മലയാളം ഉള്‍പ്പെടെയുള്ള സിനിമാ ഇന്‍ഡസ്ട്രികളില്‍ നടിമാരോടുള്ള മോശം സമീപനം ദേശീയതലത്തില്‍ ചര്‍ച്ച ചെയ്യുമ്പോള്‍ ബോളിവുഡും സ്ത്രിവിരുദ്ധതയില്‍ പിന്നിലല്ലെന്ന് നടി വിദ്യാബാലന്‍. മലയാളത്തില്‍ നിന്ന് തുടങ്ങിയ നടിമാരുടെ ചെറുത്ത് നില്‍പ്പ് ഹോളിവുഡില്‍ വരെ എത്തുകയും പ്രശസ്തയായ ഒരു നടി അലീസാ മിലാനോ തുടങ്ങുകയും അത് വലിയ തരംഗമായി മാറുകയും ചെയ്തതിന്റെ പശ്ചാത്തലത്തിലാണ് വിദ്യാബാലന്‍ ബോളിവുഡിലെ കാര്യങ്ങള്‍ വെളിപ്പെടുത്തിയത്. തന്റെ കരിയറിന്റെ തുടക്കത്തില്‍ നിരവധി തവണ മോശം അനുഭവങ്ങള്‍ ഉണ്ടായിട്ടുണ്ടെന്നും അപ്പോഴൊക്കെ താന്‍ ക്ഷുഭിതയായിട്ടുണ്ടെന്നും താരം വെളിപ്പെടുത്തി. ഒരു ബിസിനസ് മാഗസിന്റെ പ്രകാശനച്ചടങ്ങില്‍ വെച്ചാണ് ഇക്കാര്യം പറഞ്ഞത്. 

ബോളിവുഡില്‍ ശരിക്കും സ്ത്രിവുരുദ്ധത ശക്തമായുണ്ട്. പക്ഷെ, ഒരിടത്തും തലകുനിക്കേണ്ട സാഹചര്യം ഉണ്ടായിട്ടില്ല. നായകന്‍മാര്‍ക്ക് എല്ലായിടത്തും അമിതപ്രാധാന്യമാണ് നല്‍കുന്നത്. ലൊക്കേഷനില്‍ വലിയ കാരവനുകള്‍ നല്‍കും പഞ്ചനക്ഷത്ര ഹോട്ടല്‍ സൗകര്യങ്ങളും എന്നാല്‍ നായികമാര്‍ക്ക് ഇതുരണ്ടും നല്‍കില്ല. പ്രതിഫലത്തിന്റെ കാര്യത്തിലും ഇതുതന്നെയാണ് അവസ്ഥ. പരിണീത പോലെ സ്ത്രീ പ്രാധാന്യമുള്ള സിനിമയിലൂടെ ബോളിവുഡില്‍ എത്തിയതിനാല്‍ താന്‍ ഭാഗ്യവതിയാണെന്നും ലൊക്കേഷനില്‍ നിന്ന് അഥികം വേര്‍തിരിവുകള്‍ ഉണ്ടായിട്ടില്ലെന്നും താരം പറഞ്ഞു. ' ഞാനാണ് നിനക്ക് അവസരങ്ങള്‍ക്ക് വഴിയൊരുക്കിയത് അതുകൊണ്ട് സഹകരിക്കണമെന്ന്' ആരും തന്നോട് പറഞ്ഞിട്ടില്ലെന്നും വിദ്യാബാലന്‍ വ്യക്തമാക്കി.

യുവനടിമാരുടെ അവസ്ഥ പ്രായമേറുന്തോറും മോശമാകുമെന്ന് പലരും പറഞ്ഞിട്ടുണ്ട്. പക്ഷെ, അങ്ങനെയല്ലെന്ന് ഞാന്‍ എപ്പോഴും എന്നോട് തന്നെ പറയുമായിരുന്നു. അടുത്ത 40 വര്‍ഷം കൂടി അഭിനയിക്കണം എന്നാണ് ആഗ്രഹം. അഭിനയമാണ് എന്നെ ആനന്ദിപ്പിക്കുന്നത്. അഭിനയിക്കണമെന്ന് തീരുമാനിച്ച നിമിഷം മുതല്‍ ഇന്നവരെ അതില്‍ മാറ്റം വന്നിട്ടില്ല. അഭിനയത്തില്‍ പ്രത്യേക ലക്ഷ്യങ്ങളൊന്നുമില്ല, എനിക്ക് ജോലി ചെയ്താല്‍ മതിയെന്നും താരം പറഞ്ഞു. ഫെമിനിസ്റ്റാണോ എന്ന് പലരും ചോദിക്കുന്നുണ്ട്, അതു തന്നെയാണ്. പക്ഷെ, പുരുഷ വിദ്വേഷിയല്ല.