുമായിരുന്നു. ഒരേസമയത്തായിരുന്നു ഞങ്ങള്‍ വീട് വച്ചത്. സൗന്ദര്യമുള്ള വീട് എന്നതായിരുന്നു എന്റെ ആശയം. വീട്ടിനു മുന്നില്‍ ഒരു വെള്ളച്ചാട്ടമൊക്കെയായിരുന്നു എന്റെ ആഗ്രഹം. ആരും വീട്ടില്‍ ലിഫ്റ്റ് വച്ചിട്ടില്ലാത്ത അക്കാലത്ത് ഞാന്‍ ലിഫ്റ്റും വച്ചു.

പക്ഷേ, ജയലളിത ചെയ്തത് മറ്റൊന്നായിരുന്നു. അവര്‍ വീട്ടില്‍ വലിയ ഒരു ഹാള്‍ ലൈബ്രറിയാക്കി മാറ്റുകയായിരുന്നു. അതില്‍ ലോകത്തുള്ള എല്ലാ പുസ്തകങ്ങളും ജയ നിറച്ചുവെന്നു പറഞ്ഞാല്‍ അതിശയോക്തിയാവില്ല. പുറത്തു പോകാത്ത സമയത്തെല്ലാം ജയ വായനയിലായിരുന്നു. അതായിരുന്നു ജയലളിത. അവര്‍ ഉയരങ്ങള്‍ കീഴടക്കിയതും ആ മനസ്സുകൊണ്ടു തന്നെയായിരുന്നു.