കഴിഞ്ഞ ദിവസം ട്രെയിനില്‍ വച്ച്  യുവ നടിയോട് അപമര്യാദയായി പെരുമാറിയത് അങ്ങേയറ്റം അപലപനീയമാണെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍. അവരുടെ വിഷമത്തില്‍  പങ്കുചേരുന്നു. ഒപ്പം അവര്‍ക്ക് എല്ലാ പിന്തുണയും സഹായവും വാഗ്ദാനം ചെയ്യുകയാണ്. പിടിക്കപ്പെട്ട പ്രതിയ്ക്ക് അര്‍ഹമായ പരമാവധി ശിക്ഷ കിട്ടാനുള്ള ശക്തമായ നടപടിയെടുക്കുന്നതാണ്.

സാംസ്‌കാരിക കേരളത്തിന് തന്നെ അപമാനമുണ്ടാക്കുന്ന സംഭവമാണ് കഴിഞ്ഞദിവസം ആ പെണ്‍കുട്ടിക്കുണ്ടായത്. ഒരു പെണ്‍കുട്ടി നിസഹായവസ്ഥയില്‍ നില്‍ക്കുമ്പോള്‍ കണ്ടുനില്‍ക്കുകയല്ലാതെ അവരെയൊന്ന് സഹായിക്കാന്‍ പോലും ആരും തുനിഞ്ഞില്ല എന്നത് വനിതാ ശിശുവികസന മന്ത്രിയെന്ന നിലയിലും ഒരു സ്ത്രീയെന്ന നിലയിലും എന്നെ വല്ലാതെ വേദനിപ്പിക്കുകയാണ്. സ്ത്രീകള്‍ക്കും കുട്ടികള്‍ക്കുമെതിരായ അതിക്രമങ്ങള്‍ക്കെതിരെ കര്‍ശനമായ നിയമമാണിവിടെയുള്ളത്. ഒറ്റപ്പെട്ടവര്‍ ആപത്തില്‍പ്പെട്ടാല്‍ നമ്മള്‍ കണ്ടില്ലെന്ന് നടിക്കരുത്. അവരെ നമ്മളുടെ കൂടെപ്പിറപ്പായി കണ്ട് അവരെ സഹായിക്കുക. തൊട്ടടുത്തുള്ള പോലീസ് സ്‌റ്റേഷനിലോ വനിതാ ഹെല്‍പ് ലൈനിലോ (181) വിളിച്ചാല്‍ എല്ലാ നിയമ സഹായവും ലഭിക്കുന്നതാണ്.

മംഗലാപുരത്തു നിന്നും തിരുവനന്തപുരത്തേക്കുള്ള യാത്രയ്ക്കിടെ ബുധനാഴ്ച രാത്രി പന്ത്രണ്ടരയോടെയോടെയാണ് സംഭവമുണ്ടായത്. മലപ്പുറം തിരൂരില്‍ നിന്ന് ട്രെയിനില്‍ക്കയറിയയാള്‍ വടക്കാഞ്ചേരി സ്‌റ്റേഷനിലെത്തിയപ്പോള്‍ അപമാനിക്കാന്‍ ശ്രമിക്കുകയയും സനൂഷ കയ്യോടെ കുടുക്കുകയുമായിരുന്നു.

തുടര്‍ന്നു സ്വര്‍ണപ്പണിക്കാരനായ കന്യാകുമാരി വില്ലുകുറി സ്വദേശി ആന്റോ ബോസി(41)നെയാണു പോലീസ് അറസ്റ്റ് ചെയ്തു. പ്രതിയെ തൃശൂര്‍ ഒന്നാം ക്ലാസ് മജിസ്‌ട്രേറ്റ് കോടതി റിമാന്‍ഡ് ചെയ്തു. മാവേലി എക്‌സ്പ്രസിലെ എ വണ്‍ കോച്ചിലായിരുന്ന നടി ഉറക്കത്തിലായിരുന്നു. മുകളിലെ ബര്‍ത്തിലായിരുന്ന ഇയാള്‍ ചുണ്ടില്‍ സ്പര്‍ശിക്കുന്നതറിഞ്ഞ് ഉണര്‍ന്ന നടി പ്രതിയുടെ കൈയില്‍പിടിച്ചു ബഹളംവച്ചു. തുടര്‍ന്ന് തൃശൂര്‍ റെയില്‍വേ പോലീസില്‍ വിളിച്ചറിയിച്ചതോടെ പിടികൂടുകയായിരുന്നു.

ദുരുദ്ദേശ്യത്തോടെയാണ് ആന്റോ ശരീരത്തില്‍ സ്പര്‍ശിച്ചതെന്നു സനുഷ പരാതിയില്‍ വ്യക്തമാക്കി. ബഹളം വെച്ചിട്ടും ലൈറ്റിട്ടിട്ടും സഹയാത്രികര്‍ തിരിഞ്ഞുനോക്കിയില്ലെന്നു നടി പരാതിപ്പെട്ടു. ഒടുവില്‍ തൊട്ടടുത്ത ബര്‍ത്തിലുണ്ടായിരുന്ന തിരക്കഥാകൃത്ത് ആര്‍. ഉണ്ണിയും സുഹൃത്ത് രഞ്ജിത്തുമാണു സഹായത്തിനെത്തിയത്. ഐ.പി.സി. 354 വകുപ്പ് പ്രകാരം മാനഭംഗശ്രമത്തിനാണു കേസെടുത്തത്. മലയാളികള്‍ കണ്‍മുന്നില്‍ പെണ്‍കുട്ടി ആക്രമിക്കപ്പെട്ടാല്‍ തിരിഞ്ഞുനോക്കില്ലെന്നു യാത്രതുടര്‍ന്ന സനുഷ പറഞ്ഞു.

ഫേസ്ബുക്കിലൂടെ പ്രതികരിക്കുന്ന മലയാളികള്‍ കണ്‍മുന്നില്‍ നടന്നാല്‍ പ്രതികരിക്കില്ല. തനിക്കുണ്ടായ അനുഭവം ഫെയ്‌സ്ബുക്കിലൂടെ ഷെയര്‍ ചെയ്തിരുന്നെങ്കില്‍ നിരവധിപ്പേര്‍ പിന്തുണ പ്രഖ്യാപിക്കുമായിരുന്നു. പെണ്‍കുട്ടികള്‍ക്കു പ്രശ്‌നമുണ്ടായാല്‍ ഒരാളെങ്കിലും കൂടെയുണ്ടാകുമെന്ന വിശ്വാസം ഇതോടെ തകര്‍ന്നതായും നടി പ്രതികരിച്ചു.