പാഴാക്കിക്കളയുന്ന ഭക്ഷണം കൊണ്ട് പാവങ്ങളുടെ പട്ടിണിമാറ്റുക എന്ന ലക്ഷ്യത്തോടെ പാവപ്പെട്ടവര്ക്ക് താങ്ങായി കുവൈത്ത് ഫുഡ്ബാങ്ക്....
കഷ്ടതയനുഭവിക്കുന്നവര്ക്ക് ഒരു കൈത്താങ്ങായി കുവൈത്ത് ഫുഡ്ബാങ്ക് . വളരെയധികം കഷ്ടപ്പെടുന്നവര്ക്ക് സൗജന്യ ഭക്ഷ്യക്കിറ്റുകള് വിതരണം ചെയ്യുന്ന പദ്ധതിയുമായാണ് കുവൈത്ത് ഫുഡ് ബാങ്ക് രംഗത്തെത്തുന്നത്. സാമൂഹികക്ഷേമ മന്ത്രാലയത്തിന്റെ പിന്തുണയോടെ നടത്തുന്ന 'ഫുഡ് പാര്സല്' പദ്ധതിയില് രാജ്യത്തെ സഹകരണ സംഘങ്ങളുടെ പങ്കാളിത്തമുണ്ടാകും. 'നല്കുന്നതില് പങ്കാളിയാവുക' എന്നാണ് പദ്ധതിയുടെ മുദ്രാവാക്യം. കഷ്ടതയനുഭവിക്കുന്നവര്ക്ക് ഭക്ഷണാവശ്യത്തിനുള്ള സാധനങ്ങള് കിറ്റുകളാക്കി എത്തിക്കലാണ് ലക്ഷ്യമെന്ന് കുവൈത്ത് ഫുഡ് ബാങ്ക് ഡെപ്യൂട്ടി ചെയര്മാന് മിഷാല് അല് അന്സാരി വാര്ത്താ സമ്മേളനത്തില് അറിയിച്ചു. യൂനിയന് ഓഫ് കണ്സ്യൂമര് കോഓപറേറ്റിവ് സൊസൈറ്റിയുടെ സഹകരണത്തോടെയാണ് പദ്ധതി നടപ്പാക്കുന്നത്.
രാജ്യത്തെ വിവിധ ഭാഗങ്ങളിലുള്ള സഹകരണ സ്ഥാപനങ്ങളില് പ്രത്യേക പെട്ടി സ്ഥാപിച്ചാണ് ഭക്ഷ്യവസ്തുക്കള് ശേഖരിക്കുക. ആദ്യഘട്ടത്തില് ഇത്തരത്തില് 360 പെട്ടികള് സ്ഥാപിക്കും. പദ്ധതിയുമായി സഹകരിക്കാനുദ്ദേശിക്കുന്നവര്ക്ക് ഭക്ഷ്യോല്പന്നങ്ങള് പെട്ടികളില് നിക്ഷേപിക്കാം. പദ്ധതിക്ക് സാമൂഹികക്ഷേമ മന്ത്രാലയത്തിന്റെ പൂര്ണ പിന്തുണ ഉറപ്പുനല്കിയതായും മന്ത്രാലയത്തിലെ സഹകരണകാര്യ വിഭാഗം അണ്ടര് സെക്രട്ടറി അബ്ദുല് അസീസ് ഷുഹൈബ് പറഞ്ഞു.
ദാരിദ്ര്യമനുഭവിക്കുന്ന ഒരു കുടുംബത്തിന് ഒരുമാസത്തെ ആവശ്യത്തിനുള്ള ഭക്ഷ്യ വസ്തുക്കള് അടങ്ങുന്നതാകും ഓരോ പാഴ്സലുമെന്ന് കുവൈത്ത് ഫുഡ്ബാങ്ക് ഡയറക്ടര് സാലിം അല് ഹമ്മാര് വ്യക്തമാക്കി. 2016ല് കുവൈത്തി വ്യവസായ പ്രമുഖനായ ബദര് നാസര് അല് ഖറാഫിയാണ് പാഴാക്കിക്കളയുന്ന ഭക്ഷണം കൊണ്ട് പാവങ്ങളുടെ പട്ടിണിമാറ്റുക എന്ന ലക്ഷ്യത്തോടെ കുവൈത്ത് ഫുഡ് ബാങ്കിന് തുടക്കമിട്ടത്.
https://www.facebook.com/Malayalivartha
