കാത്സ്യത്തിന് നേരെ കണ്ണടയ്ക്കരുത്...!! ശരീരത്തിൽ കാത്സ്യത്തിൻറെ അളവ് കുറയാനുള്ള കാരണങ്ങൾ ഇവയൊക്കെ
വല്ലാത്ത ക്ഷീണം, പതിവില്ലാത്ത നടുവേദന, മുടികൊഴിച്ചിലാണേൽ പറയേം വേണ്ട... ഇത്തരം പരാതികളുമായെത്തുന്ന രോഗികളുടെ എണ്ണം വളരെ കൂടിയിരിക്കുന്നു. ആവശ്യമായ അളവിൽ കാത്സ്യം ശരീരത്തിലില്ല എന്നതാണ് പലരിലും ഈ ബുദ്ധിമുട്ടിന് കാരണം. ഇവ കൂടാതെ ആശയക്കുഴപ്പം, ഓർമ്മക്കുറവ്, മാംസപേശികളുടെ വലിച്ചിൽ, കൈകളിലും കാലുകളിലും മുഖത്തും പെരുപ്പും തുടിക്കുന്ന പോലുള്ള തോന്നലും, ഉന്മേഷക്കുറവ്, ഇല്ലാത്തവ ഉണ്ടെന്നുള്ള തോന്നൽ,
പേശികൾ കോച്ചിവലിക്കുക, നഖങ്ങളുടെ ബലം കുറയുകയും പൊട്ടിപ്പോകുകയും ചെയ്യുക, അസ്ഥികൾ ഒടിയാൻ കൂടുതൽ സാദ്ധ്യത എന്നിവയാണ് കാത്സ്യം കുറയുന്നത് കാരണമുണ്ടാകുന്ന മറ്റ് ബുദ്ധിമുട്ടുകൾ. ആവശ്യമായ കാത്സ്യത്തിന്റെ നാലിൽ മൂന്ന് ഭാഗവും സൂര്യപ്രകാശത്തിന്റെ സാന്നിദ്ധ്യത്തിൽ വിറ്റാമിൻ ഡി വഴി ശരീരത്തിന് ലഭിക്കുന്നുണ്ട്. എന്നിട്ടും കാത്സ്യത്തിൻറെ അളവ് ഇത്രയേറെ കുറയാൻ കാരണമെന്താണ് ?
കാത്സ്യവും ഫോസ് ഫറസും ശരീരത്തിൽ ശരിയായി ആഗീരണം ചെയ്യണമെങ്കിൽ വിറ്റാമിൻ ഡി ആവശ്യമാണ്. വിറ്റാമിൻ ഡി ശരിയായി പ്രവർത്തിക്കാത്തവരിൽ സൂര്യപ്രകാശമേൽക്കുന്നത് കൊണ്ട് മാത്രം ശരിയായ അളവിൽ അത് ലഭിക്കണമെന്നില്ല. അതിൽ തന്നെ കോളീകാൽസിഫെറോൽ എന്ന വിറ്റാമിൻ ഡി 3 ആണ് പ്രധാനമായി കാത്സ്യം ആഗിരണത്തിനെ സഹായിക്കുന്നത്. എന്നാൽ, പ്രകൃതിദത്തമായി ഇവ കാണുന്നത് മത്സ്യം, മീനെണ്ണ, മുട്ടയുടെ മഞ്ഞ തുടങ്ങിയ ആഹാരങ്ങളിലാണ്.
കാത്സ്യത്തിന്റെ അളവ് കുറയുന്നത് അസ്ഥികളുടേയും പല്ലുകളുടേയും ബലം, ഹൃദയാരോഗ്യം, പേശികളുടേയും ഞരമ്പുകളുടേയും പ്രവർത്തനം തുടങ്ങിയവയെ ബാധിക്കും. ശരീരത്തിലുള്ള 99 ശതമാനം കാത്സ്യവും സംഭരിക്കപ്പെടുന്നത് അസ്ഥികളിലും പല്ലുകളിലുമാണ്. അതുകൊണ്ടു തന്നെ കാത്സ്യത്തിന്റെ അളവ് കുറഞ്ഞാൽ അസ്ഥികൾക്കും പല്ലുകൾക്കും ബലക്കുറവുണ്ടാകുകയും പൊട്ടുകയും തേയ്മാനമുണ്ടാകുകയും അസ്ഥിസാന്ദ്രത കുറയുന്ന ഓസ്റ്റിയോപോറോസിസ് എന്ന രോഗം അസ്ഥികളെ ബാധിക്കുകയും ചെയ്യും.
ഒത്തിരിനേരം കളിക്കുക, ഡാൻസ് ചെയ്യുക, സൈക്കിൾ ചവിട്ടുക എന്നിവ ചെയ്യുമ്പോൾ കാലുകളിലെ അസ്ഥികൾക്കും പേശികൾക്കും വേദനയും കഴപ്പുമുണ്ടാകുന്ന കുട്ടികളിൽ കാത്സ്യത്തിന്റെ അളവ് കുറവാകാനാണ് സാദ്ധ്യത. ആർത്തവവിരാമശേഷം അസ്ഥികളുടെ സാന്ദ്രത കുറയുമെന്നതിനാൽ അപ്പോഴും കാത്സ്യത്തിന്റെ അളവ് കൃത്യമായി നിലനിർത്താൻ കൂടുതൽ ശ്രദ്ധിക്കേണ്ടി വരും.
മുലയൂട്ടുന്ന അമ്മമാരിലും കാത്സ്യം കുറഞ്ഞു കാണാറുണ്ട്. ദൈനംദിന പ്രവർത്തനങ്ങൾ ശരിയായി നടത്തുന്നതിന് ആവശ്യമായ അളവിൽ ശരീരത്തിന് ലഭിക്കുന്നില്ലെങ്കിൽ കുറവുള്ള അത്രയും കാത്സ്യം അസ്ഥികളിൽ നിന്നും പല്ലുകളിൽ നിന്നും സ്വീകരിക്കാൻ ശരീരം നിർബന്ധിതമാകും. അത് അസ്ഥികളുടേയും പല്ലിന്റേയും ബലക്കുറവിന് ഇടയാക്കും.
പാൽ, പാൽക്കട്ടി, യോഗർട്ട്, ബീൻസ്, ബദാം, കടൽ വിഭവങ്ങൾ, പച്ച നിറമുള്ള ഇലക്കറികൾ, പയറു വർഗങ്ങൾ, ഉണങ്ങിയ പഴങ്ങൾ, എള്ള്, ചണവിത്ത്, മത്തി, കോര തുടങ്ങിയ മീനുകൾ, ഉണക്കിയ അത്തിപ്പഴം, പശുവിന്റേയും ആടിന്റേയും പാൽ തുടങ്ങിയവയിൽ കാത്സ്യം ധാരാളമായി അടങ്ങിയിട്ടുണ്ട്. ഇത്തരം മത്സ്യങ്ങൾ മുള്ള് ഉൾപ്പടെ ചവച്ച് കഴിക്കുന്നതാണ് നല്ലത്. കൊഞ്ച്, ഞണ്ട്, ചുണ്ണാമ്പ് വാള, കക്ക, നെത്തോലി, കാരൽ തുടങ്ങിയ മീനുകളും നല്ലതാണ്.
ഉണക്കിയ പഴങ്ങളിൽ കാത്സ്യം അടങ്ങിയിട്ടുണ്ടെങ്കിലും അത്തിപ്പഴം തന്നെയാണ് ശ്രേഷ്ഠം. പാലിലും പാലുൽപ്പന്നങ്ങളിലും അടങ്ങിയിട്ടുള്ള കാത്സ്യം കൂടുതൽ എളുപ്പത്തിൽ ആഗീരണം ചെയ്യാൻ സാധിക്കുമെന്നതിനാൽ പശു, ആട് എന്നിവയുടെ പാലിന് പ്രാധാന്യമേറും. സസ്യഭുക്കുകളായവർ പാൽക്കട്ടി ഉപയോഗിക്കാൻ ശ്രദ്ധിക്കേണ്ടതാണ്. എന്നാൽ ഇവയൊന്നും തന്നെ സൂര്യപ്രകാശമേൽക്കുന്നതിന് പകരമാകില്ല.
ശരാശരി അളവിൽ സൂര്യപ്രകാശത്തിൽ നിന്ന് കിട്ടുന്ന കാത്സ്യത്തിന്റെ ബാക്കിയുള്ളത് ആഹാര വസ്തുക്കളിൽനിന്ന് ലഭ്യമാക്കേണ്ടതാണ്. ഒരു ദിവസത്തേക്ക് ആവശ്യമായ കാത്സ്യം ഒറ്റത്തവണയായി ശരീരത്തിന് ലഭിക്കേണ്ട യാതൊരു ആവശ്യവുമില്ലെന്ന് മാത്രമല്ല അത് ദോഷകരവുമാണ്.
മാത്രമല്ല 50 വയസിന് മുകളിലുള്ളവർ ഒരു ദിവസം സ്വീകരിക്കേണ്ട കാത്സ്യത്തിന്റെ പരമാവധി അളവ് 2500 മില്ലിഗ്രാമായി പരിമിതപ്പെടുത്തിയിട്ടുണ്ട്. സൂര്യപ്രകാശമേറ്റും കാത്സ്യം ലഭിക്കുന്ന ഭക്ഷണമുൾപ്പെടുത്തിയും കാത്സ്യം സപ്ലിമെൻറുകൾ കഴിച്ചും കാത്സ്യം കൂട്ടാനായി ശ്രമിക്കുന്നവർ ഇക്കാര്യം ഓർത്തിരിക്കേണ്ടതാണ്.
സസ്യഭുക്കുകൾ, പ്രോട്ടീനും ഉപ്പും അധികമായി ഉപയോഗിക്കുന്നതിനാൽ ശരീരത്തിൽ നിന്ന് കാത്സ്യം ആവശ്യത്തിലധികം പുറത്തേക്ക് നഷ്ടപ്പെടുന്നവർ, കാത്സ്യത്തിന്റെ ആഗീരണം ഫലപ്രദമായി നടക്കാത്ത ക്രോൺസ് ഡിസീസ്, ഇറിറ്റബിൽ ബവൽ സിൻഡ്രോം തുടങ്ങിയ രോഗങ്ങളുള്ളവർ, തുടർച്ചയായി കോർട്ടിക്കോസ്റ്റീറോയിഡ്സ്
ഉപയോഗിക്കുന്നവർ, ഓസ്റ്റിയോപോറോസിസ് എന്ന രോഗമുള്ളവർ, സൺസ്ക്രീൻ ലോഷനുകൾ സ്ഥിരമായി ഉപയോഗിക്കുന്നവർ, സൂര്യപ്രകാശമേൽക്കാതിരിക്കാൻ പ്രത്യേകം ശ്രദ്ധിക്കുന്നവർ, വെയിലേൽക്കാത്തവിധം വസ്ത്രം ധരിക്കുന്നവർ, മധുരം അധികമായി ഉപയോഗിക്കുന്നവർ എന്നിവർക്കെല്ലാം ഇത് ആവശ്യമായി വരാം.
പ്രകൃതിദത്തമല്ലാത്ത കാത്സ്യം സപ്ലിമെന്റുകൾ ഉപയോഗിക്കേണ്ടിവരുന്നവർക്ക് ഹൃദയാഘാതം, പക്ഷാഘാതം, പ്രോസ്റ്റേറ്റ് ഗ്രന്ഥിയെ ബാധിക്കുന്ന ക്യാൻസർ, വൃക്കയിലെ കല്ല്, ഇരുമ്പ്, സിങ്ക്, മെഗ്നീഷ്യം എന്നിവയുടെ ആഗിരണത്തിന് തടസം, രക്തത്തിൽ കാത്സ്യത്തിൻറെ സാന്നിദ്ധ്യം വർദ്ധിച്ചുണ്ടാകുന്ന ഹൈപ്പർകാൽസീമിയ, അതുകാരണമുണ്ടാകുന്ന വയറുവേദന, ഓക്കാനം, ഇടയ്ക്കിടെ ടോയ്ലറ്റിൽ പോകണമെന്ന തോന്നൽ, മലബന്ധം, വിഷാദം എന്നിവയുണ്ടാകാൻ സാദ്ധ്യതയുണ്ട്.
ചുരുക്കത്തിൽ, കാൽസ്യം ശരീരത്തിന് ഒഴിവാക്കാനാവാത്ത ഒന്നാണ്. സൂര്യപ്രകാശത്തിന്റെ സാന്നിദ്ധ്യം ഒഴിവാക്കുന്നത് അഭികാമ്യമല്ല. സൂര്യപ്രകാശം ആവശ്യത്തിന് ലഭിക്കാത്തവർ ആവശ്യമായ അളവിൽ പ്രകൃതിദത്ത കാത്സ്യമടങ്ങിയ ഭക്ഷണം ഉൾപ്പെടുത്തേണ്ടിവരും. പ്രായം കൊണ്ടും പലവിധ അസുഖങ്ങൾ കാരണവും അതത്ര എളുപ്പമാകണമെന്നില്ല.
കാത്സ്യം അടങ്ങിയ ഭക്ഷണം ആവശ്യത്തിന് കഴിക്കാൻ ദഹനശേഷിയും അനുവദിക്കണമെന്നില്ല. അപ്പോൾ പിന്നെ കാത്സ്യം സപ്ലിമെന്റുകൾ ഉപയോഗിക്കേണ്ടിവന്നേക്കാം. എന്നാൽ, അതിന്റെ തുടർച്ചയായ ഉപയോഗം പുതിയ രോഗങ്ങൾക്ക് കൂടി കാരണമായേക്കാം. അതിനാൽ ശരിയായ അളവിൽ കാത്സ്യം ലഭിക്കുന്ന ജീവിതശൈലി ചിട്ടപ്പെടുത്തുകയാണ് നല്ലത്.
https://www.facebook.com/Malayalivartha